Degé Kangyur volume 1, F.90.b

རྙེད་ན་ལུས་ཅན་རྣམས་ལ་ནི། །​འབྲས་བུ་དག་ཏུ་འགྱུར་བ་ཉིད། །​དགེ་སློང་དག་སྔོན་བྱུང་བ་བསྐལ་པ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་། ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་གདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འོད་སྲུང་འཇིག་རྟེན་དུ་བྱུང་སྟེ། དེ་དགེ་སློང་གི་འཁོར་ཉི་ཁྲི་དང་བཱ་རཱ་ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་ཉེ་བར་རྟེན་ཅིང་བཞུགས་སོ། །​བཱ་རཱ་ཎ་སཱི་ན་ཁྱིམ་བདག་ཕན་ཚུན་བཤེས་པ་གཉིས་ཤིག་གཞོན་ནུའི་གནས་སྐབས་སུ་རབ་ཏུ་འབྱུང་བར་འདོད་ན་དེ་གཉིས་ཀྱིས་ཉེ་དུ་དག་ལས་རབ་ཏུ་འབྱུང་བ་མ་ཐོབ་ནས། གང་གི་ཚེ་ལང་ཚོ་ཡོལ་བར་གྱུར་པ་དེའི་ཚེ་ན་དེ་གཉིས་ཀྱིས་ཉེ་དུ་དག་ལ་བལྟས་ཏེ་ཡང་དག་པར་རྫོགས་པའི་སངས་རྒྱས་འོད་སྲུང་གི་བསྟན་པ་ལ་རབ་ཏུ་བྱུང་ངོ་། །​འདི་ནི་ཆོས་ཉིད་དེ་རྟག་ཏུ་གཞོན་རིམ་གྱིས་ལས་བྱ་བ་ཡིན་པས་དགེ་སློང་རྣམས་ཀྱིས་རྒན་ཞུགས་འདི་གཉིས་དེང་ཤིག །​རྒན་ཞུགས་འདི་གཉིས་ཁྱེད་ཅིག་ཅེས་བསྒོའོ། །​དེ་ན་གཅིག་ནི་སྤྲོ་རིང་བའི་རང་བཞིན་ཅན་ཡིན། ཅིག་ཤོས་ནི་སྤྲོ་ཐུང་བའི་རང་བཞིན་ཅན་ཡིན་པས་དེ་ཁྲོ་བར་བྱེད་པ་དང་ཅིག་ཤོས་ཀྱིས་སྨྲས་པ། རྒན་ཞུགས་གཞོན་པའི་གནས་སྐབས་སུ་རབ་ཏུ་མ་བྱུང་ན་ད་ཅིའི་ཕྱིར་ཁྲོ། དེ་ན་འདི་གཉིས་ཀྱི་ཚེ་ཇི་སྲིད་བར་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས་འགའ་ཡང་མ་ཐོབ་ནས་དེའི་འོག་ཏུ་འཆི་བའི་ཚེ་སྨོན་ལམ་འདི་སྐད་ཅེས། བདག་ཅག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོན་གནས་བླ་ན་མེད་པ་འོད་སྲུང་ལ་ཚེ་ཇི་སྲིད་བར་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས་འགའ་ཡང་མ་ཐོབ་སྟེ། བདག་ཅག་གིས་ཚེ་ཇི་སྲིད་བར་ཚངས་པར་སྤྱོད་པ་སྤྱད་པའི་དགེ་བའི་རྩ་བ་འདིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་བྲམ་ཟེའི་ཁྱེའུ་བླ་མ་ལ་བྲམ་ཟེའི་ཁྱེའུ་ཁྱོད་མ་འོངས་པའི་དུས་ན་སྐྱེ་དགུའི་ཚེ་ལོ་བརྒྱ་



The English translation of this folio by 84000 Translating the words of the Buddha can be found at:
https://read.84000.co/translation/toh1-1.html?part=UT22084-001-001-29219#UT22084-001-001-29219