Degé Kangyur volume 46, F.68.a

ཆོས་ཇི་ལྟ་བ་བཞིན་དུ་རྟོགས་པར་བྱ་བའི་སྒྲ་བྱུང་ངོ་། །​ར་ཞེས་བརྗོད་པ་དང་དགའ་བ་ལ་དགའ་བ་མེད་པའི་དོན་དམ་པར་དགའ་བ་ཞེས་བྱ་བའི་སྒྲ་བྱུང་ངོ་། །​ལ་ཞེས་བརྗོད་པ་དང་འཁྲི་ཤིང་ཆད་པའི་སྒྲ་བྱུང་ངོ་། །​ཝ་ཞེས་བརྗོད་པ་དང་ཐེག་པ་མཆོག་གི་སྒྲ་བྱུང་ངོ་། །​ཤ་ཞེས་བརྗོད་པ་དང་ཞི་གནས་དང་ལྷག་མཐོང་གི་སྒྲ་བྱུང་ངོ་། །​ཥ་ཞེས་བརྗོད་པ་དང་སྐྱེ་མཆེད་དྲུག་གཞོམ་ཞིང་མངོན་པར་ཤེས་པ་དྲུག་དང་ཡེ་ཤེས་ཐོབ་པའི་སྒྲ་བྱུང་ངོ་། །​ས་ཞེས་བརྗོད་པ་དང་ཐམས་ཅད་མཁྱེན་པའི་ཡེ་ཤེས་མངོན་པར་རྫོགས་པར་བྱང་ཆུབ་པར་བྱ་བའི་སྒྲ་བྱུང་ངོ་། །​ཧ་ཞེས་བརྗོད་པ་དང་ཉོན་མོངས་པ་བཅོམ་ཞིང་འདོད་ཆགས་དང་བྲལ་བའི་སྒྲ་བྱུང་ངོ་། །​ཀྵ་ཞེས་བརྗོད་པ་དང་ཡི་གེའི་མཐར་ཕྱིན་ཏེ། ཆོས་ཐམས་ཅད་བརྗོད་དུ་མེད་པའོ་ཞེས་བྱ་བའི་སྒྲ་བྱུང་ངོ་། །​དེ་ལྟར་བྱིས་པ་དེ་དག་ཡི་གེའི་ཕྱི་མོ་སློབ་པའི་ཚེ། བྱང་ཆུབ་སེམས་དཔའི་མཐུས་དེ་དག་ལ་སོགས་པ་ཆོས་ཀྱི་སྒོ་བརྒྱ་སྟོང་གྲངས་མེད་པ་བྱུང་བར་གྱུར་ཏེ། བྱང་ཆུབ་སེམས་དཔའ་ཡི་གེའི་གྲྭ་ན་འདུག་པའི་ཚེ་བྱིས་པ་སུམ་ཁྲི་ཉིས་སྟོང་རིམ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །​བྱང་ཆུབ་སེམས་དཔའ་ལོབས་པར་གྱུར་ཀྱང་ཡི་གེའི་གྲྭར་འཇུག་པའི་རྒྱུ་ནི་དེ་ཡིན་ནོ། །​རྐྱེན་ནི་དེ་ཡིན་ནོ། །​ཡི་གེ་བསྟན་པའི་ལེའུ་སྟེ་བཅུ་པའོ།​། །​།དགེ་སློང་དག་གཞོན་ནུ་དེ་དེ་བས་ཀྱང་ཡ་ཟད་སྐྱེས་ནས་དུས་གཞན་ཞིག་ན་གཞོན་ནུ་དེ་གཞོན་ནུ་གཞན་དག་དང་ཞང་བློན་གྱི་བུ་དག་དང་ལྷན་ཅིག་ཏུ་ཞིང་པའི་གྲོང་ལྟ་ཞིང་དོང་སྟེ། གྲོང་བལྟས་ནས་ཞིང་བླས་ཀྱི་མཐའི་སྐྱེད་མོས་ཚལ་ཞིག་ཏུ་ཕྱིན་ཏོ། །​དེ་ན་བྱང་ཆུབ་སེམས་དཔའ་གཅིག་པུ་གཉིས་སུ་མེད་པར་ཕ་ཟད་འཁྱམ་ཞིང་སོང་སོང་བ་དང་། འཛམ་བུའི་ཤིང་ལྗོན་པ་མཛེས་པ་བལྟ་ན་སྡུག་པ་ཞིག་མཐོང་ནས། བྱང་ཆུབ་སེམས་དཔའ་དེའི་གྲིབ་མ་ལ་སྐྱིལ་མོ་ཀྲུང་བཅས་ཏེ་འདུག་གོ། །​འདུག་ནས་བྱང་ཆུབ་སེམས་དཔའ་སེམས་རྩེ་གཅིག་པ་རྙེད་དེ་རྙེད་ནས་ཀྱང་སྡིག་པ་མི་དགེ་བའི་ཆོས་རྣམས་ལས་དབེན་པ། རྟོག་པ་དང་བཅས་པ། དཔྱོད་པ་དང་བཅས་པ། དབེན་པ་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་དང་པོ་བསྒྲུབས་ཏེ་གནས་སོ། །​དེ་རྟོག་པ་



The English translation of this folio by 84000 Translating the words of the Buddha can be found at:
https://read.84000.co/translation/toh95.html?part=UT22084-046-001-4195#UT22084-046-001-4195