Degé Kangyur volume 51, F.204.a

ར་བཱི་ར་དང་། པ་ཊ་ལ་དང་། ཨ་ཏེ་མུག་ཏ་ཀ་དང་། དབྱར་གྱི་དྲི་དང་། གཞན་ཡང་ཤིང་གི་མེ་ཏོག་ཡིད་དགའ་བ་དག་བྱུང་སྟེ། ཛེ་ཏའི་ཚལ་གྱི་གཙུག་ལག་ཁང་དེ་ཡོངས་སུ་མཛེས་པར་བྱས་པ་ཉིད་དུ་སྣང་ངོ་། །​དེ་ནས་འཁོར་དེ་ཉིད་ཀྱི་ནང་ནས་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །​བཅོམ་ལྡན་འདས་བདག་ནི་ཤིན་ཏུ་ངོ་མཚར་རྨད་དུ་བྱུང་བ་ཐོབ་བོ། །​བཅོམ་ལྡན་འདས་འོད་ཟེར་ཆེན་པོ་འདི་དག་ག་ལས་མཆིས། རྫུ་འཕྲུལ་གྱི་ཡུལ་གྱི་མཐུ་འདི་སུའི་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའ་སྤྱན་རས་གཟིགས་ཀྱི་དབང་པོ་འདི་ནི་མནར་མེད་པའི་སེམས་ཅན་དམྱལ་བ་ཆེན་པོར་ཞུགས་ནས་སེམས་ཅན་རྣམས་ཡོངས་སུ་སྨིན་པར་བྱེད་དེ། ཡོངས་སུ་སྨིན་པར་བྱས་ནས་ཡི་དགས་ཀྱི་གྲོང་ཁྱེར་དུ་འདུག་གོ། །​དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །​བཅོམ་ལྡན་འདས་མནར་མ་མཆིས་པའི་སེམས་ཅན་དམྱལ་བ་ཆེན་པོ་ན་མནར་མི་གདའ་ན། བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་པོ་འཇུག་པར་བགྱིད། སེམས་ཅན་དམྱལ་བ་ཆེན་པོ་ལྕགས་ཀྱི་རྩིག་པས་བསྐོར་ལ། ལྕགས་ཀྱི་དོག་ས་ལ་ཤིན་ཏུ་འབར་བ། མེ་ལྕེ་གཅིག་ཏུ་འདུས་པ། རྣམ་པར་གཡོ་བ་དེ་ན་འབོད་གྲོགས་པ་དག་གནས་པའི་སྣོད་ཟ་མ་ཏོག་འདྲ་བ་མཆིས་ཏེ། སྣོད་དེར་སེམས་ཅན་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་སྩལ་ཏོ། །​ནམ་ཆུ་མང་པོ་མཆིས་པའི་སྣོད་ན་སྲན་ཆུང་ཀ་རུའམ། ན་གུ་གྱེན་དུ་མཆི་ན་ཡང་བྲེལ་བ་དང་སྨིན་པར་འགྱུར། ཐུར་དུ་མཆི་ན་ཡང་བྲེལ་བ་དང་སྨིན་པར་འགྱུར་བ་དེ་བཞིན་



The English translation of this folio by 84000 Translating the words of the Buddha can be found at:
https://read.84000.co/translation/toh116.html?part=UT22084-051-004-1012#UT22084-051-004-1012