།དེ་བཞིན་གཤེགས་པ་འདུས་མ་བྱས་ཀྱི་ཁམས་ཤེས་པ་འགོག་པར་འགྱུར་བའི་ལམ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པའི་བར་དག་ཏུ་ལན་གསུང་སྟེ། དེའི་སྤོབས་པ་ཟད་མི་ཤེས་སོ། །ཁྱིམ་བདག་དེ་ཅིའི་ཕྱིར་ཞེ་ན། འདི་ལྟར་དེ་བཞིན་གཤེགས་པས་ཆོས་ཀྱི་དབྱིངས་བླ་ན་མེད་པ་མཁྱེན་རབ་ཀྱིས་ཤིན་ཏུ་ཐུགས་སུ་ཆུད་དེ། གང་ཐུགས་སུ་ཆུད་པའི་དེ་བཞིན་གཤེགས་པ་འདུས་མ་བྱས་ཀྱི་ཁམས་ཤེས་པ་འགོག་པར་འགྱུར་བའི་ལམ་ཤེས་པ་དེ་ལ་ཡང་ཞུ་བ་ཞུས་པ་ན་སྤོབས་པ་ཟད་མི་ཤེས་སོ། །དེ་ལྟ་བས་ན་འདིར་གང་གིས་ཡེ་ཤེས་མཐོང་བ་ཐོགས་པ་མེད་པར་འཇུག་པ་དེ་ནི་ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་འཇིག་རྟེན་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཉི་མ་དང་ཟླ་བ་ཡོངས་སུ་རྒྱུ་བས་ཕྱོགས་གསལ་ཞིང་སྣང་བར་བྱེད་པའི་ཟླ་བ་སྟོང་དང་། ཉི་མ་སྟོང་དང་། འཛམ་བུའི་གླིང་སྟོང་དང་། གླིང་ཆེན་པོ་དང་། ཤར་གྱི་ལུས་འཕགས་སྟོང་དང་། བྱང་གི་སྒྲ་མི་སྙན་སྟོང་དང་། ནུབ་ཀྱི་བ་ལང་སྤྱོད་སྟོང་དང་། རྒྱལ་ཆེན་བཞིའི་རིས་སྟོང་དང་། སུམ་ཅུ་རྩ་གསུམ་གྱི་གནས་སྟོང་དང་། འཐབ་བྲལ་གྱི་གནས་སྟོང་དང་། དགའ་ལྡན་གྱི་གནས་སྟོང་དང་། འཕྲུལ་དགའི་གནས་སྟོང་དང་། གཞན་འཕྲུལ་དབང་བྱེད་ཀྱི་གནས་སྟོང་དང་། ཚངས་པའི་འཇིག་རྟེན་སྟོང་ཇི་སྙེད་པ་འདི་ནི་སྟོང་སྤྱི་ཕུད་དང་། ཆུང་ངུ་དང་། ཐ་མའི་འཇིག་རྟེན་གྱི་ཁམས་ཞེས་བྱ་སྟེ། ཚུལ་དེ་ལྟ་བུའི་སྤྱི་ཕུད་ཀྱི་འཇིག་རྟེན་གྱི་ཁམས་སྟོང་གང་ཡིན་པ་འདི་ནི་སྟོང་གཉིས་པ་བར་མའི་འཇིག་རྟེན་གྱི་ཁམས་ཞེས་བྱའོ། །ཚུལ་དེ་ལྟ་བུའི་སྟོང་གཉིས་པ་བར་མའི་འཇིག་རྟེན་གྱི་ཁམས་སྟོང་གང་ཡིན་པ་འདི་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཞེས་བྱ་སྟེ། འདྲ་བར་འཇིག །འདྲ་བར་འཆགས། འདྲ་བར་ཞིག་ནས་གནས། འདྲ་བར་ཆགས་ནས་གནས་སོ། །ཚུལ་དེ་ལྟ་བུའི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཤར་ཕྱོགས་སུ་འཇིག་རྟེན་གྱི་ཁམས་གཞན་དག་ནི་འཇིག །གཞན་དག་ནི་འཆགས། གཞན་དག་ཞིག་ནས་གནས། གཞན་དག་ཆགས་ནས་གནས་ཏེ། ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། ཤར་ལྷོ་དང་།