རིགས་ཀྱི་བུ་མོ་དད་པ་ཅན་གྱིས་ཆོས་ཀྱི་རྣམ་གྲངས་འདི་ལ་གུས་པར་བགྱིས་ཏེ་མཉན་པར་བགྱིའོ། །གུས་པར་བགྱིས་ཏེ་ཡིད་ལ་བགྱིའོ། །བཅོམ་ལྡན་འདས་ས་ཕྱོགས་གང་ན་ཆོས་ཀྱི་རྣམ་གྲངས་འདི་སྤྱོད་པའི་ས་ཕྱོགས་དེ་ནི་དེ་བཞིན་གཤེགས་པས་བྱིན་གྱིས་བརླབས་པ་ལགས་སོ། །ས་ཕྱོགས་དེ་ནི་མཆོད་རྟེན་དུ་གྱུར་པར་བལྟ་བར་བགྱིའོ། །ས་ཕྱོགས་དེ་ནི་ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་གྱིས་ཕྱག་བགྱི་བའི་གནས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་དེ་བཞིན་ནོ། །དེ་དེ་བཞིན་ཏེ། རིགས་ཀྱི་བུ་ས་ཕྱོགས་དེ་ནི་ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་གྱིས་ཕྱག་བྱ་བའི་གནས་ཡིན་ནོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་ལ་ལ་ཆོས་ཀྱི་རྣམ་གྲངས་འདི་ལ་ཡང་མཆོད་པ་བགྱིད་ལ་འདིའི་སླད་དུ་མཆོད་པ་དང་བཀུར་སྟི་ལ་བརྩོན་པའི་སེམས་ཀྱིས་སྦྱིན་པ་ཡུངས་འབྲུ་ཙམ་སྩལ་ན། དེའི་མཚམས་མེད་པ་ལྔའི་ལས་རྣམས་ཡོངས་སུ་ཟད་པར་འགྱུར་ལ། བསྐལ་པ་དགུ་ཁྲིའི་བར་དུ་ལོངས་སྤྱོད་ཆེ་བའི་རིགས་རྣམས་སུ་སྐྱེ་བར་འགྱུར་རོ། །བསྐལ་པ་བརྒྱད་ཁྲིའི་བར་དུ་འཁོར་ལོས་སྒྱུར་བའི་རྒྱལ་པོར་འགྱུར་རོ། །སངས་རྒྱས་ཀྱི་ཞིང་ཡོངས་སུ་དག་པ་རྣམས་སུ་སྐྱེ་བར་འགྱུར་རོ། །གཤིས་ངན་དུ་འགུམ་པར་མི་འགྱུར་རོ། །ངན་སོང་དུ་སྐྱེ་བར་མི་འགྱུར། བསམ་པ་ཐམས་ཅད་ཡོངས་སུ་རྫོགས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་སྔོན་བྱུང་བ་འདས་པའི་དུས་བསྐལ་པ་བགྲང་བ་ལས་འདས་པ་ན། དེ་བཞིན་གཤེགས་པ་ཆོས་ཀྱི་ཡེ་ཤེས་མཐའ་ཡས་པ་ཆགས་པ་མེད་ཅིང་རྡུལ་དང་བྲལ་བའི་རྒྱལ་པོའི་ཏོག་ཅེས་བྱ་བ་བྱུང་སྟེ། དེར་ངས་བྲམ་ཟེའི་གཟུགས་ཀྱིས་ཆོས་ཀྱི་རྣམ་གྲངས་འདི་ཐོས་སོ། །ཐོས་ནས་ཀྱང་སེམས་ཅན་རྣམས་ལ་བཤད་དོ། །དེར་ངས་རྙེད་པའི་མོད་ལ་ཆོས་ལ་བཟོད་པ་ཐོབ་སྟེ། ཆོས་རྣམས་ལ་ཆོས་ཀྱི་མིག་རྣམ་པར་དག་གོ། །