ཁོ་བོས་དེ་གསང་ཚིག་དག་ལས་བཏོན་པ་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་པོ་དེ་དག་དང་ལྡན་པའི་སྐྱེས་བུ་ཆེན་པོའི་འགྲོ་བ་ནི་གཉིས་ལས་གཞན་དུ་མི་འགྱུར་ཏེ། གལ་ཏེ་ཁྱིམ་ན་གནས་ན་ནི་འཁོར་ལོས་སྒྱུར་བའི་རྒྱལ་པོ་མཐའ་བཞིར་རྣམ་པར་རྒྱལ་བ་ཆོས་དང་ལྡན་པ་ཆོས་ཀྱི་རྒྱལ་པོ་ཞེས་བྱ་བ་ནས། འཇིག་རྟེན་དུ་སྒྲ་རྣམ་པར་གྲགས་པར་འགྱུར་རོ་ཞེས་བྱ་བའི་བར་དུ་སྟེ། དེ་ཀོ་ས་ལ་ནས་ལྗོངས་རྒྱུ་ཞིང་གཤེགས་པ་ན་འདོད་པ་མཐུན་པར་བྱོན་ནས། འདོད་པ་མཐུན་པ་ན་འདོད་པ་མཐུན་པའི་ནགས་ཁྲོད་ན་བཞུགས་སོ་ཞེས་ཐོས་ཀྱིས་བྲམ་ཟེའི་ཁྱེའུ་ཚུར། ཁྱོད་ཤེས་ལྡན་གཽ་ཏ་མ་གང་ན་བ་དེར་སོང་ཤིག་དང་། ཕྱིན་ནས་ཇི་ག་ཤེས་ལྡན་གཽ་ཏ་མ་དེའི་དགེ་བ་དང་། གྲགས་པ་དང་། སྒྲ་དང་། ཚིགས་སུ་བཅད་པ་རྒྱ་ཆེན་པོ་ཕྱོགས་དང་ཕྱོགས་མཚམས་སུ་ཇི་ལྟར་གྲགས་པ་དེ་ཁོ་ན་བཞིན་ཡིན་ནམ་མ་ཡིན་པ་དང་། དེའི་མཚན་རྣམས་གྲགས་པ་ཡང་དག་པ་ཡིན་ནམ་མ་ཡིན་པ་རང་ཉིད་ཀྱིས་རབ་ཏུ་ཤེས་པར་འགྱུར་གྲང་། བྲམ་ཟེའི་ཁྱེའུ་མ་སྡུག་གིས་བྲམ་ཟེ་པད་མའི་སྙིང་པོའི་ལྟར་མཉན་ནས་ཤས་ཆེ་བའི་བྲམ་ཟེ་རྒན་རབས་རྒན་རབས་མང་པོ་དང་ལྷན་ཅིག་ཏུ་ཤས་ཆེ་བ་ནས་བྱུང་ནས། བཅོམ་ལྡན་འདས་གང་ན་བ་དེར་དོང་སྟེ་ལྷགས་ནས་ཕྱོགས་གཅིག་ཏུ་འདུག་གོ། །དེ་ནས་ཤས་ཆེ་བའི་བྲམ་ཟེ་རྒན་རབས་རྒན་རབས་རྣམས་བཅོམ་ལྡན་འདས་དང་ལྷན་ཅིག་མངོན་དུ་ཡང་དག་པར་དགའ་བར་འགྱུར་བ་དང་ཡང་དག་པར་མགུ་བར་འགྱུར་བའི་གཏམ་སྣ་ཚོགས་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་བཅོམ་ལྡན་འདས་ཀྱིས་ཤས་ཆེ་བའི་བྲམ་ཟེ་རྒན་རབས་རྒན་རབས་རྣམས་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དེ། བཅོམ་ལྡན་འདས་ཤས་ཆེ་བའི་བྲམ་ཟེ་རྒན་རབས་རྒན་རབས་རྣམས་ལ་ཆོས་དང་ལྡན་པའི་གཏམ་གསུང་བ་ན་བྲམ་ཟེའི་ཁྱེའུ་མ་སྡུག་མཆིལ་ལྷམ་དང་བཅས་པས་འཆག་ཅིང་གློ་བུར་དུ་གཏམ་དག་གླེང་བར་བྱེད་ལ། གཏམ་མཐར་ཕྱིན་པར་མི་སྡོད་པར་མ་གུས་པས་སྙེམས་ཤིང་བཟློགས་པར་སེམས་སོ།