སེམས་ལས་བྱུང་བའི་བརྩོན་འགྲུས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། དེ་ཡང་མཁྱེན་པ་གང་གིས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅིང་། ཟག་པ་མེད་པའི་མཁྱེན་པ་དང་། འཇིག་རྟེན་ལས་འདས་པའི་མཁྱེན་པས་རབ་ཏུ་མཁྱེན་ཏེ། བརྩོན་འགྲུས་འདི་ནི་རྒྱུན་དུ་འཇུག་པའི་འབྲས་བུ་ལ་གནས་པར་འགྱུར། བརྩོན་འགྲུས་འདི་ནི་ལན་ཅིག་ཕྱིར་འོང་བའི་འབྲས་བུ་ལ་གནས་པར་འགྱུར། བརྩོན་འགྲུས་འདི་ནི་ཕྱིར་མི་འོང་བའི་འབྲས་བུ་ལ་གནས་པར་འགྱུར། བརྩོན་འགྲུས་འདི་ནི་དགྲ་བཅོམ་པ་ལ་གནས་པར་འགྱུར། བརྩོན་འགྲུས་འདི་ནི་རང་སངས་རྒྱས་ལ་གནས་པར་འགྱུར་རོ། །ཞེས་ཁྱིམ་བདག་དེ་ལྟར་ན་དེ་བཞིན་གཤེགས་པས་བརྩོན་འགྲུས་ཀྱི་དབང་པོ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་བརྩོན་འགྲུས་ཀྱི་དབང་པོ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་བཞིན་དུ་སྦྱར་ཏེ་དེ་ནི་ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་བརྩོན་འགྲུས་ཀྱི་དབང་པོ་ཤེས་པ་ཀུན་འབྱུང་བ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་རྒྱུ་གང་དང་རྐྱེན་གང་དག་གིས་བརྩོན་འགྲུས་ཀྱི་དབང་པོ་སྐྱེ་བར་འགྱུར་བ། གལ་ཏེ་དགེ་བའི་བཤེས་གཉེན་ལ་བརྟེན་པའམ། གལ་ཏེ་མལ་སྟན་ལ་གནས་པའམ། གལ་ཏེ་ཡུལ་ལ་གནས་པའི་རྒྱུ་དེ་དང་རྐྱེན་དེ་དག་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་བརྩོན་འགྲུས་ཀྱི་དབང་པོ་ཤེས་པ་ཀུན་འབྱུང་བ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་ནི་ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་བརྩོན་འགྲུས་ཀྱི་དབང་པོ་ཤེས་པ་འགོག་པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་འདི་ལྟར་རབ་ཏུ་མཁྱེན་ཏེ། རྒྱུ་གང་དང་རྐྱེན་གང་དག་གིས་བརྩོན་འགྲུས་ཀྱི་དབང་པོ་སྐྱེས་ཏེ། རྒྱུ་དེ་དག་འགོག་པ་ལས་བརྩོན་འགྲུས་ཀྱི་འགོག་པ་རབ་ཏུ་མཁྱེན་ཏོ། །དེ་བཞིན་གཤེགས་པ་བརྩོན་འགྲུས་ཀྱི་དབང་པོ་ཤེས་པ་འགོག་པ་ཤེས་པ་དེ་ལ་ཡང་ཞུ་བ་ཞུས་པ་ན།