།ཡིད་དུ་འོང་བའི་དབྱངས་ཀྱིས་ལུང་བསྟན་པ། །བསྐལ་པ་སྟོང་ཕྲག་བརྒྱད་ཅུར་སྤྱད་བྱས་ནས། །མ་འོངས་པ་ཡིས་དུས་སུ་སངས་རྒྱས་འགྱུར། །བདེ་བའི་ལམ་གྱིས་རྒྱལ་བར་འགྱུར་བ་སྟེ། །མཚན་ནི་ལེགས་མཐོང་ཞེས་བྱ་ཤིན་ཏུ་སྡུག །སྲོག་ཆགས་བྱེ་བ་སྟོང་ཕྲག་ཐར་བྱེད་ཅིང་། །བསིལ་བ་བདེ་བ་ཞི་བའི་ལམ་འགོད་འགྱུར། །རྒྱལ་བས་གསུངས་པ་ཀླུ་དེས་ཐོས་ནས་སུ། །གཞལ་མེད་དགའ་བའི་སེམས་ནི་རབ་དང་བས། །ཉོན་མོངས་ཐམས་ཅད་སེལ་ཅིང་མ་སྨད་པ། །འགྲོ་བའི་འདྲེན་པ་ལ་ནི་ཕྱག་འཚལ་བྱེད། །དེ་ནས་ཀླུའི་རྒྱལ་པོ་ཨུད་པ་ལ་མིག་གིས་བཅོམ་ལྡན་འདས་ལ་ཚིགས་སུ་བཅད་པའི་དབྱངས་ཀྱིས་ཞུ་བ་ཞུས་པ། མི་མཆོག་འདུལ་མཛད་གཟི་བརྗིད་མཐའ་ཡས་པ། །ཐུགས་རབ་ཞི་ཞིང་ཉེར་ཞི་ཕ་རོལ་གཤེགས། །ཞི་གནས་ཡོན་ཏན་རབ་ཞི་རྣམ་གྲོལ་བ། །ཞི་བ་མཁས་པ་བདེ་བར་གཤེགས་པ་གསུང་། །ཁྱོད་སྲས་བྱང་ཆུབ་ཇི་ལྟར་སྤྱད་བགྱིས་ན། །ཞི་གནས་དགའ་ཞིང་ཞི་གནས་བསྟེན་པ་དང་། །ཞི་གནས་ལ་ནི་ཇི་ལྟར་མཁས་པར་འགྱུར། །ཀུན་གཟིགས་མྱུར་དུ་བདག་གི་སོམ་ཉི་ཁུམ། །རྒྱལ་བ་ལ་ནི་ཀླུ་དེས་ཞུས་པ་དང་། །རྒྱལ་བས་ཨུད་པ་ལ་མིག་ལ་ལུང་བསྟན་པ། །གང་གིས་དགེ་བའི་ལས་ཀྱིས་ཡིད་འོང་བའི། །ཞི་གནས་ལ་ནི་ཤིན་ཏུ་བསླབས་པར་འགྱུར། །དེ་ཕྱིར་བྱང་ཆུབ་སེམས་དཔའ་མཁས་པ་ནི། །སྤྱད་པ་སྤྱོད་ཚེ་སེམས་གཡོར་མི་བྱེད་ཅིང་། བསྐལ་པ་བྱེ་བར་ཞི་གནས་བསྟེན་བྱས་པ། །བྱང་ཆུབ་དམ་པ་དཔའ་མཆོག་སངས་རྒྱས་འགྱུར། །དེ་ཡིད་རབ་ཞི་བྱང་ཆུབ་རྟོགས་ནས་སུ། །རྣམ་འདྲེན་འགྲོ་བ་ཞི་ལ་སྦྱོར་བྱེད་ཅིང་། །རབ་ཏུ་སེམས་ཞི་གཡོ་བར་མི་འགྱུར་ལ། །སེམས་ཅན་ཉོན་མོངས་མི་གཡོ་ཞི་བར་བྱེད། །དེས་པ་ཨུད་པ་ལ་མིག་གི་ཀླུ་དེས་ནི། །རྒྱལ་བས་ལེགས་པར་གསུངས་པའི་ཚིག་ཐོས་ནས། །ཉོན་མོངས་ཀུན་གཡོ་ཡིད་ནི་ཞི་གྱུར་ཏེ། །བྱང་ཆུབ་མཆོག་རབ་སེམས་ནི་བསྐྱེད་གྱུར་ཏོ། །དེ་ཡི་ཞི་གནས་སེམས་ལ་བརྟེན་ནས་སུ། །བྱང་ཆུབ་སེམས་བསྐྱེད་རྒྱལ་བ་དེ་ལ་བསྟོད། །ཁྱོད་ལ་བསྐྱེད་ནས་ཞི་གནས་རྟོགས་གྱུར་ཅིང་། །ཤིན་ཏུ་ཡིད་ཞི་སངས་རྒྱས་འགྱུར་བར་བགྱི། །དེ་ནས་ཀླུའི་རྒྱལ་པོ་དགའ་བོས་བཅོམ་ལྡན་འདས་ལ་ཚིགས་སུ་བཅད་པའི་དབྱངས་ཀྱིས་ཞུ་བ་ཞུས་པ།