།དེ་ནས་བྱང་ཆུབ་སེམས་དཔས་ལྷ་ཁང་དེར་རྐང་པ་གཡས་པའི་མཐིལ་བཞག་པ་དང་། །དེ་ནས་ལྷའི་གཟུགས་སེམས་མེད་པ་དེ་དག་འདི་ལྟ་སྟེ། གུ་ལང་དང་། སྐེམ་བྱེད་དང་། ལུས་ངན་དང་། ཟླ་བ་དང་། ཉི་མ་དང་། རྣམ་ཐོས་ཀྱི་བུ་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་ལ་སོགས་པའི་གཟུགས་ཐམས་ཅད་ཀྱང་རང་རང་གི་གནས་ནས་ལངས་ཏེ། བྱང་ཆུབ་སེམས་དཔའི་རྐང་པ་ལ་ཕྱག་འཚལ་བར་གྱུར་ཏོ། །དེའི་ཚེ་ལྷ་དང་མི་བརྒྱ་སྟོང་ནི་ཀྱེ་མ་ཨ་ལ་ལ་ཞེས་བྱ་བ་དང་། ཅ་ཅོ་དང་། ག་ཞའི་སྒྲ་བརྒྱ་སྟོང་མང་པོ་འབྱིན་པར་གྱུར་ཏོ། །སེར་སྐྱའི་གནས་ཀྱི་གྲོང་ཁྱེར་ཆེན་པོ་དམ་པ་དེ་ཐམས་ཅད་ཀྱང་རྣམ་པ་དྲུག་ཏུ་གཡོས་སོ། །ལྷའི་མེ་ཏོག་གི་ཆར་ཡང་མངོན་པར་བབ་བོ། །ལྷའི་སིལ་སྙན་བརྒྱ་སྟོང་དུ་མ་དག་ཀྱང་མ་དཀྲོལ་བར་སྒྲ་འབྱིན་པར་གྱུར་ཏོ། །ལྷ་གང་དག་གི་གཟུགས་གང་ཡིན་པ་དེ་དག་ཐམས་ཅད་ཀྱང་རང་རང་གི་གཟུགས་བསྟན་ནས། ཚིགས་སུ་བཅད་པ་འདི་དག་སྨྲ་བར་གྱུར་ཏོ། །རི་རྒྱལ་རི་མཆོག་རི་རབ་ནམ་ཡང་ཡུངས་ཀར་འབྲུ་ལ་ཕྱག་མི་འཚལ། །རྒྱ་མཚོ་ཀླུ་རྗེ་གནས་ནི་ནམ་ཡང་བ་རྗེས་ཆུ་ལ་ཕྱག་མི་འཚལ། །ཉི་ཟླ་འོད་བྱེད་སྲིན་བུ་མེ་ཁྱེར་འོད་བྱེད་དེ་ལ་ཕྱག་མི་འཚལ། །བསོད་ནམས་ཤེས་རབ་རིགས་བྱུང་ལེགས་ལྡན་ལྷ་རྣམས་གང་ལའང་ཕྱག་མི་བཞེས། །ཡུངས་འབྲུ་བ་རྗེས་ཆུ་དང་སྲིན་བུ་མེ་ཁྱེར་འདྲ་བར་གྱུར་པ་ནི། །སྟོང་གསུམ་འདི་ན་ལྷ་མི་གང་ཡང་རུང་སྟེ་ང་རྒྱལ་གནས་པ་ལགས། །རི་རབ་རྒྱ་མཚོ་ཉི་ཟླ་འདྲ་བ་འཇིག་རྟེན་རང་བྱུང་དམ་པ་སྟེ། །དེ་ལ་འཇིག་རྟེན་ཕྱག་འཚལ་བ་ནི་མཐོ་རིས་མྱ་ངན་འདས་པ་འཐོབ། །བྱང་ཆུབ་སེམས་དཔའ་ལྷ་ཁང་དུ་ཞུགས་པ་དེ་བསྟན་པའི་ཚེ། ལྷའི་བུ་བརྒྱ་སྟོང་ཕྲག་སུམ་ཅུ་རྩ་གཉིས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །དགེ་སློང་དག་བྱང་ཆུབ་སེམས་དཔའ་ལྷ་ཁང་དུ་ཁྱེར་བའི་ཚེ་བཏང་སྙོམས་སུ་བཞག་པའི་རྐྱེན་ནི་དེ་ཡིན། རྒྱུ་ནི་དེ་ཡིན་ནོ། །ལྷ་ཁང་དུ་ཁྱེར་བའི་ལེའུ་སྟེ་བརྒྱད་པའོ།། །།དགེ་སློང་དག་དེ་ནས་བྲམ་ཟེ་མདུན་ན་འདོན་འཆར་པོ་ཞེས་བྱ་བ་འཆར་འགྲོའི་ཕ། བྲམ་ཟེ་ལྔ་བརྒྱ་ཙམ་གྱིས་བསྐོར་ཏེ། སྐར་མ་མེ་བཞི་འདས་ནས་ནག་པ་ལ་བབ་པའི་ཚེ་རྒྱལ་པོ་ཟས་གཙང་མའི་དྲུང་དུ་ཕྱིན་ནས་འདི་སྐད་ཅེས་སྨྲས་སོ།