བླ་མེད་བྱང་ཆུབ་བྱང་ཆུབ་སེམས་འཐོབ་པ། །ཡོན་ཏན་དཔག་མེད་ཡེ་ཤེས་མཆོག་མངའ་བའི། །དྲང་སྲོང་ཆེན་པོས་སྲས་ཞུས་ལུང་བསྟན་པ། །བྱང་ཆུབ་དོན་དུ་ང་ཡིས་སྔོན་སྤྱད་པ། །ཇི་ལྟར་འགྲོ་བ་རྣམས་སུ་སྟོབས་བརྩོན་བསྟེན། །བརྩོན་འགྲུས་སྟོབས་ཀྱི་བྱང་ཆུབ་ངས་བརྙེས་པ། །དེ་ནི་ང་ཡིས་ཅུང་ཟད་བཤད་པར་བྱ། །འདས་པའི་དུས་སུ་མི་བདག་བྱུང་བ་ནི། །མི་ཡི་དབང་ཕྱུག་མི་དབང་སྟོབས་འཆང་ཞེས། །རིན་ཆེན་བདུན་ཡོད་བུ་དང་ལྡན་པ་སྟེ། །བདག་ལས་སྐྱེས་པ་ཁྲི་ཕྲག་བརྒྱ་དག་བྱུང་། །དེ་ཚེ་འཇིག་རྟེན་ཁམས་འདི་འང་རྒྱས་པ་སྟེ། །རི་བོང་བདག་ཅེས་སངས་རྒྱས་ཞིང་དག་བྱུང་། །དེར་ནི་མི་མཆོག་རང་བྱུང་བྱུང་གྱུར་པ། །རིན་ཆེན་དཔལ་ཞེས་འཇིག་རྟེན་སྒྲ་རྣམས་གྲགས། །མི་མཆོག་དེ་ཡིས་ཉན་ཐོས་དགེ་འདུན་ནི། །ས་ཡ་ཕྲག་ནི་བརྒྱད་ཅུ་དག་བྱུང་ངོ་། །བདེ་གཤེགས་མཆོག་གི་རྗེས་སྐྱེས་སྲས་ཚོགས་ནི། །ཉོན་མོངས་ཁྲོ་དང་ང་རྒྱལ་འཆབ་བྲལ་བའི། །དེ་ཚེ་མི་མཆོག་དེ་ཡི་བྱང་ཆུབ་སེམས། །ས་ཡ་ཕྲག་ནི་བརྒྱད་ཅུ་དག་བྱུང་སྟེ། །རྒྱལ་བ་དཔག་མེད་དག་ལ་སྤྱད་ལྡན་ཞིང་། །འགྲོ་ལ་ཕན་ཕྱིར་བྱང་ཆུབ་འཐོབ་འགྱུར་རོ། །དེ་ན་རྣམ་པར་འདྲེན་པ་དེ་ཡི་ནི། །བྱང་ཆུབ་སེམས་དཔའ་བདུད་བསྟེན་ཞེས་བྱ་བྱུང་། །དྲང་སྲོང་ཆེན་པོ་བདུད་སྟོབས་རབ་འཇོམས་པ། །དེ་ཡིས་ཚོགས་ཀྱི་གཙོ་བོ་དེ་བྱེད་དོ། །དེ་ནས་བདུད་སྟོབས་བསྙེན་པར་དཀའ་ཞེས་པ། །ལྷའི་བུ་བྱུང་ནས་འདྲེན་པ་རྒྱལ་བའི་མཆོག །དེ་ནི་བྱང་ཆུབ་མཆོག་ཏུ་གཤེགས་པ་ལ། །ཇི་ལྟར་མི་རེག་བྱ་ཕྱིར་བར་ཆད་བྱེད། །ས་འདི་རྒྱ་མཚོར་བཅས་པ་ཡོན་ཏན་ལྡན། །དེ་དག་བུད་མེད་ཚོགས་ཀྱིས་མངོན་སྤྲུལ་ཏེ། །བཟང་མོ་ཡོན་ཏན་རབ་མཆོག་འཛིན་པས་བཀང་། །དགའ་བའི་ཚིག་དང་ཡིད་འོང་ཚིག་སྨྲ་ཞིང་། །མིག་ནི་བཟང་ལ་འགྲོས་ཀྱང་ལྡེམ་བག་ཅན། །གླང་པོའི་སྣ་ལྟར་ལག་མཉམ་པ་ཡི་མདོག །ཡུན་རིང་དག་ཏུ་བརྟུལ་ཞུགས་འཛིན་པ་སྟེ། །ནུ་མ་སྲ་ལ་ལེགས་དང་ལྡན་པ་ཡིན། །ངག་ཚིག་སྙན་ཅིང་པད་མ་འདྲ་བའི་མིག །སོ་ཡི་ཕྲེང་བ་ཐགས་དམ་འཆང་བ་སྟེ། །བྱི་རུའི་མདོག་ལྟར་མཆུ་ནི་མཛེས་པ་ཡིན། །བཞིན་དང་འགྲམ་པ་དག་ནི་མཛེས་དང་ལྡན། །