།དེ་ནས་མི་མཇེད་ཀྱི་བདག་པོ་ཚངས་པ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔ་ནས་མི་སྣང་བར་གྱུར་ནས་སྐད་ཅིག་དེ་ཉིད་ལ་ཚངས་པའི་འཇིག་རྟེན་དུ་ཕྱིན་ཏོ། །དེ་ནས་མི་མཇེད་ཀྱི་བདག་པོ་ཚངས་པས་ལྷའི་བུ་ཚངས་པ་བཟང་པོ་ལ་འདི་སྐད་ཅེས་སྨྲས་སོ། །གྲོགས་པོ་ཁྱོད་སོང་ལ་ཚངས་པའི་འཇིག་རྟེན་འདི་མན་ཆད་སུམ་ཅུ་རྩ་གསུམ་གྱི་གནས་ཡན་ཆད་དུ་སྒྲ་སྒྲོགས་ཏེ། བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་བདག་ཅག་གིས་དེ་བཞིན་གཤེགས་པའི་སྤྱན་སྔར་བཀུར་ན་ཁྱེད་ཀྱི་ནང་ནས་མཐོང་བར་སུ་དགའ་བ་མྱུར་དུ་ཤོག་ཤིག་ཅེས་སྒྲས་གོ་བར་གྱིས་ཤིག །དེ་ནས་མི་མཇེད་ཀྱི་བདག་པོ་ཚངས་པས། ལྷ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་བཞི་དང་ལྷན་ཅིག་ཏུ་བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་བླངས་ཏེ། ཚངས་པའི་གཞལ་མེད་ཁང་ཆེན་པོ་དཔག་ཚད་སུམ་བརྒྱ་པའི་སྟེང་དུ་བཞག་ནས། ལྷ་བྱེ་བ་ཁྲག་ཁྲིག་བརྒྱ་སྟོང་དུ་མས་ཀུན་ནས་བསྐོར་ཏེ། འཛམ་བུའི་གླིང་དུ་ཕབ་བོ། །དེའི་ཚེ་བཅོམ་ལྡན་འདས་ཀྱི་ཞབས་འབྲིང་དུ་འདོད་པ་ན་སྤྱོད་པའི་ལྷའི་བུ་འདུས་པ་ཆེན་པོར་གྱུར་ཏེ། བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་དེ་ཡང་ལྷའི་གོས་དང་། ལྷའི་ཕྲེང་བ་དང་། ལྷའི་སྤོས་དང་། ལྷའི་མེ་ཏོག་དང་། ལྷའི་རོལ་མོའི་དབྱངས་སྒྲ་དང་། ལྷའི་ལོངས་སྤྱོད་རྣམས་ཀྱིས་མངོན་པར་འདུས་བྱས་པར་གྱུར་ཅིང་ལྷ་དབང་ཆེ་བར་གྲགས་པ་དག་གིས་ཡོངས་སུ་བསྐོར་བར་གྱུར་པ་ནི་འདི་ཙམ་སྟེ། ལྷའི་དབང་པོ་བརྒྱ་བྱིན་རྒྱ་མཚོ་ཆེན་པོའི་དབུས་སུ་འདུག་ནས་རྒྱང་རིང་པོ་ནས་གདོང་ཐལ་མོས་བསྐྱབས་ཏེ་མགོ་བྱོལ་ནས་བལྟས་ཀྱང་མཐོང་བར་མི་ནུས་སོ། །དེ་ཅིའི་ཕྱིར་ཞེ་ན། ལྷའི་ནང་ན་ཚངས་པ་དག་ནི་མཐུ་ཆེ་བ་སྟེ། སུམ་ཅུ་རྩ་གསུམ་དང་། འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་ཀྱི་ལྷ་དག་ཀྱང་དེ་དག་གི་དྲུང་ན་དམའ་བ་ཡིན་ན། ལྷའི་དབང་པོ་བརྒྱ་བྱིན་ལྟ་སྨོས་ཀྱང་ཅི་དགོས། དེ་ནས་བཅོམ་ལྡན་འདས་ཀྱིས་དེའི་ཚེ། ལྷའི་རོལ་མོ་དབྱངས་སྒྲའི་སྒྲ་དེ་དག་ཞི་བར་མཛད་དོ། །དེ་ཅིའི་ཕྱིར་ཞེ་ན། དེ་ཐོས་པ་ཙམ་གྱིས་འཛམ་བུའི་གླིང་གི་མི་རྣམས་མྱོ་མྱོ་པོར་འགྱུར་དུ་འོང་བའི་ཕྱིར་རོ།