Degé Kangyur volume 55, F.12.a

རབ་མེད། །​དེ་བཞིན་རྣལ་འབྱོར་མི་བརྩོན་པ། །​རྣམ་གྲོལ་བསྔགས་པས་འཚོ་བ་དག །​ཕྱི་མའི་དུས་ལ་འབྱུང་འགྱུར་ཏེ། །​དེ་དག་ལ་ནི་རྣམ་གྲོལ་མེད། །​ཇི་ལྟར་སྐྱེས་བུ་དབུལ་པོ་ལ་ལ་ཞིག །​སྐྱེ་བོ་མང་པོས་ཡོངས་སུ་བརྙས་གྱུར་ལ། །​དེ་ཡིས་ཕྱིས་གདོད་ནོར་གྱི་གཏེར་རྙེད་ནས། །​ནོར་ཡོད་རིག་པས་སྐྱེ་བོ་རི་མོར་བྱེད། །​དེ་བཞིན་ཏིང་འཛིན་འདི་ནི་མ་ཐོབ་ན། །​བྱང་ཆུབ་སེམས་དཔའ་དེ་ཡང་ལྷ་མི་དང་། །​གྲུལ་བུམ་སྲིན་པོ་མང་པོས་མི་བཀུར་ཏེ། །​ཇི་ལྟར་སྐྱེས་བུ་དབུལ་པོ་ནོར་མེད་བཞིན། །​མཁས་པས་གཞལ་དུ་མེད་པའི་ཆོས་ཀྱི་གཏེར། །​ས་འདི་ནམ་ཞིག་རབ་ཏུ་ཐོབ་གྱུར་ན། །​ལྷ་དང་མི་དག་དེ་ལ་རེ་བ་སྐྱེད། །​དེས་ཀྱང་སྐྱེ་དགུ་བླ་མེད་ནོར་རྣམས་བྱིན། །​དེ་ཕྱིར་རྒྱལ་བ་དག་གིས་བརྗོད་པ་ཡི། །​ཕན་ཡོན་དམ་པ་བཟང་པོ་འདི་ཐོས་ནས། །​ཤེས་ཀྱི་ཁེ་དང་བདེ་རྙེད་ཀུན་སྤངས་ཏེ། །​ཏིང་འཛིན་ཞི་མཆོག་འདི་ནི་ལུང་ནོད་གྱིས། །​སངས་རྒྱས་སུ་དག་ཕྱོགས་སུ་མྱ་ངན་འདས། །​གང་དག་ད་ལྟར་བྱུང་དང་མ་འོངས་པ། །​དེ་དག་ཐམས་ཅད་ཏིང་འཛིན་འདི་བསླབས་ནས། །​བྱང་ཆུབ་བསམ་ཡས་མཚུངས་མེད་རྣམ་སངས་རྒྱས། །​ཟླ་འོད་གཞོན་ནུར་གྱུར་པ་སེམས་དགའ་ནས། །​སངས་རྒྱས་སྤྱན་སྔར་འདུག་སྟེ་ཚིག་སྨྲས་པ། །སྐྱེས་བུ་དམ་པ་མྱ་ངན་ཡོངས་འདས་ནས། །​མ་རུངས་དུས་ན་བདག་གིས་མདོ་འདི་གཟུང་། །​བདག་གིས་ལུས་དང་སྲོག་ཀྱང་ཡོངས་བཏང་སྟེ། །​འཇིག་རྟེན་སྐྱེད་པ་ཅི་མཆིས་ཀུན་བཏང་ལ། །​བདག་གིས་འཇིགས་པ་ཆེན་པོའི་དུས་དེར་ཡང་། །​ཏིང་འཛིན་ཞི་མཆོག་འདི་ནི་གཟུང་བར་བགྱི། །​སེམས་ཅན་མང་ལ་སྙིང་རྗེ་ཆེར་སྐྱེད་དེ། །​སེམས་ཅན་སྡུག་བསྔལ་མགོན་མེད་མཐོང་ནས་ཀྱང་། །​དེ་དག་ལ་ནི་བྱམས་པ་ཉེར་སྦྱར་ཞིང་། །​ཏིང་འཛིན་ཞི་མཆོག་འདི་ནི་གཟུང་བར་བགྱི། །​དེ་ཡི་ཚེ་ན་ཏིང་འཛིན་འཛིན་པ་དག །​ལྔ་བརྒྱ་ལས་ནི་མི་ཉུང་དེར་བྱུང་སྟེ། །མདོ་སྡེ་མཆོག་འདི་རྒྱ་ཆེར་གཟུང་བ་ལ། །​དེ་དག་སྔོན་དུ་འདྲེན་པ་གཞོན་ནུ་ཡིན། །​སངས་རྒྱས་ཀྱི་ཡོན་ཏན་ཡང་དག་པར་བསྔགས་པའི་ལེའུ་སྟེ་གསུམ་པའོ།​། །​།འཕགས་པ་ཏིང་ངེ་འཛིན་གྱི་རྒྱལ་པོ། བམ་པོ་གཉིས་པ། དེ་ནས་ཟླ་འོད་གཞོན་ནུར་གྱུར་



The English translation of this folio by 84000 Translating the words of the Buddha can be found at:
https://read.84000.co/translation/toh127.html?part=UT22084-055-001-5855#UT22084-055-001-5855