།སྲིད་པ་འདི་ལས་གཞན་མི་ཤེས་སོ་ཞེས་རྣམ་པར་གྲོལ་བའི་ཡེ་ཤེས་ཉིད་མཐོང་བར་འགྱུར་རོ། །དཔེར་ན་གྲོང་ངམ་གྲོང་རྡལ་དང་ཧ་ཅང་ཡང་ཐག་མི་རིང་བ་ཞིག་ན་མཚོ་བྲན་གཏིང་ཟབ་པ། ཆུ་གསལ་བ། དང་བ། རྣམ་པར་དང་བ་ཞིག་ཡོད་ལ། དེ་ལ་སྐྱེས་བུ་མིག་དང་ལྡན་པ་ཞིག་འགྲམ་དུ་འདུག་ནས་གསེག་མའམ། གྱོ་མོའམ། ཉའམ། རུ་སྦལ་ལམ། ཉ་ཕྱིས་སམ། དུང་རྣམས་མཐོང་བ་དེ་བཞིན་དུ། དེ་འདི་ལྟར་མཉམ་པར་བཞག་པའི་སེམས་ཡོངས་སུ་དག་པ། རྣམ་པར་བྱང་བ། ཉོན་མོངས་པ་མེད་པ། ཉེ་བའི་ཉོན་མོངས་པ་དང་བྲལ་བ་དྲང་པོར་གྱུར་པ། ལས་སུ་རུང་བ་ལ་གནས་པ། མི་གཡོ་བ་ཐོབ་པ་ཞེས་བྱ་བ་ནས། འདི་ལས་སྲིད་པ་གཞན་མི་ཤེས་སོ་ཞེས་བྱ་བའི་བར་གོང་མ་བཞིན་དུའོ། །འདི་ནི་རིག་པ་ཞེས་བྱ་སྟེ། གོང་མའི་ཞབས་དང་འདི་གཉིས་གཅིག་ཏུ་བསྡོམས་པ་ལ་རིག་པ་དང་ཞབས་ཞེས་བྱའོ། །བྲམ་ཟེའི་ཁྱེའུ་བླ་ན་མེད་པའི་རིག་པ་དང་ཞབས་སུ་ལྡན་པ་དེ་མངོན་སུམ་དུ་མ་བྱས་པ་མངོན་སུམ་དུ་བྱ་བ་ལ་ཐབས་མ་ཡིན་པ་བཞིར་རིག་པར་བྱ་སྟེ། བཞི་གང་ཞེ་ན། འདི་ལ་དགེ་སྦྱོང་དང་བྲམ་ཟེ་ཁ་ཅིག་བླ་ན་མེད་པའི་རིག་པ་དང་ཞབས་སུ་ལྡན་པ་འདི་ཉིད་མངོན་པར་མ་རྟོགས་པར་གྲོང་ནས་དགོན་པར་སོང་ནས་ཡལ་ག་དང་ལོ་མའི་སྤྱིལ་བུ་བྱས་ཏེ་གནས་པར་བྱེད་དེ། འདི་ན་བདག་ཅག་རྩ་བ་དང་འབྲས་བུས་འཚོ་བར་བྱའོ་ཞེས་དེ་རྣམས་དེ་ན་རྩ་བ་དང་འབྲས་བུས་འཚོ་བར་བྱེད་པ་འདི་ནི་བྲམ་ཟེའི་ཁྱེའུ་བླ་ན་མེད་པའི་རིག་པ་དང་ཞབས་སུ་ལྡན་པ་འདི་མངོན་སུམ་དུ་མ་བྱས་པ་མངོན་སུམ་དུ་བྱ་བ་ལ་ཐབས་མ་ཡིན་པ་དང་པོ་ཡིན་པར་རིག་པར་བྱའོ། །བྲམ་ཟེའི་ཁྱེའུ་ཇི་སྙམ་དུ་སེམས། ངས་གང་བླ་ན་མེད་པའི་རིག་པ་དང་ཞབས་སུ་ལྡན་པ་དེའི་ཐབས་མ་ཡིན་པ་དང་པོ་འདི་བཤད་པ་དེ་ལ་ཁྱོད་སློབ་དཔོན་དང་བཅས་པར་སྣང་ངམ། ཀྱེ་གཽ་ཏ་མ་མ་ལགས་སོ། །བྲམ་ཟེའི་ཁྱེའུ་གཞན་ཡང་དགེ་སྦྱོང་ངམ་བྲམ་ཟེ་ཁ་ཅིག་བླ་ན་མེད་པའི་རིག་པ་དང་ཞབས་སུ་ལྡན་པ་འདི་ཉིད་མངོན་པར་མ་རྟོགས་པར་རྩ་བ་དང་འབྲས་བུའི་ཟས་དེ་རྣམས་སྤངས་ནས་མཐའ་གཅིག་ཏུ་སོང་སྟེ། ཡལ་ག་དང་ལོ་མའི་སྤྱིལ་བུ་བྱས་ནས་གནས་པར་བྱེད་དེ། འདིར་བདག་ཅག་ལོ་མའི་ཟས་ཀྱིས་འཚོ་བར་བྱའོ་ཞེས་དེ་རྣམས་དེ་ན་ལོ་མའི་ཟས་ཀྱིས་འཚོ་བར་བྱེད་པ་འདི་ནི་བྲམ་ཟེའི་ཁྱེའུ་བླ་ན་མེད་པའི་རིག་པ་དང་ཞབས་སུ་ལྡན་པ་དེ་མངོན་སུམ་དུ་མ་བྱས་པ་མངོན་སུམ་དུ་བྱ་བ་ལ་ཐབས་མ་ཡིན་པ་གཉིས་པ་ཡིན་པར་རིག་པར་བྱའོ།