Degé Kangyur volume 80, F.169.b

གཅིག་ཏུ་ནི་སྒོམ་པར་བྱེད། །​སྒོ་དགུ་ལས་ནི་གང་བྱུང་བ། །​རྫས་ཀྱི་བདག་ཉིད་རྣམ་བསྒོམས་ལ། །​རང་བཞིན་མེད་པའི་བློ་ལྡན་པའི། །​རྣམ་པར་མི་རྟོག་པ་ཡིས་བཟའ། །​མཐེ་བོང་དང་ནི་སྲིན་ལག་གིས། །​ཁ་རུ་ཡིད་བཞིན་ནོར་བུ་ནི། །​བདུད་རྩིའི་རང་བཞིན་ལས་བྱུང་བའི། །རྟག་པའི་དངོས་གྲུབ་ཐོབ་པར་འགྱུར། །​རྣལ་འབྱོར་མའི་དབང་ཕྱུག་མའི་རིག་པ་ཆེན་མོ་ལས་སྦྱོར་བ་གཏན་ལ་དབབ་པའི་ལེའུ་སྟེ་གཉིས་པའོ།​། །​།དེ་ནས་ཡང་དག་བཤད་བྱ་བ། །​དམ་ཚིག་སྒྲུབ་པའི་དམ་པ་སྟེ། །​རྫས་གཞན་ཚོགས་ནི་བཟའ་བྱ་བ། །​ཐམས་ཅད་མཁྱེན་པའི་འབྲས་སྟེར་བའོ། །​གང་ཞིག་ཟོས་པ་ཙམ་གྱིས་ནི། །​འབྱུང་པོའི་མི་རྣམས་འགྲུབ་འགྱུར་བ། །​བརྟན་པ་དང་ནི་མྱུར་འགྲོ་ཉིད། །​དེ་བཞིན་དུ་ནི་བ་ལང་ཁྱི། །​ཆེན་པོར་ཡང་དག་ལྡན་པ་ནི། །​དེ་བཞིན་ཡེ་ཤེས་བདུད་རྩི་ལྔ། །​ཚེས་གྲངས་བཅུ་བཞི་བརྒྱད་ལ་ནི། །​ལྷན་ཅིག་བསྒོས་ཏེ་སྦྱར་བྱས་ནས། །​ཉི་མ་བདུན་དུ་ཅེ་སྤྱང་གི། །​དབུས་སུ་གཞག་ལ་དེ་ནས་བཏོན། །​ལྔ་པོ་དག་ལས་ཡུངས་ཀར་གྱི། །​འབྲས་བུའི་ཚད་ཙམ་རིལ་བུ་བྱ། །​དེ་ནི་རྒྱུད་འདིར་གསུངས་མོད་ཀྱི། །​ཚེས་བརྒྱད་དང་ནི་བཅུ་བཞིའི་བར་དག་ཏུ། །ཉི་མ་བདུན་དུ་ལྷན་ཅིག་མིན་བསྒོམ་སྟེ། །​སྦྱར་ནས་ཅེ་སྤྱང་དབུས་སུ་ལགས་བཞག་ལ། །​དེ་ལས་བཏོན་ཏེ་ལྔ་པོ་དག་ལས་ནི། །​དངོས་གྲུབ་འབྲས་བུའི་ཚད་ཙམ་རིལ་བུ་བྱ། །​འབྲས་བུ་ཆེན་པོ་རབ་ཏུ་རྟོགས་པས་ན། །​དེ་ནི་རྒྱུད་འདིར་གསུངས་ཀྱི་ཀུན་ཏུ་སྦས། །འབྲས་བུ་ཆེན་པོ་སངས་རྒྱས་ཀྱིས། །​ཐམས་ཅད་དུ་ནི་སྦས་པའོ། །​དེ་ནས་སྒྲུབ་ཐབས་འབྱུང་བའོ། །​ཡིད་ཀྱི་པདྨ་བསམ་བྱ་བ། །​ཁ་དོག་དམར་པོ་ཀུན་འོད་ལ། །​ལྷ་མོ་བཞི་དང་ཡང་དག་ལྡན། །​སངས་རྒྱས་གཟུགས་ཀྱིས་ཉེར་བརྒྱན་པའོ། །​ཤར་དུ་ཨུཏྤལ་སྔོ་འོད་མདོག །​ལྷོ་རུ་སེར་པོ་ལྟ་བུའོ། །​ནུབ་ཏུ་དཀར་དང་དམར་བའི་འོད། །​བྱང་དུ་མ་རྒད་འོད་ཡིན་ནོ། །​འབར་བའི་ཕྲེང་བས་འཁྲིགས་པ་དང་། །​ཞལ་བཞི་ཕྱག་བཞི་སྤྱན་གསུམ་མ་མཛེས། །​ཤར་ཕྱོགས་ཀྱི་ལྷ་མོ་ནི་སྤྱན་གསུམ་པ་ཕྱག་གཡོན་ན་ཁ་ཊྭཱྃ་ག་དང་



The English translation of this folio by 84000 Translating the words of the Buddha can be found at:
https://read.84000.co/translation/toh425.html?part=UT22084-080-009-228#UT22084-080-009-228