Degé Kangyur volume 2, F.131.b

འདས་གཙུག་ལག་ཁང་དུ་གཤེགས་ནས་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །​བཞུགས་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་བྲམ་ཟེ་ཨོ་ཏ་ལའི་བུས་སྨོན་ལམ་ལོག་པས་བསླང་བའི་སེམས་སྡིག་པ་ཅན་བསྐྱེད་ཀྱིས། ཁྱོད་ཅག་གིས་ཟན་ཟོས་ནས་གཙུག་ལག་ཁང་གི་ཚིགས་སུ་བཅད་པ་བརྗོད་ཅིག་དང་ལོག་པའི་སྨོན་ལམ་འགྲུབ་པར་མི་འགྱུར་རོ། །​དེ་ནས་བཅོམ་ལྡན་འདས་དེ་ཉིད་ཀྱི་མཚན་མོ་འདས་ནས་ཕྱི་བཞིན་འབྲང་བའི་དགེ་སྦྱོང་ཚེ་དང་ལྡན་པ་ཀུན་དགའ་བོ་དང་ཡུལ་ཨོ་ཏ་ལར་བསོད་སྙོམས་ལ་ཞུགས་པ་དང་། ཨོ་ཏ་ལ་ན་བྲན་མོ་རྒན་མོ་ཀ་ཙང་ག་ལ་ཞེས་བྱ་བ་ཞིག་གནས་ཏེ། དེ་བུམ་པ་ཐོགས་ནས་ཆུ་ཆུར་ཁྲོན་པའི་དྲུང་དུ་སོང་བ་དང་བཅོམ་ལྡན་འདས་ཀྱང་ཕྱོགས་དེར་གཤེགས་ཏེ། བཅོམ་ལྡན་འདས་ཀྱིས་དེའི་གདུལ་བའི་དུས་མཁྱེན་ནས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་རྒན་མོ་ཕ་བི་ལ་བཅོམ་ལྡན་འདས་སྐྱེམས་ཀྱིས་ཆུ་ཕུལ་ཅིག་ཅེས་སྒོ་ཤིག །​བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ལྟར་མཉན་ནས། རྒན་མོ་ཀ་ཙང་ག་ལ་གང་ན་བ་དེར་སོང་སྟེ་ཕྱིན་པ་དང་རྒན་མོ་ཀ་ཙང་ག་ལ་ལ་འདི་སྐད་ཅེས་སྨྲས་སོ། །​ཀ་ཙང་ག་ལ་བཅོམ་ལྡན་འདས་སྐྱེམས་ཀྱིས་ཆུ་ཕུལ་ཅིག་དེས་སྨྲས་པ་འཕགས་པ་བདག་ཉིད་འཚལ་ཏེ་མཆིའོ། །​དེ་ནས་ཀ་ཙང་ག་ལས་ཆུས་བུམ་པ་བཀང་ནས་རིངས་པ་རིངས་པར་བཅོམ་ལྡན་འདས་གང་ན་བ་དེར་སོང་བ་དང་། ཀ་ཙང་ག་ལས་སངས་རྒྱས་བཅོམ་ལྡན་འདས་སྐུ་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་ཀུན་ནས་བརྒྱན་པ། དཔེ་བྱད་བཟང་པོ་བརྒྱད་བཅུས་མཛེས་པར་བྱས་པ། འོད་འདོམ་གང་གིས་བརྒྱན་པ། འོད་ཟེར་ཉི་མ་སྟོང་བས་ལྷག་པ། རིན་པོ་ཆེའི་རི་བོ་འགྲོ་བ་ལྟར་ཀུན་ནས་བཟང་བ་མཐོང་ངོ་། །​མཐོང་མ་ཐག་ཏུ་ཡང་དེ་ལ་བུའི་སྡུག་པ་སྐྱེས་ནས་དེས་ལག་པ་བསྒྲེང་སྟེ་བུ་བུ་ཞེས་བཅོམ་ལྡན་འདས་ལ་འཁྱུད་པར་བརྩམས་པ་དང་། དགེ་སློང་རྣམས་ཀྱིས་དེ་བཟློག་གོ། །​བཅོམ་ལྡན་འདས་ཀྱིས་བཀའ་སྩལ་པ།



The English translation of this folio by 84000 Translating the words of the Buddha can be found at:
https://read.84000.co/translation/toh1-6.html?part=UT22084-001-006-8157#UT22084-001-006-8157