Degé Kangyur volume 46, F.40.a

སྟེ། དགེ་སློང་དག་དེ་ལྟར་བྱང་ཆུབ་སེམས་དཔས་ནུབ་མོ་མི་ཉལ་ནས་ལུས་ལས་འོད་བཀྱེ་བའི་རྒྱུ་ནི་དེ་ཡིན་ནོ། །​རྐྱེན་ནི་དེ་ཡིན་ནོ། །​དགེ་སློང་དག་ལྷ་མོ་སྒྱུ་འཕྲུལ་གྱིས་ཀྱང་བྱང་ཆུབ་སེམས་དཔའ་མའི་རུམ་ན་འདུག་པའི་ཚེ། ལུས་ལྕི་བར་མ་ཚོར་ཏེ། གཞན་དུ་ན་ཡང་བ་དང་། འཇམ་པ་དང་། བདེ་བར་ཚོར་ཞིང་ལྟོ་མི་བདེ་བའི་སྡུག་བསྔལ་གང་ཡང་མྱོང་བར་མ་གྱུར་ཏོ། །​འདོད་ཆགས་ཀྱིས་ཡོངས་སུ་གདུང་བའམ། ཞེ་སྡང་གིས་ཡོངས་སུ་གདུང་བའམ། གཏི་མུག་གིས་ཡོངས་སུ་གདུང་བས་ཀྱང་ཡོངས་སུ་གདུང་བར་མ་གྱུར། འདོད་པའི་རྣམ་པར་རྟོག་པའམ། གནོད་སེམས་ཀྱི་རྣམ་པར་རྟོག་པའམ། གཙེ་བའི་རྣམ་པར་རྟོག་པ་དག་ལ་ཡང་རྣམ་པར་རྟོག་པར་མ་གྱུར་ཏེ། གྲང་བའམ། ཚ་བའམ། བཀྲེས་པའམ། སྐོམ་པའམ། མུན་པའམ། རྡུལ་ལམ། ངལ་བ་ཚོར་བའམ། མཐོང་བར་མ་གྱུར་ཏེ། དེ་ལ་གཟུགས་དང་། སྒྲ་དང་། དྲི་དང་། རོ་དང་། རེག་ཡིད་དུ་མི་འོང་བ་སྣང་བར་མ་གྱུར་ཏོ། །​རྨི་ལམ་ངན་པ་ཡང་མཐོང་བར་མ་གྱུར་ཏོ། །​དེ་ལ་བུད་མེད་ཀྱི་སྒྱུའམ། གཡོའམ། ཕྲག་དོག་གམ། བུད་མེད་ཀྱི་ཉོན་མོངས་པ་དག་ཀྱང་ཉམས་སུ་གནོད་པར་བྱེད་པར་མ་གྱུར་ཏོ། །​དེའི་ཚེ་བྱང་ཆུབ་སེམས་དཔའི་མ་ནི་བསླབ་པའི་གཞི་ལྔ་ཡང་དག་པར་བླངས་ཏེ། ཚུལ་ཁྲིམས་དང་ལྡན་ཞིང་དགེ་བ་བཅུའི་ལས་ཀྱི་ལམ་ལ་གནས་པར་གྱུར་ཏོ། །​བྱང་ཆུབ་སེམས་དཔའི་མ་ཡང་སྐྱེས་པ་གང་ལ་ཡང་འདོད་ཆགས་ཀྱི་སེམས་སྐྱེ་བར་མ་གྱུར་ལ། སྐྱེས་པ་གང་ཡང་བྱང་ཆུབ་སེམས་དཔའི་མ་ལ་འདོད་ཆགས་ཀྱི་སེམས་མི་སྐྱེའོ། །​སེར་སྐྱའི་གྲོང་ཁྱེར་ཆེན་པོ་དེ་དང་། ཡུལ་གཞན་དག་ན་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་སུ་གང་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། འབྱུང་པོས་ནོན་པ་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་བྱང་ཆུབ་སེམས་དཔའི་མ་མཐོང་མ་ཐག་ཏུ་སོས་ཤིང་དྲན་པ་ཐོབ་པར་གྱུར་ཏོ། །​མི་མ་ཡིན་པ་དེ་དག་ཀྱང་མྱུར་དུ་གནས་གཞན་དུ་འདོང་བར་གྱུར་ཏོ། །​སེམས་ཅན་གང་ལ་ལ་ཞིག་ནད་སྣ་ཚོགས་ཀྱིས་ཐེབས་པར་གྱུར་ཏེ། རླུང་དང་། མཁྲིས་པ་དང་། བད་ཀན་དང་། འདུས་པ་ལས་བྱུང་བའི་



The English translation of this folio by 84000 Translating the words of the Buddha can be found at:
https://read.84000.co/translation/toh95.html?part=UT22084-046-001-4139#UT22084-046-001-4139