།བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ལྟར་མཉན་ནས། གཙུག་ལག་ཁང་ཡངས་པ་ཞིག་ཏུ་སྟན་མང་དུ་བཤམས་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་གཙུག་ལག་ཁང་ཡངས་པ་ཞིག་ཏུ་གདན་མང་དུ་བཤམས་ལགས་ཏེ། བཅོམ་ལྡན་འདས་ད་དེའི་དུས་ལ་བབ་པར་དགོངས་སུ་གསོལ། དེ་ནས་བཅོམ་ལྡན་འདས་གཙུག་ལག་ཁང་ཡངས་པ་གང་ན་བ་དེར་གཤེགས་ཏེ་བྱོན་ནས་གདན་བཤམས་པ་ཉིད་ལ་བཞུགས་སོ། །དེ་ནས་ཀོ་ས་ལའི་རྒྱལ་པོ་གསལ་རྒྱལ་ལ་མི་དེས་རིག་པར་བྱས་ཏེ་སོང་ནས་རིང་པོ་མ་ལོན་པར་མི་གཞན་ཞིག་ལ་སྨྲས་པ། ཀྭའི་ནང་རྗེ་ཚུར་ཤོག །ཁྱོད་ཀྱིས་བཞོན་པ་བཟང་པོ་མྱུར་དུ་སྟོད་ཅིག །དེ་ལ་ཁོ་བོ་ཞོན་ལ་དེ་རིང་ཁོ་ན་དགེ་སྦྱོང་གཽ་ཏ་མ་ལ་བལྟ་བའི་ཕྱིར་འགྲོའོ། །ལྷ་བཀའ་བཞིན་འཚལ་ཞེས་མི་དེས་ཀོ་ས་ལའི་རྒྱལ་པོ་གསལ་རྒྱལ་གྱི་ལྟར་མཉན་ཏེ། བཞོན་པ་བཟང་པོ་བསྟད་ནས་ཀོ་ས་ལའི་རྒྱལ་པོ་གསལ་རྒྱལ་གང་ན་བ་དེར་སོང་སྟེ་ཕྱིན་པ་དང་། ཀོ་ས་ལའི་རྒྱལ་པོ་གསལ་རྒྱལ་ལ་འདི་སྐད་ཅེས་སྨྲས་སོ། །ལྷ་བཅིབས་པ་བཟང་པོ་བསྟད་ལགས་ཏེ། ལྷ་ད་དེའི་དུས་ལ་བབ་པར་དགོངས་སུ་གསོལ། དེའི་ཚེ་སྲིང་མོ་མཛེས་ལྡན་དང་། ཉི་ལྡན་གཉིས་རྒྱལ་པོ་གསལ་རྒྱལ་གྱི་བཀད་སར་འོངས་པར་གྱུར་ཏེ། སྲིང་མོ་མཛེས་ལྡན་དང་། ཉི་ལྡན་གཉིས་ཀྱིས་ལྷ་དེང་ཉིད་བཅོམ་ལྡན་འདས་ལ་བལྟ་བའི་ཕྱིར་བཞུད་དོ་ཞེས་ཐོས་སོ། །ཐོས་ནས་ཀྱང་ཀོ་ས་ལའི་རྒྱལ་པོ་གསལ་རྒྱལ་ལ་འདི་སྐད་ཅེས་སྨྲས་སོ། །ལྷ་གལ་ཏེ་དེང་ཉིད་བཅོམ་ལྡན་འདས་གཟིགས་པའི་ཕྱིར་གཤེགས་ན། ལྷ་འདི་ལྟར་བདག་ཅག་གི་ཚིག་གིས་བཅོམ་ལྡན་འདས་ཀྱི་ཞབས་གཉིས་ལ་དབུས་ཕྱག་མཛོད་ལ་གནོད་པ་ཆུང་ངམ། ཉམ་ང་བ་ཉུང་ངམ།