Degé Kangyur volume 61, F.149.a

པ་ལ་བལྟ་བར་འདོད་པ་དང་། མཆོད་པར་འོས་པ་དང་། ཆོས་ཉན་པར་འདོད་པ་དང་། ཟླ་བའི་དཀྱིལ་འཁོར་བཞིན་དུ་འདོད་པར་གྱུར་པ་དེའི་ཚེ་ལྷ་དང་མི་རྣམས་ཀྱི་སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བར་བྱ་བ་དང་། དཀོན་མཆོག་གསུམ་གསལ་བར་བྱ་བ་དང་། རྒྱས་པར་བྱ་བའི་ཕྱིར་དེ་བཞིན་གཤེགས་པ་འཇིག་རྟེན་དུ་འབྱུང་མོད་ཀྱི། དེ་བཞིན་གཤེགས་པ་ལ་སྐྱེ་བ་མེད་དེ། རྒ་བ་དང་འཆི་བ་ཡང་མེད་དོ། །​རིགས་ཀྱི་བུ་འདི་ལྟ་སྟེ། དཔེར་ན་མེ་ལོང་གི་དཀྱིལ་འཁོར་ཤིན་ཏུ་ལེགས་པར་ཕྱིས་པ་ལ་གཟུགས་སྣ་ཚོགས་སྣང་བར་འགྱུར། མི་སྣང་བར་ཡང་འགྱུར་མོད་ཀྱི། གཟུགས་བརྙན་ནི་དེར་འོང་བ་དང་། འགྲོ་བར་སྣང་བ་ནི་མེད་དོ། །​ལྷའི་བུ་དག་དེ་བཞིན་གཤེགས་པའི་སྐུ་ལ་ཡང་དེ་ལྟར་བལྟ་བར་བྱའོ། །​རིགས་ཀྱི་བུ་འདི་ལྟ་སྟེ། དཔེར་ན་སྒྱུ་མ་བྱེད་པ་ལེགས་པར་བསླབས་པ་ནི་གྲོང་ཁྱེར་དང་། རྟ་བབས་དང་། སྐྱེད་མོས་ཚལ་སྣ་ཚོགས་དང་། ཤིང་རྟ་སྣ་ཚོགས་དང་། འཁོར་ལོས་སྒྱུར་བའི་གཟུགས་དང་། དགའ་བ་དང་། རྩེ་བ་སྣ་ཚོགས་བསྟན་ཏེ་མི་སྣང་བར་བྱེད་ཀྱང་དེ་ལ་འཕོ་བ་ཡང་མེད། འོང་བ་ཡང་མེད། འགྲོ་བ་ཡང་མེད་དོ། །​དེ་བཞིན་དུ། དེ་བཞིན་གཤེགས་པ་རྣམས་འབྱུང་བ་དང་། ཡོངས་སུ་མྱ་ངན་ལས་འདའ་བ་ལ་ཡང་བལྟ་བར་བྱའོ། །​ཡང་ལྷའི་བུ་དག་སྔོན་གྱི་སྨོན་ལམ་གྱིས་དེ་བཞིན་གཤེགས་པ་མྱ་ངན་ལས་འདས་ནས་ལོ་སྟོང་ལོན་པའམ། མྱ་ངན་ལས་འདས་ནས་བསྐལ་པར་ལོན་པའམ། མྱ་ངན་ལས་འདས་ནས་བསྐལ་པ་བྱེ་བར་ལོན་ཡང་སེམས་ཅན་རྣམས་ཀྱིས་མཆོད་པར་བྱ་བ་དང་། བཀུར་སྟིར་བྱ་བ་དང་། རིང་བསྲེལ་གྱི་མཆོད་རྟེན་བྱེད་དུ་གཞུག་པ་དང་། སྐུ་གཟུགས་བྱེད་དུ་གཞུག་པ་དང་། མཚན་ནས་བརྗོད་པ་དང་། དམ་པའི་ཆོས་འཛིན་པ་དང་། མཆོད་པ་བྱེད་པའི་སེམས་ཅན་འཇིག་རྟེན་གྱི་ཁམས་སྣ་ཚོགས་ན་གནས་པ་རྣམས་ཐར་པར་མཛད་དེ། སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དང་། མི་ཁོམ་པ་དང་། ངན་སོང་དང་། ངན་འགྲོ་ལོག་པར་ལྟུང་བ་ཐམས་ཅད་དང་། སྡུག་



The English translation of this folio by 84000 Translating the words of the Buddha can be found at:
https://read.84000.co/translation/toh186.html?part=UT22084-061-006-243#UT22084-061-006-243