ཨ་བདྷཱུ་ཏཱིའི་རྩ་ཕའི་རྡོ་རྗེའི་ལམ་ནས་མའི་པདྨའི་བུ་གའི་གནས་རྡོ་རྗེ་དབྱིངས་ཀྱི་དབང་ཕྱུག་མའི་རྩ་མངལ་གྱི་སྐྱེ་བའི་རྩ་ལ་གནས་ནས་འཛག་པའི་སེམས་བཞིན་དུ། དེ་ལས་སྐྱེ་བ་ཡིན་ནོ། །དེ་ཡང་རིམ་པ་བཞིན་མེར་མེར་པོ་དང་། ཀླེང་ཀླེང་པོ་དང་། ལྟར་ལྟར་པོ་དང་། མཁྲང་འགྱུར་དང་། ཡན་ལག་དང་ཉིང་ལག་ཏུ་གྱུར་པའི་བུ་ནི་ཟླ་བ་དགུའམ། བཅུ་ནས་ལམ་གང་ཉིད་ནས་རབ་ཏུ་ཞུགས་པ་དེ་ཉིད་ཀྱི་ལམ་ནས་སྐྱེ་བར་འགྱུར་རོ། །གལ་ཏེ་ཡང་བུད་མེད་དུ་འགྱུར་ན། །དེའི་ཚེ་སེམས་པ་ལ་རྗེས་སུ་ཆགས་པར་འགྱུར་རོ། །མ་ལ་སེམས་ཞེ་སྡང་བར་འགྱུར་རོ། །དེ་ནས་བདག་ཉིད་མའི་གཟུགས་ལ་ལྟ་བར་བྱེད་དོ། །རྣམ་པར་ཤེས་པ་མའི་མགོ་བོའི་ལམ་ནས་པདྨར་རབ་ཏུ་ཞུགས་ནས་ཕའི་ཁུ་བ་དང་འདྲེས་པར་གྱུར་ནས་དེའི་སྐྱེ་བའི་རྩལ་གནས་ནས། དེ་ནས་སྔོན་བཞིན་དུ་འབྱུང་ཞིང་སྐྱེའོ། །དེ་བཞིན་ཉིད་དུ་མ་རིག་པ་ལ་སོགས་པ་དང་བཅས་པ་རྣམས་ཀྱིས་འཇིག་རྟེན་དུ་སྐྱེ་སྟེ། འཇིག་རྟེན་རྣམས་ཀྱང་ཕུང་པོ་ལྔ་པོ་རྣམས་དེ་བཞིན་དུ་དེ་རྣམས་ཀྱང་སྡུག་བསྔལ་ལ་འཁོར་ཞིང་འཇུག་པའི་ཕུང་པོ་ལྔ་པོ་རྣམས་སོ། །ཐར་པ་དོན་དུ་གཉེར་བ་རྣམས་ལ། མ་རིག་པ་ལ་སོགས་པ་ཕུང་པོའི་རང་བཞིན་འགོག་པའི་ཕྱིར། སྡུག་བསྔལ་གྱི་བྱ་བར་གྱུར་པ་ཡང་མེད་དོ། །སྟོང་པ་ཉིད་དང་སྙིང་པོ་མེད་པ་ཉིད་ཀྱིས་སྡུག་བསྔལ་གྱི་བྱ་བ་ཡང་མེད་ཅིང་ཐར་པའི་དོན་དང་ལྡན་པའོ། །དེའི་ཕྱིར་ཐར་པའི་བསམ་པ་མེད་ཅིང་། མེད་པའི་བསམ་པ་ཡང་མེད་པའོ། །དེའི་ཕྱིར་དངོས་པོ་མེད་པ་དང་བྲལ་བའི་ཐབས་དང་ཤེས་རབ་ཡང་དག་པར་སྦྱོར་བའི་བདེ་བ་ཆེན་པོའི་གཟུགས་ཅན་ནི། དཔལ་ལྡན་མགོན་པོ་མི་གཡོ་བའི་བདག་ཉིད་ཅན་དགའ་བ་བཞིའི་སྐུ་ཅན། སྲིད་པ་དང་མྱ་ངན་ལས་འདས་པ་ལ་རབ་ཏུ་མི་གནས་པའི་ཐུགས་ཅན་ནོ། །ཐར་པ་ནི་འདོད་ཆགས་ལས་སྐྱེས་པ་སྟེ། འཇིག་རྟེན་པའི་འདོད་ཆགས་ཀྱི་འདོད་ཆགས་ཟད་པ་དང་ཟད་པ་མ་ཡིན་པར་གྱུར་པ། མི་གཡོ་བའི་དོན་ཡོངས་སུ་ཤེས་པ་སངས་རྒྱས་ཀྱི་དངོས་གྲུབ་ཡང་དག་པར་གྲུབ་པར་བྱེད་དོ། །གཡོ་བར་བྱེད་པ་ནི་ཤེས་རབ་དང་ཡང་དག་པར་སྦྱོར་བའི་བདེ་བའི་རོས་དགའ་བའི་སེམས་གང་ཡིན་པའོ། །ཟླ་བའི་ཁྱད་པར་གྱི་དགའ་བ་མཆོག་གི་སྙིང་པོ་དེ་མི་གཡོ་བ་ཞེས་གསུངས་སོ། །ཞེས་པ་ནི་དཔའ་བོ་གཅིག་པ་ཉིད་དུ་གསུངས་པའི་དཔལ་གཏུམ་པོ་ཁྲོ་བོ་ཆེན་པོའི་རྒྱུད་ལས།