Degé Kangyur volume 80, F.340.b

པར་འདོད། །​གཏུམ་པོ་ཁྲོ་བོའི་ཏིང་འཛིན་གྱིས། །​ཤེས་རབ་དང་བཅས་བརྩམ་པར་བྱ། །​རླུང་གི་འཇུག་པ་བགྲང་བྱ་སྟེ། །​བརྒྱ་སྟོང་ལ་སོགས་གྲངས་རྣམས་ཀྱིས། །​སྐད་ཅིག་ཉིད་ལ་འགྲུབ་འགྱུར་ཏེ། །​མགོན་པོ་སངས་རྒྱས་གསུང་ཇི་བཞིན། །​འབད་པས་ཤེས་རབ་ལ་འཁྱུད་ནས། །​རླུང་གཅིག་པུ་ནི་བགྲང་བར་བྱ། །​གཏུམ་པོ་ཁྲོ་བོའི་གཟུགས་ཀྱིས་ནི། །​ཟླ་བ་ཕྱེད་ཙམ་གྱིས་འགྲུབ་བྱེད། །​ལྷ་ཡི་ཡེ་ཤེས་ཡང་དག་ལྡན། །​མངོན་པར་ཤེས་པ་སྐྱེ་བར་འགྱུར། །​གཏུམ་པོ་ཁྲོ་བོའི་ཏིང་འཛིན་གྱིས། །​རང་གི་བུད་མེད་ངེས་འཁྱུད་ནས། །​སྙིང་ག་དང་ནི་སྙིང་ག་དང་། །​གསང་བ་དང་ནི་གསང་བ་དང་། །​ཞལ་དང་ཞེལ་ནི་ཡང་དག་སྦྱར། །​སེམས་མེད་བདེ་བའི་མཆོག་དེ་ཉིད། །​ཟླ་བ་སྙིང་གི་ནང་དུ་སོན། །​དེ་ནི་ཉི་མའི་མཐུ་ཡིས་སོ། །​དེ་ཉིད་བརྟན་པའི་སྟོབས་དེ་ལས། །​མི་ཡིས་ཀུན་མཁྱེན་ཐོབ་པར་འགྱུར། །​བསམས་པ་ཙམ་གྱུར་ཉིད་ཀྱིས་ནི། །​འདས་དང་མ་འོངས་ད་ལྟར་ཡང་། །​ཕ་རོལ་སེམས་ནི་ཤེས་འགྱུར་ཏེ། །​བདག་གི་འདི་ནི་བདེན་པར་སྨྲས། །​དེ་བཞིན་དེ་ཉིད་སྦྱོར་བ་ཡིས། །​རྣ་བའི་ནང་དུ་བསྒོམ་བྱས་ན། །​ཕྱོགས་རྣམས་ཀུན་ན་གནས་པའི་སྒྲ། །​དྲུང་ན་མོ་ནི་ཇི་བཞིན་ཐོས། །​དེ་བཞིན་མིག་གི་མཐུ་ཡིས་ནི། །​འཇིག་རྟེན་གསུམ་པོ་མཐོང་བར་བྱེད། །​དེ་བཞིན་སྣ་ཡིས་བསྣམས་པས་ཀྱང་། །​དྲི་རྣམས་ཐམས་ཅད་ཤེས་པར་འགྱུར། །​དེ་བཞིན་ལྕེ་ཡིས་མྱངས་པས་ཀྱང་། །​རིང་གནས་རོ་ཡང་རབ་ཏུ་སྐྱེ། །​དེ་བཞིན་རང་རྟགས་རྩེར་བསམས་པས། །​རེག་བྱ་མ་ལུས་ཤེས་པར་འགྱུར། །​དེ་བཞིན་མགོ་ཡི་དབུས་བསམས་པས། །​ཀུན་གྱི་ནུས་མཐུ་འཕེལ་བར་འགྱུར། །​གང་དུ་སེམས་ནི་གནས་དེ་ལ། །​རླུང་གིས་རོ་ནི་ཡང་དག་མཉམ། །​དེ་དང་དེ་ལས་དེ་འགོག་པས། །​དེ་ཉིད་འདིར་ནི་གཟུགས་བརྙན་འགྱུར། །​ཞི་དང་རྒྱས་དང་དབང་དང་ནི། །​དགུག་དང་དེ་བཞིན་གསད་པ་དང་། །​བསྐྲད་དང་ཐམས་ཅད་ཤིན་ཏུ་བསྒོམ། །​དེ་ཉིད་གང་བསྒོམས་རབ་ཏུ་འགྲུབ། །​ཀུ་མ་བྷ་ག་སོགས་རབ་སྦྱོར་བས། །​ལྟ་སྟངས་བཞི་པོ་དང་སྦྱོར་བྱ། །​གཡོན་དུ་ལྟ་བའི་ལྟ་སྟངས་ཀྱིས། །​བུམ་པ་ཅན་གྱི་དབང་དུ་བྱེད། །​པཱུར་ཀ་ནི་ངེས་སྦྱོར་བས། །​གཡས་ཀྱི་དགུག་པར་ཤེས་པར་བྱ། །​གང་ཞིག་དཔྲལ་གནས་ལྟ་སྟངས་ཀྱིས། །​དེ་ནི་རེ་ཙག་ཡིས་གསད། །



The English translation of this folio by 84000 Translating the words of the Buddha can be found at:
https://read.84000.co/translation/toh431.html?part=UT22084-080-015-2651#UT22084-080-015-2651