Degé Kangyur volume 46, F.25.b

པ་ཆེན་པོའི་མདོ། བམ་པོ་གསུམ་པ། ལྷ་མོ་སྒྱུ་འཕྲུལ་ཡང་ཁྲུས་བྱས། ལུས་བྱུག་པས་བྱུགས། རྒྱན་སྣ་ཚོགས་ཀྱིས་ལག་པ་ཤིན་ཏུ་བརྒྱན་ཏེ། གོས་ཤིན་ཏུ་འཇམ་པ་མཆོག་བགོས་ཤིང་བཙུན་སྤུ་དང་བཅས་ལ། དགའ་བ་དང་། མཆོག་ཏུ་དགའ་བ་དང་། རངས་པ་ཐོབ་ནས། བུད་མེད་སྟོང་ཕྲག་བཅུས་བསྐོར་ཅིང་མདུན་དུ་བདར་ཏེ། ལྷན་ཅིག་ཏུ་རྒྱལ་པོ་ཟས་གཙང་མ་རོལ་མོ་བྱ་བའི་ཁང་བཟངས་ན་བདེ་བར་གནས་པའི་དྲུང་དུ་ཕྱིན་ཏེ། གཡས་རོལ་ན་ཁྲི་བཟང་པོ་རིན་པོ་ཆེའི་དྲ་བས་བརྒྱན་པ་ལ་འདུག་ནས། འཛུམ་པའི་བཞིན་ཁྲོ་གཉེར་མེད་ཅིང་རབ་ཏུ་དད་པའི་མདོག་གིས་རྒྱལ་པོ་ཟས་གཙང་མ་ལ་ཚིགས་སུ་བཅད་པ་འདི་དག་སྨྲས་སོ། །​རྒྱལ་པོ་ས་བདག་ལེགས་པར་བདག་ལ་གསན་དུ་གསོལ། །​རྒྱལ་པོ་ཁྱོད་ལ་གསོལ་གྱིས་བདག་ལ་དེ་གནོང་ཤིག །​བདག་གི་བསམ་པ་ཡིད་ལ་ཅི་མཆིས་ཅིར་དགའ་བ། །​དེ་དག་བདག་ལ་གསན་ཅིང་ཐུགས་དགྱེས་རངས་པར་མཛོད། །​ལྷ་བདག་བསྙེན་གནས་ཚུལ་ཁྲིམས་བརྟུལ་ཞུགས་ལེན་པར་གསོལ། །​བདག་ནི་འགྲོ་ལ་བྱམས་པས་ཡན་ལག་བརྒྱད་ལེན་ཏེ། །​སྲོག་ཆགས་གནོད་པ་སྤངས་ཤིང་བསམ་པ་རྟག་དག་པས། །​ཇི་ལྟར་བདག་ལ་བྱམས་པ་དེ་ལྟར་གཞན་ལ་བགྱི། །​རྐུ་སེམས་རྣམ་པར་སྤངས་ཏེ་འདོད་དང་དྲེགས་པ་སྤངས། །​རྒྱལ་པོ་འདོད་པ་རྣམས་ལ་ལོག་པར་གཡེམ་མི་བགྱིད། །​བདེན་ལ་གནས་ཤིང་ཕྲ་མ་མ་མཆིས་ཞེ་གཅོད་སྤང་། །​མི་དགེ་ཀྱལ་པའི་ཚིག་ཀྱང་ཡོངས་སུ་མི་སྤྱོད་དོ། །​གནོད་སེམས་ཞེ་སྡང་ཐ་བ་གཏི་མུག་རྒྱགས་པ་དང་། །​བརྣབ་སེམས་ཀུན་སྤངས་རང་གི་ནོར་གྱིས་འཚལ་བར་བགྱི། །​ཡང་དག་སྦྱོར་བས་ཁ་གསག་ཚུལ་འཆོས་ཕྲག་དོག་སྤང་། །​དགེ་བཅུའི་ལས་ལམ་འདི་དག་བདག་གིས་སྤྱད་པར་བགྱི། །​བདག་ནི་ཚུལ་ཁྲིམས་བརྟུལ་ཞུགས་མངོན་དགའ་རབ་བསྡམས་ཀྱིས། །​མི་ཡི་དབང་པོ་བདག་ལ་བཞེད་པས་སྲེད་མ་མཛད། །​རྒྱལ་པོ་ཁྱོད་ལ་ཡུན་རིང་མི་དགེར་གྱུར་དུ་མཆི། །​བདག་གི་ཚུལ་ཁྲིམས་བརྟུལ་ཞུགས་ཉེར་གནས་དགྱེས་པར་མཛོད། །​རྒྱལ་པོ་བདག་གི་འཚལ་བ་འདི་ལགས་དེང་མྱུར་སྩོལ། །​ཁང་བཟངས་བསིལ་ཁང་ལྡན་པ་དང་སྐྱ་ལྡན་པའི་ནང་། །​མེ་ཏོག་བཀྲམ་པའི་མཆིས་མལ་འཇམ་ཞིང་དྲི་བདའ་བར། །



The English translation of this folio by 84000 Translating the words of the Buddha can be found at:
https://read.84000.co/translation/toh95.html?part=UT22084-046-001-4110#UT22084-046-001-4110