།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་རང་རང་གི་ཏིང་ངེ་འཛིན་ལ་མཉམ་པར་གཞག་སྟེ་བལྟས་ན། འཇིག་རྟེན་གྱི་ཁམས་མི་མཇེད་དེ་ཉིད་ནས་བདག་ཉིད་གང་དུ་ཡང་མ་གཡོས་པར་མཐོང་སྟེ། ངོ་མཚར་དུ་གྱུར་རྨད་དུ་གྱུར་ནས། འདི་ལྟར་བདག་ཅག་སྟན་འདི་ཉིད་ལས་མ་འཕགས་པར་འཇིག་རྟེན་གྱི་ཁམས་རིན་པོ་ཆེ་དང་ལྡན་པ་ཞེས་བྱ་བར་ཡང་ཕྱིན་པ་སྙམ་བྱེད་དེ། འཇམ་དཔལ་གཞོན་ནུར་གྱུར་པའི་བྱིན་གྱི་རླབས་མེད་པའི་ཚུལ་གྱིས་བྱིན་གྱི་རླབས་བསམ་གྱིས་མི་ཁྱབ་པོ་ཞེས་ཆེད་དུ་བརྗོད་པ་ཆེད་དུ་བརྗོད་དོ། །དེ་དག་གིས་ཡང་སྨྲས་པ། བཅོམ་ལྡན་འདས་སེམས་ཅན་ཐམས་ཅད་ཀྱིས་ཀྱང་མི་དམིགས་པའི་ཚུལ་གྱིས་བྱིན་གྱི་རླབས་འདི་ཐོབ་པར་གྱུར་ཅིག །དེ་ནས་བཅོམ་ལྡན་འདས་ཤཱཀྱ་ཐུབ་པས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ལ་བཀའ་སྩལ་པ། རིགས་ཀྱི་བུ་དག་འདི་ལྟ་སྟེ། དཔེར་ན་ནམ་མཁའ་ནི་སའི་སྣོད་དང་། ཤིང་གི་སྣོད་དང་། ཁར་བའི་སྣོད་དང་། ཟངས་ཀྱི་སྣོད་དང་། དངུལ་གྱི་སྣོད་དང་། གསེར་གྱི་སྣོད་དང་། ནོར་བུ་དང་། མུ་ཏིག་དང་། བཻ་དཱུརྱ་དང་། དུང་དང་། མན་ཤེལ་དང་། བྱི་རུ་དང་། ཨ་མྲ་གར་བ་དང་། སྤུག་དང་། དུང་གཡས་ཕྱོགས་སུ་འཁྱིལ་བ་དང་། མུ་ཏིག་དམར་པོའི་སྣོད་ལ་སོགས་པའི་ནང་དུ་ཞུགས་པར་གྱུར་པ་རིགས་ཀྱི་བུ་དག་ཀུན་རྫོབ་ཏུ་སྣོད་ལ་ཐ་དད་པ་ཡོད་མོད་ཀྱི་ནམ་མཁའ་ལ་ཐ་དད་ཡོད་པ་མ་ཡིན་ནོ། །དེ་ཅིའི་ཕྱིར་ཞེ་ན། དོན་དམ་པར་ན་ནམ་མཁའ་ཤིན་ཏུ་དངོས་པོ་མེད་པའི་ཕྱིར་ཏེ། དེ་བཞིན་དུ་རིགས་ཀྱི་བུ་དག་དོན་དམ་པར་ཆོས་ཐམས་ཅད་ཤིན་ཏུ་མ་སྐྱེས། མ་བྱུང་། དངོས་པོ་མེད་མོད་ཀྱི། འཇིག་རྟེན་ཀུན་རྫོབ་ཀྱི་ཐ་སྙད་ཀྱིས་ཐ་སྙད་དུ་འདོགས་ཤིང་རབ་ཏུ་འཇོག་སྟེ། འདི་ནི་གཟུགས་སོ། །འདི་ནི་ཚོར་བའོ། །འདི་ནི་འདུ་ཤེས་སོ། །འདི་དག་ནི་འདུ་བྱེད་རྣམས་སོ། །འདི་ནི་རྣམ་པར་ཤེས་པའོ། །འདི་དག་ནི་སྐྱེ་མཆེད་རྣམས་སོ། །འདི་དག་ནི་ཁམས་རྣམས་སོ། །འདི་ནི་སངས་རྒྱས་དཀོན་མཆོག་གོ། །འདི་ནི་ཆོས་དཀོན་མཆོག་གོ། །འདི་ནི་དགེ་འདུན་དཀོན་མཆོག་གོ། །འདི་ནི་ཉན་ཐོས་ཀྱི་ཐེག་པའོ། །འདི་ནི་རང་སངས་རྒྱས་ཀྱི་ཐེག་པའོ། །འདི་ནི་བླ་ན་མེད་པའི་ཐེག་པ་ཆེན་པོའོ། །འདི་དག་ནི་དགེ་བ་བཅུའི་ལས་ཀྱི་ལམ་རྣམས་སོ། །འདི་དག་ནི་མི་དགེ་བ་བཅུའི་ལས་ཀྱི་ལམ་རྣམས་སོ། །འདི་དག་ནི་སེམས་ཅན་དམྱལ་བའོ། །འདི་དག་ནི་དུད་འགྲོའི་སྐྱེ་གནས་སོ། །འདི་དག་ནི་ཡི་དགས་ཀྱི་ཡུལ་ལོ།