Degé Kangyur volume 51, F.35.a

བ་ལ། །​སེམས་ཅན་དག་ནི་ཕན་ཚུན་རྣམ་པར་ཟ། །​ངན་སྐྱུགས་ཚིག་པའི་དྲི་ང་ཡིད་མི་འོང་། །​འཇིག་རྟེན་དག་ན་ཕྱོགས་བཞིར་རབ་ཏུ་འཐུལ། །​སྲིན་བུ་རྐང་བརྒྱ་པ་དག་བྲོས་པ་ལ། །​དེ་ལ་གྲུལ་བུམ་དག་ནི་ཤིན་ཏུ་ཟ། །​བཀྲེས་པ་དང་ནི་སྐོམ་པས་རབ་གདུངས་ཤིང་། །​ཡི་དགས་རྣམས་ཀྱང་སྒྲ་འབར་ཀུན་འཕྱན་ཏེ། །​དེ་ལྟར་ཁྱིམ་དེ་ཤིན་ཏུ་མི་བཟད་འཇིགས། །​མེ་ལྕེ་དག་ནི་སྟོང་སྙེད་འབར་བར་འགྱུར། །​སྐྱེས་བུ་ཁྱིམ་དེའི་བདག་པོ་དེ་ཉིད་ནི། །​ཤིན་ཏུ་རྣམ་པར་ལྟ་ཞིང་སྒོ་ན་འདུག །​དེ་ན་དེ་ཡིས་ཐོས་པ་བདག་གི་བུ། །འདི་ལྟར་བྱིས་པ་དག་ནི་མི་ཤེས་པས། །​རྩེད་མོ་རྩེན་པ་དག་ལ་ཆགས་པའི་བློ། །​རྩེད་མོ་དགའ་འམ་རབ་ཏུ་དྲེགས་མྱོས་ཞེས། །​དེ་ཐོས་བདག་གི་བྱིས་པ་ཁྱེའུ་འདི་ཀུན། །​མྱུར་དུ་ཚིག་ཅིང་ཆུད་ཟོས་མི་འགྱུར་བར། །​བདག་གི་བུ་རྣམས་རབ་ཏུ་ཐར་བྱའི་ཕྱིར། །​ཁྱིམ་དེའི་ནང་དུ་མྱུར་དུ་ཞུགས་ནས་སུ། །​དེ་ལ་དེས་ནི་ཁྱིམ་གྱི་ཉེས་བརྗོད་དེ། །​སྡུག་བསྔལ་འདི་དག་མི་བཟད་རིགས་ཀྱི་བུ། །​སེམས་ཅན་རྣམ་པ་མང་ཞིང་མེ་འདི་དང་། །​སྡུག་བསྔལ་ཆེན་པོ་དག་ཀྱང་གཅིག་ཕྱི་གཅིག །​སྦྲུལ་གདུག་ཤིན་ཏུ་གཏུམ་སེམས་གནོད་སྦྱིན་དང་། །གྲུམ་བུམ་དང་ནི་ཡི་དགས་མང་པོ་གནས། །​ཅེ་སྤྱང་དག་དང་ཝ་དང་ཁྱི་ཡང་མང་། །​བྱ་རྒོད་དག་ཀྱང་ཁ་ཟས་ཀུན་ཏུ་ཚོལ། །​དེ་འདྲ་བ་དག་འདི་ན་མང་གནས་ཏེ། །​མེ་མེད་ཟིན་ཡང་ཤིན་ཏུ་མི་བཟད་འཇིགས། །​འདི་ཡི་ཁོ་ར་ཡུག་ཏུ་མེ་འབར་ཏེ། །​འདི་ན་དེ་འདྲའི་སྡུག་བསྔལ་འབའ་ཞིག་གོ། །​དེ་ལྟར་བྱིས་པའི་བློ་ཅན་དེ་སྦྲན་ཏེ། །​གཞོན་ནུ་རྣམས་ནི་རྩེད་མོས་རབ་མྱོས་པས། །​ཕ་ཡིས་བསྒོ་བ་དེ་ལ་མི་སེམས་ཏེ། །​དེ་དག་གི་ནི་ཡིད་ལ་ཅི་མི་སྙམ། །​དེ་ཚེ་སྐྱེས་བུ་དེ་ནི་ཡང་སེམས་པ། །​བུ་ཕྱིར་སེམས་པས་བདག་ནི་སྡུག་བསྔལ་ཏེ། །​བདག་གི་བུ་དང་རྒྱུད་དག་མེད་པ་རུ། །​མེ་འདིས་འདི་དག་ཚིག་ན་མི་རུང་ཞེས། །​དེ་ཡི་དུས་ན་དེ་ཡི་ཐབས་བསམས་པ། །​རྩེད་མོ་དག་ལ་བྱིས་པ་འདི་ཆགས་ཏེ། །​འདི་ན་རྩེད་མོ་དགའ་བ་ཅི་ཡང་མེད། །​ཀྱེ་མ་འདི་ལྟར་བྱིས་པ་གླེན་ཞིང་རྨོངས། །​དེ་ལ་དེ་ཡིས་



The English translation of this folio by 84000 Translating the words of the Buddha can be found at:
https://read.84000.co/translation/toh113.html?part=UT22084-051-001-6070#UT22084-051-001-6070