Degé Kangyur volume 2, F.85.a

ཏིལ་གྱི་མར་ཁུ་འཚལ་བ་གདའ་ལགས་སོ། །​ཀྱེ་གཽ་ཏ་མ་བདག་གི་སློབ་མ་བྲམ་ཟེའི་ཁྱེའུ་མ་སྡུག་མཆིས་ལགས་སམ། བྲམ་ཟེ་འོངས་སོ། །​ཤེས་ལྡན་གཽ་ཏ་མ་དེ་དང་ལྷན་ཅིག་ཏུ་བཀའ་མཆིད་དག་བགྱིས་ལགས་སམ། བྲམ་ཟེ་བྱས་སོ། །གཽ་ཏ་མ་དེའི་སླད་དུ། དེ་དང་ལྷན་ཅིག་བཀའ་མཆིད་ཇི་སྙེད་ཅིག་གླེངས་པ་དེ་ཐམས་ཅད་བདག་ལ་རྒྱས་པར་བཀའ་སྩལ་དུ་གསོལ། དེ་ནས་བཅོམ་ལྡན་འདས་ཀྱིས་བྲམ་ཟེའི་ཁྱེའུ་མ་སྡུག་དང་ལྷན་ཅིག་ཇི་སྙེད་གཏམ་གླེངས་པ་དེ་ཐམས་ཅད་བྲམ་ཟེ་པད་མའི་སྙིང་པོ་ལ་བཀའ་སྩལ་ཏོ། །​དེ་ནས་བྲམ་ཟེ་པད་མའི་སྙིང་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །​ཀྱེ་གཽ་ཏ་མ་བྲམ་ཟེའི་ཁྱེའུ་མ་སྡུག་ནི་བུས་པ་རང་བཞིན་མ་འཚལ་བ་ལགས་སོ། །​ཀྱེ་གཽ་ཏ་མ་ཁྱོད་ཀྱིས་བྲམ་ཟེའི་ཁྱེའུ་མ་སྡུག་ལ་བཟོད་པར་མཛོད་ཅིག་བྲམ་ཟེ་བཟོད་དོ། །​ཤེས་ལྡན་གཽ་ཏ་མ་གང་གི་ཚེ་བདག་ཤིང་རྟའི་ནང་དུ་ཞུགས་པའམ། སྲབ་སྐྱོགས་འཛིན་པའམ། ལྕག་སྒྲེང་བའམ། སྐད་ཆེན་པོར་མཆི་བ་གཟིགས་པ་དེའི་ཚེ་ང་ལ་བྲམ་ཟེ་པད་མའི་སྙིང་པོ་ཕྱག་འཚལ་ནས་གནོད་པ་ཆུང་ངམ། ཉམ་ང་བ་ཉུང་ངམ། འཚོའམ། བསྐྱོད་པ་ཡང་ངམ། སྟོབས་དང་བདེ་བ་ལ་རེག་པར་སྤྱོད་དམ་ཞེས་སྙུན་གསོལ་ལོ་ཞེས་དེ་ལྟར་ཐུགས་སུ་ཆུད་པར་མཛད་དུ་གསོལ། ཀྱེ་ཤེས་ལྡན་གཽ་ཏ་མ་གང་གི་ཚེ་བདག་སྲང་གི་དབུས་ནས་མཆིས་པའམ། མཆིལ་ལྷམ་ཕུད་པའམ། ཤུལ་བཟུར་བའམ། སུག་པ་བརྐྱང་པ་གཟིགས་པ་དེའི་ཚེ་ཤེས་ལྡན་གཽ་ཏ་མས་བདག་ཕྱག་འཚལ་བར་གཟུང་དུ་གསོལ་ཞེས་བྱ་བ་ནས། རེག་པར་སྤྱོད་དམ་ཞེས་བྱ་བའི་བར་གོང་མ་བཞིན་དུའོ། །​ཀྱེ་ཤེས་ལྡན་གཽ་ཏ་མ་གང་གི་ཚེ་བདག་འཁོར་གྱི་ནང་ན་མཆིས་པའམ། རད་པའམ། སྟན་ནམ། གཙུག་ཏོར་ལ་ནོམ་པ་གཟིགས་པ་དེའི་ཚེ་ཤེས་ལྡན་གཽ་ཏ་མས་བདག་ཕྱག་འཚལ་བར་གཟུང་དུ་གསོལ་ཞེས་བྱ་བ་ནས། རེག་པར་སྤྱོད་དམ་ཞེས་བྱ་བའི་བར་གོང་མ་བཞིན་དུའོ། །​ཀྱེ་གཽ་ཏ་མ་དེ་ཅིའི་སླད་དུ་ཞེ་ན། བྲམ་ཟེ་རྣམས་ནི་གྲགས་



The English translation of this folio by 84000 Translating the words of the Buddha can be found at:
https://read.84000.co/translation/toh1-6.html?part=UT22084-001-006-8064#UT22084-001-006-8064