ཁྱིམ་བདག་འདི་ལ་དེ་བཞིན་གཤེགས་པས་གཞན་ལས་མ་གསན་པར་ཆོས་ཐམས་ཅད་བདག་ཉིད་ཀྱིས་མངོན་པར་རྫོགས་པར་སངས་རྒྱས་ཏེ། དེ་ལ་དེ་བཞིན་གཤེགས་པ་ཡང་དག་པར་རྣམ་པར་རྟོགས་པ་ལ་མཁས་པས་ཆོས་ཉན་པ་པོའི་དབང་གིས་དུས་དང་དུས་མ་ཡིན་པ་ལ་མཁས། སེམས་ཅན་དག་གི་བསམ་པ་ལ་མཁས་པས་དུས་ལས་མི་འདའ་བ་ལ་མཁས། ཡོངས་སུ་སྨིན་པར་བྱ་བ་ལ་མཁས་པས་སྣོད་ལ་མཁས། ཆོས་སྟོན་པས་ཆོས་ཉན་པ་པོ་དག་གི་ཐབས་དང་། ཆོས་ཡང་དག་པར་ཐོབ་པར་བྱ་བ་ལ་མཁས་པ་སྟེ། དེ་ལྟར་ན་དེ་བཞིན་གཤེགས་པས་ཐམས་ཅད་མཁྱེན་པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཁྱིམ་བདག་གཞན་ཡང་དེ་བཞིན་གཤེགས་པས་སེམས་ཅན་ཐམས་ཅད་ཀྱི་དབང་པོ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། སེམས་ཅན་འདི་དག་ནི་འདོད་ཆགས་ཀྱི་བསམ་པ་ཅན་ནོ། །སེམས་ཅན་འདི་དག་ནི་ཞེ་སྡང་གི་བསམ་པ་ཅན་ནོ། །སེམས་ཅན་འདི་དག་ནི་གཏི་མུག་གི་བསམ་པ་ཅན་ནོ། །སེམས་ཅན་འདི་དག་ནི་འདོད་ཆགས་དང་ཞེ་སྡང་གི་བསམ་པ་ཅན་ནོ། །སེམས་ཅན་འདི་དག་ནི་འདོད་ཆགས་དང་གཏི་མུག་གི་བསམ་པ་ཅན་ནོ། །སེམས་ཅན་འདི་དག་ནི་ཞེ་སྡང་དང་གཏི་མུག་གི་བསམ་པ་ཅན་ནོ། །སེམས་ཅན་འདི་དག་ནི་གཏི་མུག་དང་འདོད་ཆགས་ཀྱི་བསམ་པ་ཅན་ནོ། །སེམས་ཅན་འདི་དག་ནི་གཏི་མུག་དང་ཞེ་སྡང་གི་བསམ་པ་ཅན་ནོ། །སེམས་ཅན་འདི་དག་ནི་འདོད་ཆགས་དང་ཞེ་སྡང་དང་གཏི་མུག་གི་བསམ་པ་ཅན་ནོ། །སེམས་ཅན་འདི་དག་ནི་བསམ་པ་དགེ་ལ་སྦྱོར་བ་གནག་གོ། །སེམས་ཅན་འདི་དག་ནི་བསམ་པ་གནག་ལ་སྦྱོར་བ་དགེ་བའོ། །སེམས་ཅན་འདི་དག་ནི་བསམ་པ་གནག་ལ་སྦྱོར་བ་ཡང་གནག་པའོ། །སེམས་ཅན་འདི་དག་ནི་བསམ་པ་དགེ་ལ་སྦྱོར་བ་ཡང་དགེའོ། །སེམས་ཅན་འདི་དག་ནི་ཟང་ཟིང་ལ་གདུ་བའོ། །སེམས་ཅན་འདི་དག་ནི་ཆོས་ལ་གདུ་ལ་ཟང་ཟིང་ལ་མི་གདུ་བའོ། །གང་ཟག་འདིས་ནི་དགེ་བའི་རྩ་བ་འདི་ལྟ་བུ་ཞིག་མངོན་པར་འདུས་བྱས། སེམས་ཅན་འདི་དག་གིས་ནི་དགེ་བའི་རྩ་བ་འདི་ལྟ་བུ་ཞིག་མངོན་པར་འདུས་བྱས། གང་ཟག་འདི་ནི་ལམ་འདི་ལྟ་བུ་ཞིག་གིས་ཀུན་ནས་ཉོན་མོངས་པར་འགྱུར། གང་ཟག་འདི་ནི་ལམ་འདི་ལྟ་བུ་ཞིག་གིས་རྣམ་པར་དག་པར་འགྱུར། གང་ཟག་འདི་ནི་བྱམས་པ་འདི་ལྟ་བུ་ཞིག་གིས་ཀུན་ནས་ཉོན་མོངས་པར་འགྱུར།