།དེ་བཞིན་གཤེགས་པ་ཡིན་ཞེས་རྟོགས་པར་བྱ་བའི་རིགས། །དེ་ནས་བྲམ་ཟེ་དེ་མངོན་པར་དད་ནས་དེ་ནས་བཅོམ་ལྡན་འདས་ཀྱིས་དེའི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་མཁྱེན་ནས་ཞེས་བྱ་བ་ནས། ཐོག་མ་མེད་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་ཏེ། བཙུན་པ་བདག་ནི་འཕགས་སོ། །མངོན་པར་འཕགས་སོ་ཞེས་བྱ་བའི་བར་གོང་མ་བཞིན་དུའོ། །བདག་བཅོམ་ལྡན་འདས་དང་། ཆོས་དང་། དགེ་སློང་གི་དགེ་འདུན་ལ་སྐྱབས་སུ་མཆི་ལགས་ཀྱིས་བདག་དགེ་བསྙེན་དུ་གཟུང་དུ་གསོལ། དེང་སླན་ཆད་ཇི་སྲིད་འཚོའི་བར་དུ་སྲོག་དང་ཡང་བསྡོས་ཏེ་སྐྱབས་སུ་མཆི་བར་མངོན་པར་དད་ལགས་སོ། །དེ་ནས་བྲམ་ཟེ་དེ་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་ནས་ཡི་རངས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ནས་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་།། །།སྡོམ་ལ། ཀིམ་པི་ལ་དང་སྦྲུལ་གདུགས་དང་། །མ་ཐུ་ལ་དང་ཡུལ་འཁོར་སྐྱོང་། །གླང་ཆེན་གྲོང་དང་གྲོང་ཁྱེར་ཆེ། །སྲུག་ན་དང་ནི་བྲམ་ཟེའི་གྲོང་། །གྲོང་ཁྱེར་ནག་པོ་རོ་ཧི་ཏ། །གསིང་མ་ཅན་དང་དེ་བཞིན་དུ། །དགའ་བ་འཕེལ་བས་ཚོགས་སུ་ནི། །བྱས་ཏེ་ཡང་དག་བརྗོད་པ་ཡིན། །བཅོམ་ལྡན་འདས་ཀིམ་པི་ལར་བྱོན་ནས་ཀིམ་པི་ལའི་ནགས་ཁྲོད་ན་བཞུགས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀིམ་པི་ལ་ལ་བཀའ་སྩལ་པ། ཀིམ་པི་ལ་དྲན་པ་ཉེ་བར་གཞག་པ་བཞི་ལ་བརྩམས་ཏེ་བསྒོམ་པ་ཁྱོད་ལ་བཤད་ཀྱིས། དེ་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་བཤད་དོ་ཞེས་དེ་སྐད་བཀའ་སྩལ་པ་ན། ཚེ་དང་ལྡན་པ་ཀིམ་པི་ལ་ཅང་མི་སྨྲའོ། །ལན་གཉིས་སུ་ཡང་དེ་བཞིན། ལན་གསུམ་དུ་ཡང་དེ་བཞིན་བརྗོད་པར་བྱའོ། །དེ་ནས་ཚེ་དང་ལྡན་པ་ཀུན་དགའ་བོས་ཚེ་དང་ལྡན་པ་ཀིམ་པི་ལ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཀིམ་པི་ལ་ཁྱོད་ལ་སྟོན་པ་གསུང་ངོ་།