།སེམས་ཅན་དེ་དག་ལ་ཡང་ཐ་བ་དང་སྡང་བའི་སེམས་བསྐྱེད་པར་མི་བྱའོ་སྙམ་པའི་སྟེང་དུ་དེས་སེམས་ཅན་དེ་དག་ལ་བྱམས་པའི་སེམས་བསྐྱེད་པར་བྱའོ། །རིགས་ཀྱི་བུ་དཔེར་ན་སྨན་གྱི་ཤིང་ལྗོན་པ་ནི་རྩ་བ་ལས་ཁྱེར་རམ། སྡོང་པོའམ། ཡལ་གའམ། ཤུན་ལྤགས་སམ། ལོ་མའམ། མེ་ཏོག་གམ། འབྲས་བུའམ། སྙིང་པོ་ལས་ཁྱེར་ན། འདི་སྙམ་དུ་བདག་གི་རྩ་བ་ཁྱེར་ལ་སྡོང་པོ་མ་ཁྱེར་ཅིག་ཅེའམ། བདག་གི་སྡོང་པོ་ཁྱེར་ལ་རྩ་བ་མ་ཁྱེར་ཅིག་ཅེའམ། བདག་གི་ཡལ་ག་ཁྱེར་ལ་ལོ་མ་མ་ཁྱེར་ཅིག་ཅེའམ། བདག་གི་ལོ་མ་ཁྱེར་ལ་ཡལ་ག་མ་ཁྱེར་ཅིག་ཅེའམ། དེ་བཞིན་དུ་བདག་གི་ཡལ་ག་ཕྲེའུ་དང་། མེ་ཏོག་དང་། འབྲས་བུ་དང་། ཤུན་ལྤགས་དང་། སྙིང་པོ་ལས་ཁྱེར་ལ་སྙིང་པོ་མེད་པ་ལས་མ་ཁྱེར་ཅིག་ཅེའམ། བདག་གི་སྙིང་པོ་མེད་པ་ལས་ཁྱེར་ལ་སྙིང་པོ་ལས་མ་ཁྱེར་ཅིག་སྙམ་དུ་རྟོག་པར་མི་བྱེད་དེ། དེ་ལྟར་ན་སྨན་གྱི་ཤིང་ལྗོན་པ་ནི་ཐམས་ཅད་ཀྱི་ཐམས་ཅད་དུ་རྣམ་པར་རྟོག་པར་མི་བྱེད་མོད་ཀྱི། འོན་ཀྱང་སྨན་གྱི་ཤིང་ལྗོན་པ་ནི་རྣམ་པར་མི་རྟོག་བཞིན་དུ་ནད་རབ་དང་། འབྲིང་དང་། ཐ་མ་སེལ་བར་བྱེད་པ་དེ་བཞིན་དུ་རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་འབྱུང་བ་ཆེན་པོ་བཞིའི་ལུས་འདི་ལ་སྨན་གྱི་ཤིང་ལྗོན་པ་ལྟ་བུའི་འདུ་ཤེས་བསྐྱེད་པར་བྱའོ། །སེམས་ཅན་གང་དང་གང་དག་ལ་ཅི་དང་ཅི་དགོས་པ་དེ་དང་དེ་དེ་བཞིན་དུ་ཁྱེར་ཅིག་ཅེས་བྱས་ཏེ། ལག་པ་འདོད་པ་ལ་ནི་ལག་པ། རྐང་པ་འདོད་པ་ལ་ནི་རྐང་པ། མིག་འདོད་པ་ལ་ནི་མིག །ཤ་འདོད་པ་ལ་ནི་ཤ།།ཁྲག་འདོད་པ་ལ་ནི་ཁྲག །རུས་པ་འདོད་པ་ལ་ནི་རུས་པ། རྐང་འདོད་པ་ལ་ནི་རྐང་། མགོ་བོ་འདོད་པ་ལ་ནི་མགོ་བོ། ཡན་ལག་དང་ཉིང་ལག་ཐམས་ཅད་འདོད་པ་ལ་ནི་བདག་གི་ཡན་ལག་དང་ཉིང་ལག་ཐམས་ཅད་ཁྱེར་ཅིག་སྙམ་སྟེ། རིགས་ཀྱི་བུ་དེ་ལྟར་སེམས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སྦྱིན་པའི་ཚོགས་ཀྱིས་བསོད་ནམས་མི་ཟད་པས་མངོན་པར་འབྱུང་བ་ཡིན་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དེས་སྦྱིན་པ་བྱིན་པ་ན་སེམས་ཅན་སེར་སྣ་ཅན་རྣམས་ཀྱི་གཏོང་བ་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་བསྔོ་བར་བྱའོ། །སེམས་ཅན་དབུལ་པོ་རྣམས་ཀྱིས་ལོངས་སྤྱོད་ཆེན་པོ་འཐོབ་པར་བྱ་བའི་ཕྱིར་ཡོངས་སུ་བསྔོ་བར་བྱའོ།