Degé Kangyur volume 1, F.6.b

ཨང་གའི་རྒྱལ་པོ་ཇི་ལྟར་བསད་པ་ཐོས་ནས་དེས་སྒོ་བཅད་དེ་ར་བ་དག་གི་ཁར་སྦྲེངས་ནས་འདུག་གོ། །​གཞོན་ནུ་གཟུགས་ཅན་སྙིང་པོ་ཡང་མཐར་གྱིས་གྲོང་ཁྱེར་ཙམ་པར་ཕྱིན་ནས་དེས་ཤིང་རིང་པོ་ལ་ཨང་གའི་རྒྱལ་པོའི་མགོ་བཏགས་ཏེ་བསྟན་ནས་སྨྲས་པ། ངས་ཁྱོད་ཀྱི་ཇོ་བོ་གང་ཡིན་པ་དེ་གནས་སྐབས་འདི་ལྟ་བུར་བྱས་ཀྱིས། གལ་ཏེ་ཇེ་ཕྱིར་འབྱུང་ན་དེ་ལྟ་ན་ལེགས། གལ་ཏེ་ཕྱིར་མི་འབྱུང་ན་ཁྱོད་ཀྱང་གནས་སྐབས་འདི་ལྟ་བུར་བྱས་པར་འགྱུར་བ་གང་ཡིན་པ་དེ་ལྟ་བུའི་གནས་ཡོད་པར་འགྱུར་རོ། །​དེས་ཐོས་ནས་མི་བདེ་བར་གྱུར་ཏེ། དེས་བསམས་པ། ཡུལ་དང་སྲོག་ལ་གནོད་གྱུར་ན། །​སྐྱེས་བུས་ཀུན་དུ་སྲོག་བསྲུང་བྱ། །​བློ་ཡིས་གཉིས་ཀ་དཔྱད་བྱས་ན། །​ཡུལ་ནི་ཡང་རྙེད་སྲོག་རྣམས་མིན། །​སྙམ་ནས་དེ་རལ་གྲི་མགུལ་དུ་ཐོགས་ཏེ་ཕྱིར་བྱུང་ངོ་། །​དེ་ན་གཞོན་ནུ་གཟུགས་ཅན་སྙིང་པོས་ཨང་གའི་རྒྱལ་པོ་བསད་དེ་གྲོང་ཁྱེར་ཙམ་པ་རང་གི་ལག་ཏུ་ཐོབ་ནས་དེས་རྒྱལ་པོ་པད་མ་ཆེན་པོ་ལ་ལྷ་བདག་གིས་ཨང་གའི་རྒྱལ་པོ་བཀུམ་སྟེ་གྲོང་ཁྱེར་ཙམ་པ་རང་གི་སུག་པར་ཐོབ་ལགས་ན། ལྷ་ཡོངས་སུ་མ་གྲུབ་པ་གཞན་ཅི་མཆིས་བཀའ་སྩོལ་ཅིག་དང་ཡོངས་སུ་བསྒྲུབ་པར་བགྱིའོ་ཞེས་ཕྲིན་ཡིག་སྤྲིང་ངོ་། །​དེ་མགུ་ནས་དེས་དེ་ལ་གདུགས་དང་། ཅོད་པན་དང་། ཐོད་བསྐུར་ཏེ། བུ་ཁྱོད་ཀྱིས་འོ་ནི་ཉིད་དུ་རྒྱལ་སྲིད་བྱེད་དུ་ཆུག་ཤིག །​ངས་ཀྱང་འདི་ཉིད་དུ་རྒྱལ་སྲིད་བྱེད་དུ་གཞུག་གོ་ཞེས་སྤྲིང་ངོ་། །​དེ་ནས་གཞོན་ནུ་གཟུགས་ཅན་སྙིང་པོས་ཡུལ་ཨང་ག་དག་ཏུ་རྒྱལ་སྲིད་འབྱོར་པ་རྒྱས་པ་བདེ་བ་ལོ་ལེགས་པ་སྐྱེ་བོ་དང་མི་མང་པོས་གང་བ་བྱེད་དུ་བཅུག་གོ། །​དུས་གཞན་ཞིག་ན་རྒྱལ་པོ་པད་མ་ཆེན་པོ་དུས་ལ་བབ་ནས་རྒྱལ་པོའི་ཁབ་ཀྱི་བློན་པོ་རྣམས་ཀྱིས་རྒྱལ་པོ་གཟུགས་ཅན་སྙིང་པོ་ལ་ལྷ་ཁྱོད་ཀྱི་ཡབ་དུས་ལ་བབ་པོ་ཞེས་སྤྲིང་ནས། དེ་ཨང་ག་དང་མ་ག་དྷཱ་པའི་བློན་པོ་རྣམས་ཀྱིས་རྒྱལ་སྲིད་ལ་དབང་བསྐུར་བ་ཆེན་པོས་དབང་བསྐུར་ཏོ། །​དེ་ནས་རྒྱལ་པོ་གཟུགས་ཅན་སྙིང་པོས་ཡུལ་ཨང་ག་དང་མ་ག་དྷཱ་དག་ཏུ་རྒྱལ་སྲིད་འབྱོར་པ། རྒྱས་པ། བདེ་བ། ལོ་ལེགས་པ། སྐྱེ་བོ་དང་མི་མང་པོས་གང་བ། ཐབ་མོ་དང་། ཐ་



The English translation of this folio by 84000 Translating the words of the Buddha can be found at:
https://read.84000.co/translation/toh1-1.html?part=UT22084-001-001-29051#UT22084-001-001-29051