Degé Kangyur volume 47, F.80.b

མཁྱེན་ཏོ། །​དེ་བཞིན་གཤེགས་པ་ཏིང་ངེ་འཛིན་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། ལོངས་སྤྱོད་པའི་བར་དུ་འགྱུར་རོ། །​ཀུན་འབྱུང་བ་དང་། འགོག་པ་དང་། ལམ་ཡང་ཇི་སྐད་བསྟན་པ་བཞིན་ནོ། །​ཁྱིམ་བདག་ཇི་ལྟར་ན་དེ་བཞིན་གཤེགས་པས་སྙོམས་པར་འཇུག་པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་བསམ་གཏན་ལ་མངོན་པར་གནས་པ་དང་། དོན་རྟོགས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། གང་དག་བསམ་གཏན་དང་པོ་ལ་བརྟེན་ནས། ཟག་པ་ཟད་ཅིང་དོན་རྟོགས་པའི་སྙོམས་པར་འཇུག་པ་དང་། བསམ་གཏན་དང་པོ་ལ་བརྟེན་ནས་མི་རྟག་པ་ཡིད་ལ་བྱེད་པའི་སྙོམས་པར་འཇུག་པ་དང་། བསམ་གཏན་དང་པོ་ལ་བརྟེན་ནས་སྡུག་བསྔལ་ཡིད་ལ་བྱེད་པའི་སྙོམས་པར་འཇུག་པ་ནས། དེ་བཞིན་དུ་སྦྱར་ཏེ། ཕྱིར་རྒོལ་བ་ཡིད་ལ་བྱེད་པའི་བར་གྱི་སྙོམས་པར་འཇུག་པ་དང་། བསམ་གཏན་དང་པོ་ལ་བརྟེན་ནས། མཚན་མ་དང་བྲལ་བའི་སྙོམས་པར་འཇུག་པ་དང་། བསམ་གཏན་དང་པོ་ལ་བརྟེན་ནས། བདག་མེད་པ་དང་བྲལ་བའི་སྙོམས་པར་འཇུག་པ་དང་། བསམ་གཏན་དང་པོ་ལ་བརྟེན་ནས་སྨོན་ལམ་དང་བྲལ་བའི་སྙོམས་པར་འཇུག་པ་དང་། བསམ་གཏན་དང་པོ་ལ་བརྟེན་ནས། རྒྱུན་ཏུ་འཇུག་པའི་འབྲས་བུ་མངོན་སུམ་དུ་བྱ་བའི་སྙོམས་པར་འཇུག་པ་དང་། བསམ་གཏན་དང་པོ་ལ་བརྟེན་ནས། དགྲ་བཅོམ་པའི་འབྲས་བུ་མངོན་སུམ་དུ་བྱ་བའི་བར་ལ་སྙོམས་པར་འཇུག་པ་སྟེ། དེ་བཞིན་དུ་བསམ་གཏན་གཉིས་པ་ལ་བརྟེན་པ་ནས། བསམ་གཏན་བཞི་པ་ལ་བརྟེན་པ་དང་། འདུ་ཤེས་མེད་པའི་སྙོམས་པར་འཇུག་པ་དང་། ནམ་མཁའ་མཐའ་ཡས་སྐྱེ་མཆེད་ལ་སྙོམས་པར་འཇུག་པ་དང་། རྣམ་ཤེས་མཐའ་ཡས་སྐྱེ་མཆེད་ལ་སྙོམས་པར་འཇུག་པ་དང་། ཅུང་ཟད་མེད་པའི་སྐྱེ་མཆེད་ལ་སྙོམས་པར་འཇུག་པ་དང་། འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལ་སྙོམས་པར་འཇུག་པ་དང་། འདུ་ཤེས་དང་ཚོར་བ་འགོག་པའི་སྙོམས་པར་འཇུག་པའི་བར་ལ་ཡང་རྒྱ་ཆེར་བྱ་སྟེ། དེ་དེ་བཞིན་གཤེགས་པས་ཡང་དག་



The English translation of this folio by 84000 Translating the words of the Buddha can be found at:
https://read.84000.co/translation/toh99.html?part=UT22084-047-001-2710#UT22084-047-001-2710