Degé Kangyur volume 79, F.189.a

མ་ཚང་བ་ལས་མ་ཡིན་ཏེ། །​འབྲུ་ཉམས་པ་ལས་མྱུ་གུ་མེད། །​རྒྱུ་མེད་པ་ལས་མ་ཡིན་ཏེ། །​ནམ་མཁའི་མེ་ཏོག་ལས་ནི་དྲི། །​རྒྱུ་དེ་རྐྱེན་མེད་པ་ལས་མིན། །​ནགས་སྲེག་མེ་ལ་རླུང་མེད་བཞིན། །​དེ་ལྟར་ཡན་ལག་བཞི་ལྡན་པའི། །​ལས་དང་པོ་ཡིས་རྣམ་རྟོག་སྤང་། །​ལྷ་ཡི་རྣལ་འབྱོར་ལ་གནས་པས། །​བསྐྱེད་པ་ཞེས་ནི་གསུངས་པ་ཡིན། །​ཕྱི་དང་ནང་དུ་དུ་མའི་ཆ། །​དེ་ཡི་རིམ་པར་བཤད་པ་ཡིན། རྟེན་གྱི་དཀྱིལ་འཁོར་བྱེ་བྲག་ཀྱང་། །​ཁྱམས་དང་བླ་གབ་མེད་པ་དང་། །བླ་གབ་བཅས་དང་རྣམ་པ་གསུམ། །​མོས་པའི་དབང་དུ་གསུངས་པ་ཡིན། །​འཁོར་ལོ་བཞི་ཡི་དབྱེ་བ་ཡིས། །​ཉིན་ཐུན་བཞི་ཡི་དབྱེ་བ་ཡི། །​ཉིན་མཚན་བཞི་རུ་གསུངས་པ་ཡིན། །​མཚམས་ཀྱང་བཞི་རུ་ཤེས་པར་བྱ། །​དབྱུག་གུ་ཆུ་ཚོད་འཕོ་བ་དང་། །​ཐུན་བརྒྱད་བསྒོམ་པའི་རྣལ་འབྱོར་པས། །​ཐུན་དང་མཚམས་ནི་མཉམ་པར་གསུངས། །​མཚམས་ཀྱི་ཚེ་ན་རྣལ་འབྱོར་པ། །​དབང་པོ་འབྲིང་དང་ཐ་མ་ཡིས། །​ལྷ་རྣམས་རྫོགས་པར་སྤྲོ་བྱས་ལ། །​མར་མེ་གཅིག་ལས་གཉིས་ཀྱི་ཚུལ། །མཆོད་པ་ལ་སོགས་ཚུལ་བཞིན་བྱ། །​ལྟ་བ་ཞེས་པ་མཉམ་གཞག་སྟེ། །​རྗེས་ཐོབ་སྤྱོད་པ་རུ་ནི་བཤད། །​བསྐྱེད་པའི་རིམ་པ་བསྒོམ་པ་ལས། །​རྒྱན་དྲུག་འཆང་བའི་སྤྱོད་པ་གནང་། །​གསང་བའི་དབང་དང་འབྲེལ་བ་ལ། །​རྒྱན་དང་བདུད་རྩིའི་སྤྱོད་པ་གནང་། །རྡོ་རྗེའི་རིགས་དང་རིན་ཆེན་རིགས། །​པདྨའི་རིགས་དང་ལས་ཀྱི་རིགས། །​སྤྱོད་པ་གནང་བ་ང་ཡིས་གསུངས། །​ཤེས་རབ་ཡེ་ཤེས་དང་འབྲེལ་བས། །​གོང་དུ་གསུངས་པ་ཐུན་མོང་སྟེ། །​ཁྱད་པར་ཕྱག་རྒྱའི་སྤྱོད་པ་གནང་། །​ལྟ་བ་མི་ལྡན་སྤྱོད་པ་དང་། །སྤྱོད་པ་མི་ལྡན་ལྟ་བ་གཉིས། །​འདི་ནི་གསང་སྔགས་དམ་སྲི་སྟེ། །​མནར་མེད་སེམས་ཅན་དམྱལ་བར་སྐྱེ། །​དེ་ཕྱིར་ལྟ་མེད་སྤྱོད་པ་སྤང་། །​སྲིན་པོ་ཁྲོས་པའི་སྤྱོད་པའོ། །​སྤྱོད་མེད་ལྟ་བའང་སྤང་བ་སྟེ། །​དཀའ་ཐུབ་ཀྱིས་ནི་ལུས་གདུངས་ཤིང་། །​ཕུང་སོགས་



The English translation of this folio by 84000 Translating the words of the Buddha can be found at:
https://read.84000.co/translation/toh384.html?part=UT22084-079-011-370#UT22084-079-011-370