དེ་ནི་སྒོ་ཡང་ཡིན། དེ་ནི་དཀར་བ་ཡང་ཡིན། དེ་ནི་རྒྱུན་ཀྱང་ཡིན། དེ་ནི་མཚོ་ཡང་ཡིན། དེ་ནི་རྒྱ་མཚོ་ཡང་ཡིན། དེ་ནི་ཀློང་ཡང་ཡིན། དེ་ནི་སྣང་བ་ཡང་ཡིན། དེ་ནི་ཆུ་འབྱུང་ཡང་ཡིན། དེ་ནི་ཁྲིད་བྱེད་ཀྱང་ཡིན། དེ་ནི་འདྲེན་བྱེད་ཀྱང་ཡིན། དེ་ནི་གཞི་ཡང་ཡིན། དེ་ནི་སྦུབས་ཀྱང་ཡིན། དེ་ནི་གསང་བ་ཡང་ཡིན། དེ་ནི་ཞིང་ཡང་ཡིན། དེ་ནི་ཕ་རོལ་གྱི་འགྲམ་མ་ཡིན་པ་ཡང་ཡིན། དེ་ནི་བདུད་ཀྱི་སྣོད་ཀྱང་ཡིན། དེ་ནི་བདག་གི་དངོས་པོར་འཇུག་པ་ཡང་ཡིན། དེ་ནི་གྲོང་སྟོང་པར་འཇུག་པ་ཡང་ཡིན། དེ་ནི་མངོན་པར་ཤེས་པར་བྱ་བ་ཡང་ཡིན། དེ་ནི་ཡོངས་སུ་ཤེས་པར་བྱ་བ་ཡང་ཡིན། དེ་ནི་སྤང་བར་བྱ་བ་ཡང་ཡིན་ཏེ། འདི་ནི་མིག་གི་ཁམས་ཞེས་བྱའོ། །དེ་ལ་ཤེས་པ་དང་། མཐོང་བ་དང་། གསལ་བ་དང་། མངོན་པར་རྟོགས་པ་དང་། ཡང་དག་པར་ཁོང་དུ་ཆུད་པ་དང་། མཁས་པ་གང་ཡིན་པ་འདི་ནི་མིག་གི་ཁམས་ཤེས་པ་ཞེས་བྱ་སྟེ། དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་མིག་གི་ཁམས་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པའི་བར་དག་ཏུ་ལན་གསུང་སྟེ། དེའི་སྤོབས་པ་ཟད་མི་ཤེས་སོ། །ཁྱིམ་བདག་དེ་ཅིའི་ཕྱིར་ཞེ་ན། འདི་ལྟར་དེ་བཞིན་གཤེགས་པས་ཆོས་ཀྱི་དབྱིངས་བླ་ན་མེད་པ་མཁྱེན་རབ་ཀྱིས་ཤིན་ཏུ་ཐུགས་སུ་ཆུད་པར་མཛད་ཅིང་། གང་ཐུགས་སུ་ཆུད་པའི་དེ་བཞིན་གཤེགས་པ་མིག་གི་ཁམས་ཤེས་པ་དེ་ལ་ཡང་ཞུ་བ་ཞུས་པ་ན། སྤོབས་པ་ཟད་མི་ཤེས་སོ། །ཁྱིམ་བདག་དེ་ལྟ་བས་ན། འདིར་གང་གི་ཡེ་ཤེས་མཐོང་བ་ཐོགས་པ་མེད་པ་འཇུག་པ་དེ་ནི། ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་མིག་གི་ཁམས་ཤེས་པ་ཀུན་འབྱུང་བ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་འདི་ལྟར་རབ་ཏུ་མཁྱེན་ཏེ། སངས་རྒྱས་བཅོམ་ལྡན་འདས་དཔག་ཏུ་མེད་པ་རྣམས་ལ་དགེ་བའི་རྩ་བ་བསྐྱེད་ནས། མིག་གི་ཁམས་ཤེས་པ་ཀུན་འབྱུང་བ་ཤེས་པ་ཡང་དག་པར་འགྲུབ་པ་དེ། དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ།