།དབང་པོའི་གཞུ་དང་མཚུངས་པ་འདི། །ཆུ་ནང་ཟླ་བ་ལྟ་བུར་འདོད། །ཅེས་པ་ནི་དཔའ་བོ་གཅིག་པ་ཉིད་དུ་གསུངས་པའི་དཔལ་གཏུམ་པོ་ཁྲོ་བོ་ཆེན་པོའི་རྒྱུད་ལས་ལུས་ཀྱི་རང་བཞིན་གྱི་རིམ་པར་ཕྱེ་བ་སྟེ་ཉི་ཤུ་རྩ་བཞི་པའོ།། །།དེ་ནས་བཅོམ་ལྡན་འདས་མས་གསོལ་པ། ཤེས་རབ་ཕ་རོལ་ཕྱིན་འབྱུང་བ། །གཞན་ཡང་བདག་གིས་མཉན་པར་འཚལ། །ཤིན་ཏུ་རྒྱས་མིན་མདོར་བསྡུས་པས། །མགོན་པོ་བདག་ལ་བཀའ་དྲིན་མཛོད། །དེ་ནས་བཅོམ་ལྡན་འདས་ཀྱིས་བཀའ་སྩལ་པ། ཤེས་རབ་ཕ་རོལ་ཕྱིན་འབྱུང་བ། །དེ་ནས་ཡང་དག་རབ་བཤད་བྱ། །བཅུ་དྲུག་ལོ་ཡི་གཟུགས་ཅན་མ། །ལྷ་མོ་སེམས་དཔའི་སྐྱིལ་ཀྲུང་མཛད། །སྐུ་མདོག་སྔོན་མོ་སྐལ་ཆེན་མ། །མི་བསྐྱོད་པ་ཡིས་དབུ་ལ་བརྒྱན། །ཕྱག་གཡས་པདྨ་དམར་པོ་བསྣམས། །གཡོན་པའི་ཕྱག་ནི་རོལ་པའི་སྟབས། །པདྨ་ཟླ་བའི་སྟེང་དུ་བཞུགས། །ནུ་མ་རྒྱས་ཤིང་ལྟ་བས་ཚིམ། །སྤྱན་ཡངས་དགའ་མ་ཁྱོད་ལ་སྨྲས། །ལྷན་སྐྱེས་མི་གཡོའི་ཏིང་འཛིན་གནས། །ལྷ་མོ་འདི་ནི་བསྒོམ་པར་གྱིས། །ཧཱུྃ་ཡིག་ཡེ་ཤེས་ལས་བྱུང་བའི། །སྣ་ཚོགས་རྡོ་རྗེའི་རྣལ་འབྱོར་མ། །རྣལ་འབྱོར་འཁྱུད་པས་བསྒོམ་བྱས་ན། །དངོས་གྲུབ་ངེས་པར་ཐོབ་པར་འགྱུར། །ཡང་ན་དྷཱིཿཡིག་ལས་བྱུང་བའི། །ཁ་དོག་དཀར་པོ་བསྒོམ་པར་བྱ། །རྟག་པ་ཡི་ནི་དབུ་བརྒྱན་ཅིང་། །རྡོ་རྗེ་དབྱིངས་ཀྱི་དབང་ཕྱུག་མ། །སོར་མོ་རིན་དབང་དབུ་བརྒྱན་དང་། །དམར་པོ་ཀུ་རུ་ཀུལླི་ཀཱ། །ལྷ་མོ་དབུ་རྒྱན་འོད་དཔག་མེད། །ཧྲི་ཡིག་ཡེ་ཤེས་ལས་བྱུང་མ། །ཏྃ་ཡིག་ཡེ་ཤེས་ལས་བྱུང་བའི། །སྒྲོལ་མ་སྐུ་མདོག་ལྗང་གུ་ནི། །དོན་ཡོད་གྲུབ་པའི་དབུ་བརྒྱན་མ། །སྔོན་མོའི་གཟུགས་ཀྱིས་སྐྱེས་བུ་རྣམས། །སེམས་དཔའི་སྐྱིལ་ཀྲུང་གིས་གནས་ནས། །ཞི་བའི་གཟུགས་ཀྱིས་ཡང་དག་ཞུགས། །དཔལ་ལྡན་རལ་གྲི་ཞགས་པ་བསྣམས། །མངོན་པར་འཁྱུད་པའི་ཚུལ་མཛད་མ། །རང་རིགས་ཡང་ན་གཞན་རིགས་ཀྱིས། །བུ་མོ་བཟུང་ནས་བསྒོམ་པར་བྱ། །ཕྱག་རྒྱ་འདི་ཡིས་རྣལ་འབྱོར་པས། །ཐེ་ཚོམ་མེད་པར་དངོས་གྲུབ་འགྱུར། །ཡང་ནས་སོགས་ལས་འགྱིས་པའི། །གཟུགས་བརྙན་བྱས་ནས་བསྒྲུབ་པར་བྱ། །ལྡན་སྐྱེས་གཏུམ་པོའི་ཏིང་འཛིན་གནས། །རྩེ་གཅིག་ཡིད་ཀྱིས་བཟླས་པར་བྱ། །དེ་ལ་བཟླས་པའི་སྔགས་ནི་འདི། ཨོྃ་བི་ཤྭ་བཛྲཱི་ཨཱ་གཙྪ་ཨཱ་གཙྪ་ཧཱུྃ་སྭཱ་ཧཱ། ཨོྃ་བཛྲ་སར་སྭ་ཏཱི་ཨཱ་གཙྪ་ཨཱ་གཙྪ་དྷཱིཿསྭཱ་ཧཱ། ཨོྃ་བཛྲ་དྷཱ་ཏྭི་ཤྭ་རཱི་ཨཱ་གཙྪ་ཨཱ་གཙྪ་བྃ་སྭཱ་ཧཱ།