།།དེ་ནས་བཅོམ་ལྡན་འདས་མས་གསོལ་པ། བཅོམ་ལྡན་འདས་ཐབས་དང་ཤེས་རབ་དག་གི་ང་རྒྱལ་ཇི་ལྟར་བསྒོམ་པར་བྱ། བཅོམ་ལྡན་འདས་ཀྱིས་བཀའ་སྩལ་པ། །མི་མོ་མངོན་བྱས་རྣལ་འབྱོར་པས། །ཕན་ཚུན་དེ་ཡི་ལྟ་བ་མཆོག །ལུས་ནི་དྲང་པོར་མཉམ་གནས་ནས། །རྩེ་གཅིག་ཡིད་ཀྱིས་བསམ་གཏན་བྱ། །སྐུ་བཞི་ཡི་ནི་རང་བཞིན་ཕྱིར། །ཐ་དད་མེད་པའི་ཡིད་ཀྱིས་སོ། །སླར་ཡང་བྱང་ཆུབ་དབྱེར་མེད་པས། །ཐབས་དང་ཤེས་རབ་ཉིད་དུ་འདོད། །འཆི་བ་ཉིད་ནི་ཆོས་སུ་བརྗོད། །ལོངས་སྤྱོད་རྫོགས་པ་བར་སྲིད་དང་། །འགྲོ་བ་དྲུག་གཟུགས་སྤྲུལ་པ་དང་། །འདོད་པའི་ལོངས་སྤྱོད་བདེ་ཆེན་པོ། །སྐུ་བཞི་ཡི་ནི་རང་བཞིན་འདི། །སྐྱེས་བུ་ལ་ནི་ཁམས་གསུམ་པ། །སྐུ་བཞི་ཡི་ནི་རང་བཞིན་ཕྱིར། །བུད་མེད་གཟུགས་ལ་ཁམས་གསུམ་མོ། །སྐུ་བཞི་ཡི་ནི་རང་བཞིན་ལས། །སྐྱེས་བུ་འདིར་ནི་སངས་རྒྱས་ཡིན། །བུད་མེད་ཤེས་རབ་ཕར་ཕྱིན་མར། །ཕྱོགས་རྣམས་ཀུན་དུ་རྣམ་པར་གནས། །དེ་ཉིད་ང་རྒྱལ་བྱས་པ་ཡིས། །སླར་ཡང་བདག་ལ་དངོས་གྲུབ་བོ། །ཁྲོ་བོ་གཏུམ་པོའི་ཚུལ་ཉིད་དུ། །རང་ཉིད་གཟུགས་ཀྱིས་ཡང་དག་གནས། །འདོད་ཆགས་གཏུམ་མོའི་གཟུགས་བསྒོམས་ན། །བདག་ལ་དངོས་གྲུབ་རྣམ་ཀུན་དུ། །དེ་ཉིད་གསུམ་རིག་དུས་རིང་དུ། །འདི་ནི་གུས་པ་དང་བཅས་བསྒོམ། །ལས་ཀུན་ཡོངས་སུ་སྤང་བྱས་ནས། །བླ་མ་བསྟེན་པ་དེ་ཉིད་མཆོག །ཇི་སྲིད་དངོས་གྲུབ་མ་ཐོབ་པར། །བདེ་བའི་སེམས་ཉིད་གཅིག་པུས་གནས། །གང་ཚེ་རྣལ་འབྱོར་དངོས་གྲུབ་ཐོབ། །སྡིག་པ་དང་བྲལ་དྲི་མེད་འགྱུར། །རླུང་དང་སེམས་ཀྱི་འཛུམ་མདངས་ནི། །འཇིག་རྟེན་པ་ཡིས་མཐོང་བ་མེད། །ཀུན་མཁྱེན་ཀུན་ལ་ཁྱབ་པའོ། །ཉོན་མོངས་ཀུན་ལས་རྣམ་པར་འདས། །དེ་ལ་ནད་དང་རྒས་པ་མེད། །དེ་ལ་འཆི་བ་ཡོད་མིན་ཏེ། །དེ་ལ་དུག་གིས་འདའ་བ་མེད། །ཆུས་མིན་མེས་ཀྱང་འཚིག་པ་མེད། །མཚོན་གྱིས་མ་ཡིན་དགྲ་ཡི་ནི། །དབང་དུ་ནམ་ཡང་འགྲོ་བ་མིན། །ཡིད་ཀྱིས་བསམས་པ་ཙམ་གྱིས་ནི། །དགོས་འདོད་མ་ལུས་འབྱུང་བར་འགྱུར། །སྐད་ཅིག་དེ་ལ་འབད་མེད་པར། །ཡིད་བཞིན་ནོར་བུ་དང་མཚུངས་འགྱུར། །