།དེ་བཞིན་གཤེགས་པ་ཀུན་གྱི་དཔལ། །དངོས་གྲུབ་ཆེན་པོ་སྟེར་བར་འགྱུར། །བཅུད་ལེན་རྣམ་པ་སྣ་ཚོགས་ཀྱིས། །རྟག་ཏུ་སེམས་ཅན་དོན་བྱེད་པའོ། །ཁུ་བ་དགུག་དང་ཆང་དང་ནི། །གོང་བུ་ཆེན་པོ་དགུག་པ་ཉིད། །ཤ་ཆེན་པོ་ནི་བཀུག་ནས་སུ། །རྣལ་འབྱོར་མ་དང་ལྷན་ཅིག་སྤྱོད། །ཚེ་རིང་བརྩོན་འགྲུས་ཆེན་པོ་དང་། །གཟི་བརྗིད་ཆེ་ཞིང་སྟོབས་ཆེན་འགྱུར། །ལྷ་ཡི་མིག་དང་རྫུ་འཕྲུལ་ལྡན། །ཉིན་རེ་ཟླ་བ་འཐུང་བའོ། །དེ་ཡི་ཚེ་ནི་འཕེལ་འགྱུར་ཏེ། །བསྐལ་པ་ཆེན་པོའི་བར་དུ་གནས། །བལྟ་བས་མི་ངོམས་ལུས་དང་ནི། །ཆོ་འཕྲུལ་དག་ནི་སྟོན་པར་བྱེད། །ཡིད་ལ་བསམས་མ་ཐག་ཏུ་ནི། །རང་གི་གཟུགས་ནི་ཡོངས་བརྗེས་ཤིང་། །བཀླགས་པས་འགྲུབ་པའི་དོན་ཡོད་པ། །རིག་མའི་དབང་ཕྱུག་རྫུ་འཕྲུལ་ཆེ། །རིག་པ་འཇིག་རྟེན་གསུམ་པོ་ན། །ང་ཡི་རིག་དང་མཉམ་པ་མེད། །རྒྱུད་རྣམས་ཀུན་གྱི་ལུང་འདི་ནི། །མཛེས་མ་ཁྱོད་ལ་བཤད་པ་ཡིན། །རྣལ་འབྱོར་མའི་དབང་ཕྱུག་མའི་རིག་མ་ཆེན་མོ་ལས་དངོས་གྲུབ་ཀྱི་མཚན་མ་བསྟན་པ་སྟེ་ལེའུ་དང་པོའོ།། །།དེ་ནས་དེ་ལས་རྣལ་འབྱོར་མའི་དབང་ཕྱུག་ཆེན་མོ་རྣམས་ཀྱི་སྦྱོར་བའི་དངོས་གྲུབ་ཀྱི་འབྲས་བུ་རབ་ཏུ་སྟེར་བའི་གསང་བའི་ཡི་གེ་བཟང་པོ་བཤད་པར་བྱ་སྟེ། གང་ཞིག་བསམས་པ་ཙམ་གྱིས་ནི། །རྣལ་འབྱོར་མ་མཆོག་སྟེར་འགྱུར་བ། །དང་པོའི་ཡི་གེའི་སྦྱོར་བ་ཡིས། །རྟག་ཏུ་དགུགས་ནི་གཏང་བར་བྱ། །བརྒྱད་པའི་མཐའ་དང་ཡང་དག་ལྡན། །ཨུ་དང་ཐིག་ལེར་བཅས་པ་ཡིས། །རྣལ་འབྱོར་པ་ཡི་དབུགས་རྔུབ་བྱེད། །དངོས་དང་དངོས་མེད་རྣམ་སྤངས་པའོ། །དེ་ལ་བརྟུལ་ཞུགས་མ་བཤད་དེ། །ཕྲེང་བ་སྔགས་དང་གཟུང་བ་དང་། །སྦྱིན་སྲེག་གི་ནི་ལས་རྣམས་ཀྱང་། །གཅིག་ནས་གཅིག་ཏུ་ལྡོག་པར་འགྱུར། །སྔགས་དང་དབྱིབས་དང་ཆོས་བདག་ཉིད། །སྦྱོར་བ་རྣམ་གསུམ་ཞེས་བྱ་སྟེ། །ཡེ་ཤེས་རྣམ་པ་གསུམ་གྱིས་ནི། །སྲིད་པའི་ཉེས་པས་གོས་མི་འགྱུར། །དེ་ལྟར་རྒྱུན་དུ་རྣལ་འབྱོར་པ། །རྟག་ཏུ་གོམས་པ་ཉིད་ཀྱིས་ནི། །རྡོ་རྗེ་སེམས་དཔའ་དང་མཉམ་པའང་། །ཟླ་བ་གཅིག་གིས་དེ་འགྲུབ་འགྱུར།