མགུ་ཞིང་དགའ་ལ་ཡི་རངས་ཏེ། རབ་ཏུ་དགའ་ཞིང་བདེ་བ་དང་ཡིད་བདེ་བ་སྐྱེས་ནས། བུ་མོ་ཡུལ་གྱི་བཟང་མོ་དེ་བྲམ་ཟེ་དེ་ལ་བྱིན་ནོ། །དེ་ནས་བྲམ་ཟེ་དེས་བུ་མོ་དེ་བླངས་ནས་སོང་སྟེ། བུ་བསྐྱེད་ནས་ཆུང་མ་དང་བུ་བཞག་སྟེ། ཡང་རབ་ཏུ་བྱུང་ངོ་། །རྒྱལ་པོ་དེས་བྲམ་ཟེ་དེའི་བསམ་པ་ཡོངས་སུ་རྫོགས་པར་བྱས་པའི་དགེ་བའི་རྩ་བ་དེས་གཞན་འཕྲུལ་དབང་བྱེད་ཀྱི་ལྷ་རྣམས་དང་བརྟུལ་ཞུགས་འདྲ་བར་སྐྱེས་ཏེ། དེ་འདོད་པ་ན་སྤྱོད་པའི་ལྷའི་རིས་དྲུག་གི་ཚེའི་ཚད་ཡོངས་སུ་རྫོགས་པར་བྱས་ནས། མིར་སྐྱེས་པ་ན་ཕྱིར་མི་འཕྲོགས་པའི་ཆོས་ཐམས་ཅད་ཐོབ་བོ། །མཽད་གལ་གྱི་བུ་དེའི་ཚེ་དེའི་དུས་ན། རྒྱལ་པོ་དཔལ་གྱི་སྙིང་པོ་ཞེས་བྱ་བ་དེ་གཞན་མ་ཡིན་ཏེ། ང་དེའི་ཚེ་དེའི་དུས་ན་རྒྱལ་པོ་དཔལ་གྱི་སྙིང་པོ་ཞེས་བྱ་བར་གྱུར་ཏོ། །དགེ་བའི་རྩ་བ་དེས་ང་གནས་མ་ཡིན་པ་ཤེས་པ་ཐོབ་ཅིང་བདུད་ཀྱི་ཞགས་པ་ཐམས་ཅད་ཀྱིས་ཀྱང་ཕྱིར་མི་འཕྲོགས་སོ། །མཽད་གལ་གྱི་བུ་དེས་ན་ང་བྱང་ཆུབ་སེམས་དཔའི་སྤྱད་པ་སྤྱོད་པ་ན། སེམས་ཅན་དཔག་ཏུ་མེད་པ་དགེ་བའི་རྩ་བ་འདི་ཡང་དག་པར་འཛིན་དུ་བཅུག་པའི་དགེ་བའི་རྩ་བ་དེས། ང་གནས་མ་ཡིན་པ་ཤེས་པ་ཀུན་འབྱུང་བ་ཤེས་པ་ཐོབ་ཅིང་། དགེ་བའི་རྩ་བ་འདིའི་རྣམ་པར་སྨིན་པ་ལ་ཐེ་ཙོམ་མེད་དེ། དེའི་ལས་ཀྱི་རྣམ་པར་སྨིན་པས་ང་གནས་མ་ཡིན་པ་ཤེས་པ་འགོག་པ་ཤེས་པ་ཐུགས་སུ་ཆུད་པ། མཚན་དང་དཔེ་བྱད་ཕུན་སུམ་ཚོགས་པའང་བརྙེས་སོ། །ངས་གང་གི་ཚེ་དགེ་བའི་རྩ་བ་འདི་དག་མངོན་པར་འདུས་བྱས་ཏེ། སེམས་ཅན་རྣམས་དགེ་བའི་རྩ་བ་འདི་ལ་བཅུག་པ་དེས་ང་རབ་ཏུ་དགའ་བ་གཞལ་དུ་མེད་པ་སྐྱེས་ཏེ། དགེ་བའི་རྩ་བ་དེས་ང་གནས་མ་ཡིན་པ་ཤེས་པ་འགོག་པར་འགྱུར་བའི་ལམ་ཤེས་པ་ཐོབ་སྟེ། ཤེས་པ་གང་དང་ལྡན་པས་བདག་དང་སེམས་ཅན་རྣམས་ཀྱི་གནས་མ་ཡིན་པ་ཤེས་པ་འགོག་པར་འགྱུར་བའི་ལམ་ཤེས་པ་སོ་སོར་ཤེས་སོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །གནས་མ་ཡིན་པ་ཤེས་པ་རྒྱུར་བཅས་དང་། །དེ་བཞིན་འགོག་དང་ལམ་དང་སེམས་ཅན་གྱི། །སྤྱོད་དང་བསམ་པ་ངེས་པར་དེ་ཡི་མཐུས། །ངས་ནི་བརྟག་དང་སྤྱོད་པ་ཀུན་ཏུ་ཤེས། །མཽད་གལ་གྱི་བུ་དེ་ལ་དེ་བཞིན་གཤེགས་པ་ཡུན་རིང་དུ་བྱང་ཆུབ་སེམས་དཔའི་སྤྱད་པ་སྤྱོད་པ་ན་རྟག་པར་རབ་ཏུ་དྲན་པ་ཉེ་བར་གཞག་པར་གྱུར་ཏེ།