དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་ཐབས་ལ་མི་མཁས་པ་ལགས་པར་རིག་པར་བགྱི་ལགས་སོ། །དེ་ནས་ཚེ་དང་ལྡན་པ་རབ་འབྱོར་གྱིས། ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཤ་ར་དྭ་ཏིའི་བུ་བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ན། གལ་ཏེ་གཟུགས་ལ་གནས་ཤིང་ཀུན་ཏུ་ཤེས་ཏེ་མོས། དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་གནས་ཤིང་ཀུན་ཏུ་ཤེས་ཏེ་མོས་ལ། དེ་གཟུགས་ལ་གནས་ཤིང་ཀུན་ཏུ་ཤེས་ཏེ་མོས་པ་དང་། དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་གནས་ཤིང་ཀུན་ཏུ་ཤེས་ཏེ་མོས་པར་བྱེད་པ་ན། གཟུགས་ཀྱི་མངོན་པར་འདུ་བྱེད་པ་ལ་སྤྱོད་པ་ཡིན། དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པའི་མངོན་པར་འདུ་བྱེད་པ་ལ་སྤྱོད་པ་ཡིན་ནོ། །གཟུགས་ཀྱི་མངོན་པར་འདུ་བྱེད་པ་ལ་སྤྱོད་པ་ནས་རྣམ་པར་ཤེས་པའི་མངོན་པར་འདུ་བྱེད་པའི་བར་ལ་སྤྱོད་ན་དེ་ནི་ཚེ་རབས་ཕྱི་མ་ལ་སྐྱེ་བ་ལས་ཡོངས་སུ་མི་ཐར་ཞིང་། དེ་ནི་རྒ་བ་ནས་འཁྲུག་པ་དང་། སྡུག་བསྔལ་གྱི་བར་ལས་ཡོངས་སུ་མི་ཐར་བར་ཁོ་བོ་སྨྲའོ། །ཤ་ར་དྭ་ཏིའི་བུ་གཞན་ཡང་བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ན་ཐབས་ལ་མི་མཁས་པས་མིག་ལ་གནས་ཤིང་ཀུན་ཏུ་ཤེས་ཏེ་མོས་པར་བྱེད་པ་ནས། དེ་བཞིན་དུ་སྦྱར་ཏེ། ཡིད་ཀྱི་བར་ལ་གནས་ཤིང་ཀུན་ཏུ་ཤེས་ཏེ་མངོན་པར་ཞེན་ལ་མོས་པར་བྱེད་ན། དེ་ནི་ཚེ་རབས་ཕྱི་མ་ལ་སྡུག་བསྔལ་གྱི་བར་ལས་ཡོངས་སུ་མི་ཐར་བར་ཁོ་བོ་སྨྲའོ། །དེ་བཞིན་དུ་གལ་ཏེ་གཟུགས་ལ་གནས་ཤིང་ཀུན་ཏུ་ཤེས་ཏེ་མོས་པར་བྱེད་པ་ནས། དེ་བཞིན་དུ་སྦྱར་ཏེ། གལ་ཏེ་ཆོས་ཀྱི་བར་ལ་གནས་ཤིང་ཀུན་ཏུ་ཤེས་ཏེ་མོས་པར་བྱེད་ན། དེ་ནི་ཚེ་རབས་ཕྱི་མ་ལ་སྡུག་བསྔལ་གྱི་བར་ལས་ཡོངས་སུ་མི་ཐར་བར་ཁོ་བོ་སྨྲའོ། །གལ་ཏེ་མིག་གི་འདུས་ཏེ་རེག་པའི་རྐྱེན་གྱིས་ཚོར་བའི་བར་དང་། ཡིད་ཀྱི་འདུས་ཏེ་རེག་པའི་རྐྱེན་གྱིས་ཚོར་བའི་བར་ལ་གནས་ཤིང་ཀུན་ཏུ་ཤེས་ཏེ་མོས་པར་བྱེད་ན། དེ་ནི་ཚེ་རབས་ཕྱི་མ་ལ་སྡུག་བསྔལ་གྱི་བར་ལས་ཡོངས་སུ་མི་ཐར་བར་ཁོ་བོ་སྨྲའོ། །གལ་ཏེ་དྲན་པ་ཉེ་བར་གཞག་པ་རྣམས་ལ་གནས་ཤིང་ཀུན་ཏུ་ཤེས་ཏེ་མོས་པར་བྱེད་པ་ནས།