Degé Kangyur volume 89, F.11.a

བྲཧྨའི་མར་སྲང་གཅིག་ཙམ་ལ་ཡོངས་སུ་བཟླས་ཏེ། བདག་ཉིད་ལ་དབྱངས་ཅན་གྱི་ཕྱག་གིས་རབ་ཏུ་སྩོལ་བར་ཡོངས་སུ་རྟོག་ཅིང་། ཏིང་ངེ་འཛིན་ལ་གནས་པས་བཏུང་བར་བྱའོ། །​དེ་ལ་བྲཧྨའི་མར་འདི་ནི། །​བྲཧྨ་ཡི་ཁུ་བ་འོ་མ་དང་། །​མར་སྲང་སུམ་ཅུ་རྩ་གཉིས་དང་། །ཡུང་བ་དང་ནི་མ་ལ་ཏི། །​དུར་བྱིད་ཨ་རུ་རར་བཅས་པ། །​དེ་དག་ཆ་ནི་སྲང་རེ་དང་། །​པི་པི་ལིང་དང་བྱི་དང་ཀ། །​སེན་དྷ་བི་དང་ཁ་རར་བཅས། །​དེ་དག་སྲང་གི་བཞི་ཆར་ཤེས། །​སྨན་རྣམས་དག་ནི་བཏགས་ནས་ཀྱང་། །​དེ་ལ་འདི་དག་བླུགས་བྱས་ལ། །​དེ་དག་ཐམས་ཅད་ཆ་མཉམ་པ། །​མེ་ཆུང་ངུ་ལ་དེ་བསྐོལ་བྱ། །​དེ་ནས་འཐུངས་པ་ཙམ་གྱིས་ནི། །​བླ་མེད་ངག་ནི་དག་འགྱུར་དང་། །​མཚན་བདུན་ཉེ་བར་ལོངས་སྤྱོད་པས། །​མིའམ་ཅི་དང་སྐད་མཚུངས་འགྱུར། །​ཟླ་གསུམ་ཉེ་བར་ལོངས་སྤྱོད་པས། །​མི་ནི་ཤེས་རབ་གནས་སུ་འགྱུར། །​ཟླ་གསུམ་རབ་ཏུ་སྦྱོར་བ་ཡིས། །​ཐོས་པ་མཆོག་ནི་འཛིན་པར་འགྱུར། །​ཟླ་བ་དྲུག་གིས་མངོན་སུམ་དུ། །​མི་ནི་ངག་དབང་མཚུངས་པར་གྱུར། །​མཛེ་ནད་བཅྭ་བརྒྱད་དག་དང་ནི། །​ཟ་བྱེད་ཆེན་པོ་བདུན་འཇོམས་བྱེད། །​ཨོཾ་ཨ་ནན་ཏ་ཛྙཱ་ན་ཤྲཱི་ཡེ། མཉྫུ་ཤྲཱི་ཡེ་ནམཿ། གོང་དུ་སྨོས་པའི་ལྷ་མོ་བཞིས་བསྐོར་བའི་ངག་གི་དབང་ཕྱུག་ཏུ་བདག་ཉིད་བསམས་ལ། སྔར་བཤད་པའི་རིམ་པས་སྔགས་བཟླས་པ་བྱས་ན། གོང་དུ་སྨོས་པའི་ལས་ཐམས་ཅད་བྱེད་པར་འགྱུར་རོ། །​ཨོཾ་ཨ་ར་པ་ཙ་ན་དྷཱིཿསྭཱ་ཧཱ། དབེན་པར་དཀྱིལ་འཁོར་བྱས་ཏེ། བཅོམ་ལྡན་འདས་ངག་གི་དབང་ཕྱུག་དང་བླ་མ་རྗེ་བཙུན་ཡང་དག་པར་མཆོད་དེ། བདེ་བའི་སྟན་ལ་འདུག་ནས་བྱང་ཆུབ་ཏུ་སེམས་བསྐྱེད་པར་བྱའོ། །​དེ་ནས་ཨོཾ་སྭ་བྷཱ་བ་ཤུཿསརྦ་དྷརྨ་སྭ་བྷཱ་བ་ཤུད་དྷོ྅ཧཾ། ཞེས་བྱ་བའི་སྔགས་ལན་གསུམ་གྱི་བར་དུ་བརྗོད་དེ། བདག་དང་འཇིག་རྟེན་རང་བཞིན་གྱིས་རྣམ་པར་དག་པར་བསམས་ལ་སྟོང་པ་ཉིད་མངོན་དུ་བྱས་ནས། པདྨ་དཀར་པོའི་སྟེང་གི་ཟླ་བའི་དཀྱིལ་འཁོར་གྱི་སྟེང་ན་བཞུགས་པ། སྐུ་མདོག་དཀར་པོ་རལ་གྲི་དང་པོ་ཏི་བསྣམས་པར་བདག་ཉིད་ཡུད་ཙམ་གྱིས་ཡོངས་སུ་གྲུབ་པར་རྣམ་པར་བསམས་ལ། ངག་གི་དབང་ཕྱུག་བདག་



The English translation of this folio by 84000 Translating the words of the Buddha can be found at:
https://read.84000.co/translation/toh544.html?part=UT22084-089-001-443#UT22084-089-001-443