མཐོང་བར་དཀའ་བ། རྟོགས་པར་དཀའ་བ། བརྟག་པར་བྱ་བ་མ་ཡིན་པ། རྟོག་གེའི་སྤྱོད་ཡུལ་མ་ཡིན་པ། ཞིབ་མོ་བརྟགས་པའི་རྟོགས་པ་དང་། མཁས་པ་དང་མཛངས་པས་རིག་པར་བྱ་བ་ཡིན་ཏེ། དེ་ནི་ཁྱེད་ཀྱི་སྦྱིན་པ་ལན་གཅིག་བྱས་པས་ཐོབ་པར་སླ་བ་མ་ཡིན་ཏེ། སྦྱིན་པ་ལན་བརྒྱས་མ་ཡིན། སྦྱིན་པ་ལན་སྟོང་གིས་མ་ཡིན། སྦྱིན་པ་ལན་བརྒྱ་ཕྲག་སྟོང་གིས་མ་ཡིན་ནོ། །འོན་ཀྱང་རྒྱལ་པོ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདོད་ན་སྦྱིན་པ་དག་ཀྱང་སྦྱིན། བསོད་ནམས་དག་ཀྱང་བྱ་ཞིང་དགེ་བའི་བཤེས་གཉེན་དག་ཀྱང་བསྟེན་པར་བྱ། བསྙེན་པར་བྱ། བསྙེན་བཀུར་བྱའོ། །རྒྱལ་པོ་ཆེན་པོ་ཁྱོད་ཀྱིས་དེ་བཞིན་དུ་སྦྱིན་པ་དག་ནི་བཏང་། བསོད་ནམས་དག་ནི་བྱས་ཤིང་དགེ་བའི་བཤེས་གཉེན་དག་ཀྱང་བསྟེན། བསྙེན་བསྙེན་བཀུར་བྱས་ན་དེ་ལྟ་ན་ཁྱོད་ནམ་ཞིག་ན་འཇིག་རྟེན་གྱི་གཙོ་བོ་འདྲེན་པར་འགྱུར་གྲང་། དེ་སྐད་ཅེས་བཀའ་སྩལ་པ་དང་། ཀོ་ས་ལའི་རྒྱལ་པོ་གསལ་རྒྱལ་མཆི་མ་བླགས་ཏེ་ངུས་སོ། །དེ་ནས་ཀོ་ས་ལའི་རྒྱལ་པོ་གསལ་རྒྱལ་གྱིས་གོས་ཀྱི་མཐའ་མས་མཆི་མ་ཕྱིས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དོན་དུ་གཉེར་བ་ན་སྦྱིན་པ་ནི་ཅི་སྙེད་ཅིག་སྩལ། བསོད་ནམས་ནི་ཇི་སྙེད་ཅིག་བགྱིས་ལགས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་རེ་ཞིག་འདས་པའི་བསྐལ་པ་གཞན་རྣམས་ལྟ་ཞོག་གི། བསྐལ་པ་བཟང་པོ་འདི་ཉིད་ལ་ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དོན་དུ་གཉེར་བས་རྣམ་གྲངས་དུ་མར་སྦྱིན་པ་བཏང་བ་དང་། བསོད་ནམས་བྱས་པ་དེ་དག་ལེགས་པར་རབ་ཏུ་ཉོན་ལ་ཟུང་ཤིག་དང་བཤད་དོ།། །།བར་སྡོམ་ལ། ང་ལས་ནུ་དང་ལེགས་མཐོང་ཆེ། །དུས་དཔོག་ཀུ་ཤ་གདོལ་བ་དང་། །ལྷ་ཆེན་པོ་དང་མུ་ཁྱུད་རྒྱལ། །མེ་ལོང་གདོང་དང་ནོར་བཟངས་དང་། །ཐམས་ཅད་སྒྲོལ་དང་འདུམ་བྱེད་དོ། །རྒྱལ་པོ་ཆེན་པོ་སྔོན་བྱུང་བ་སྐྱེ་དགུ་རྣམས་ཀྱི་ཚེ་ལོ་དཔག་ཏུ་མེད་པ་ན་རྒྱལ་པོ་གསོ་སྦྱོང་འཕགས་ཞེས་བྱ་བ་བྱུང་བར་གྱུར་ཏེ། དེའི་སྤྱི་བོར་ཤ་རྨེན་འཇམ་ཞིང་ཤིན་ཏུ་འཇམ་པ་ཞིག་སྐྱེས་པ་དཔེར་ན་ཤིང་བལ་གྱི་འདའ་བ་འམ། རས་བལ་གྱི་འདའ་བ་ལྟ་བུར་གནོད་པ་ཅུང་ཟད་ཀྱང་མི་སྐྱེད་དོ།