Degé Kangyur volume 89, F.5.b

པ་དྲ་བ་ནཱ་ཤ་ནི་སྭཱ་ཧཱ། རིག་པ་ཆེན་མོ་འདི་མ་བསྒྲུབས་སུ་ཟིན་ཀྱང་རྐང་གཉིས་པ་དང་རྐང་བཞི་པ་ཐམས་ཅད་ཀྱི་རྣམ་པར་འཚེ་བ་སེལ་བར་བྱེད་ཅིང་། ལས་ཐམས་ཅད་བྱེད་པར་འགྱུར་རོ། །​སྦྱིན་སྲེག་གམ་བཟླས་པའམ་ཁྲུས་སམ་སྔགས་མདུད་དམ་མངོན་པར་བསྔགས་པའི་ཆུ་འཐུངས་པའམ་བྱབས་པས་ནད་ཐམས་ཅད་སེལ་བར་བྱེད་དོ། །​གྲོ་ག་ལ་གུར་གུམ་གྱིས་བྲིས་པའི་སྔགས་སྐེའམ་དཔུང་པ་ལ་བཏགས་ན་རྩོད་སྦྱོང་ལ་རྒྱལ་བ་ཐོབ་པར་འགྱུར་ཞིང་། རིམས་ཉིན་བཞི་པ་ལ་སོགས་པ་མི་བཟད་པ་ལས་རྣམ་པར་གྲོལ་བར་འགྱུར་རོ། །​སྲིན་པོ་ལ་སོགས་པའི་འཇིགས་པ་སེལ་བར་བྱེད་ཅིང་། འཐབ་པ་དང་འཁྲུག་པ་དང་རྩོད་པ་དག་ལས་རྒྱལ་བ་སྒྲུབ་པར་བྱེད་དོ། །​སྟག་དང་ཆུ་སྲིན་དང་ལྟོ་འཕྱེ་ཆེན་པོ་དང་རྐུན་པོ་ལ་སོགས་པས་མི་མཐོང་ཞིང་རྟག་ཏུ་བཟླས་ན་སྐྱེ་བོ་ཐམས་ཅད་དགའ་བར་འགྱུར་རོ། །​ཨོཾ་ཨཱརྱ་ཏྲྀ་ཏཱི་ཡཱ། ཨ་མུ་ཀ་སྱ་ཙཀྵུ་སྟམྦྷ་ཡ་ཏི་ཋཿཋཿསྭཱ་ཧཱ། ཚེས་གང་ལ་མིག་ན་བར་གྱུར་པ་དེ་ལ་རྩིག་པའམ་སྤང་ལེབ་ལ་རྡོ་རྒྱུས་ཀྱིས་ཚེས་བྲིས་ལ་ཡི་གེ་ཨེ་ཁ་སྦྱར་གསུམ་དུ་བྱའོ། །​ཨོཾ་ཙཎྜ་མ་ཧཱ་རོ་ཥ་ཎ་ཧཱུཾ་ཕཊ། སྔགས་ཀྱི་རྒྱལ་པོ་འདི་ལན་ཅིག་བཟླས་པས་སྡིག་པ་ཐམས་ཅད་ངེས་པར་སྲེག་པར་བྱེད་དོ། །​འབྱུང་པོ་ལ་སོགས་པའི་གདོན་གྱིས་ཟིན་པ་ལ་ཡུངས་ཀར་ལ་སོགས་པས་བརྡེགས་པས་གདོན་ཐམས་ཅད་འབྱེར་བར་བྱེད་དོ། །​ཁམ་ཕོར་ལ་རྡོ་རྒྱུས་ཀྱིས་བྲིས་ཏེ་སྒོ་ལ་བཏགས་པས་གསར་དུ་བཙས་པའི་བྱིས་པ་སྲུང་བར་བྱེད་དོ། །​སྤྲ་ཚིལ་གྱིས་གཟུགས་སོར་བཞི་པ་བྱས་པ་དེའི་སྙིང་གར་བསྒྲུབ་བྱའི་མིང་དང་བཅས་པའི་སྔགས་མངོན་པར་བྲིས་ཏེ་བཅུག་ལ་དེའི་ཁ་ལ་ཚེར་མ་བཙུགས་ན་ཕྱིར་རྒོལ་བའི་ཁ་ཕུར་བུས་བཏབ་པར་འགྱུར་རོ། །​རྐང་པ་ལ་བཙུགས་ན་འགྲོ་བ་དང་འོང་བ་རེངས་པར་བྱེད་དོ། །​སྙིང་ག་ལ་བཙུགས་ན་ཁྲོ་བ་འཇོམས་པར་བྱེད་དོ། མིའི་རྗེ་ངར་གྱི་རུས་པའི་ཕུར་བུའམ། ལྕགས་ཀྱི་ཕུར་བུས་གདབ་པར་བྱའོ། །​མིང་ནས་བཟུང་ཞིང་ཡན་ལག་གང་དང་གང་ལ་ཕུར་བུས་གདབ་པ་དེ་དང་དེ་འཇིག་པར་འགྱུར་རོ། །​དགྲ་བོའི་སྒོའི་འོག་ཏུ་སྦས་ན་འབྱེར་བར་བྱེད་དོ། །​དུར་ཁྲོད་ཀྱི་ཐལ་བ་ལ་



The English translation of this folio by 84000 Translating the words of the Buddha can be found at:
https://read.84000.co/translation/toh544.html?part=UT22084-089-001-432#UT22084-089-001-432