།རྒྱལ་གྱི་ཟླ་བ་ལ་བྷྲྀཾ་ག་རཱ་ཛའི་རྩ་བ་རང་གི་ཁུ་བ་དང་སྦྱར་ནས་བྱུགས་ན་དེ་བཞིན་ནོ། །ཀ་ར་བཱི་ར་དཀར་པོའི་འཁྲི་ཤིང་དང་། རྩངས་པའི་ཁྲག་གིས་མཉེ་བར་བྱས་ནས། ཤྨ་ཐ་དང་། བྷྲྀཾ་ག་རཱ་ཛ་མ་ཉེས་ནས་རབ་ཏུ་བྱུགས་ན་ཡང་དེ་བཞིན་དུ་འགྱུར་རོ། །ཞེས་པ་ནི་དཔའ་བོ་གཅིག་པ་ཉིད་དུ་གསུངས་པའི་དཔལ་གཏུམ་པོ་ཁྲོ་བོ་ཆེན་པོའི་རྒྱུད་ལས། ནང་འཕེལ་བ་གཞོམ་པའི་རིམ་པར་ཕྱེ་བ་སྟེ་བཅོ་བརྒྱད་པའོ།། །།དེ་ནས་བཅོམ་ལྡན་འདས་ཀྱིས་བཀའ་སྩལ་པ། ཨ་བ་ར་ཛི་ཀ་དཀར་པོའི་རྩ་བ་དང་། ཁུ་བ་རིལ་བུ་བྱས་ནས་ཐིག་ལེ་བྱས་ན་བུད་མེད་དབང་དུ་འགྱུར་རོ། །པྲཧྨཱད་ ཎྜཱི་དང་། ཤུ་དག་དང་། རུ་རྟ་དང་། སྦྲང་ལིང་ག་ལ་བྱུགས་ནས་མཉེས་ནས་བུད་མེད་ལ་འདོད་པ་བྱས་ན་དབང་དུ་འགྱུར་རོ། །བོང་བུའི་ཁུ་བ་དང་། ཆུ་སྐྱེས་ཀྱི་གེ་སར་བཏགས་ནས། རྒྱལ་མཚན་ལ་བྱུགས་ཏེ་དཎྜ་ཨུཏྤལ་དང་། རུ་རྟ་དང་། གོ་ལ་བྱིན་ན་ཡང་དེ་བཞིན་དུ་འགྱུར་རོ། །པྲདྨཱ་དཎྜཱི་དང་། བྱི་ཏཾ་ག་དང་། རུ་རྟ་དང་། ནཱ་ག་གེ་སར་དང་། གོ་ལ་བྱིན་ན་དབང་དུ་འགྱུར་རོ། །བྱུགས་ནས་འདོད་པ་བྱས་ན་དབང་དུ་འགྱུར་རོ། །བུ་ཆུང་སོ་མ་སྐྱེས་པའི་ལྕེ་བླངས་ཏེ། གི་ཝང་དང་། བྷྲྀཾ་ག་རཱ་ཛ་དང་། སྐར་མ་རྒྱལ་ལ་རིལ་བུ་བྱས་ནས་ཐིག་ལེ་བྱས་ན་དབང་དུ་འགྱུར་རོ། །གི་ཝང་གི་རང་བྱུང་གི་མེ་ཏོག་ལ་སྤངས་ནས་ཐིག་ལེ་བྱས་ན་དབང་དུ་འགྱུར་རོ། །དུར་ཁྲོད་ཀྱི་དུ་བས་བདུགས་ནས་བུད་མེད་ལ་བསྣུན་ན་དབང་དུ་འགྱུར་རོ། །མ་ཡཱུ་ར་ཤི་ཁ་དང་། བྱ་རོག་གི་ལྕེ་དང་། རོའི་མེ་ཏོག་རྙིང་པ་སྐམ་པོའི་ཕྱེ་མ་གང་གི་སྤྱི་བོར་བྱིན་པ་དེ་དབང་དུ་འགྱུར་རོ། །བ་བླ་དང་བྱ་རོག་གི་བྲུན་བཏགས་ནས་བཟའ་བ་དང་བཏུང་བར་བྱིན་ན་དབང་དུ་འགྱུར་རོ། །བིཥྞུ་ཀཱནྟའི་རྩ་བ་ལིང་ག་ལ་བྱུགས་ནས་དགའ་བར་བྱས་ན་དེ་བཞིན་ནོ། །རྒྱུ་སྐར་རྒྱལ་ལ་དྷུ་ཏུ་རའི་རྩ་བ་དང་འབྲས་བུ་བླངས་ནས། རྒྱུ་སྐར་སྐག་ལ་ཤུན་པ་བླངས། ཧ་སྟ་ལ་ལོ་མ་བླངས། ནག་པ་ལ་མེ་ཏོག་བླངས། མཱུ་ལ་ལ་རྩ་བ་བླངས་ལ། ཆ་མཉམ་པོར་ཕྱེ་མར་བྱས་ནས། སྦྲང་དང་རིལ་བུ་བྱས་ནས། རས་སྦངས་ཏེ་སྐམ་པོར་བྱའོ། །གོ་ལ་བྱིན་ནས་ཕྱེ་མ་ཡིས་དབང་དུ་བྱེད་དོ། །ཁྱི་སྨྱོན་པའི་རྐང་པ་གཡས་པའི་སོར་མོ་སོལ་བའི་མེ་ལ་བསྲེགས་ནས་གང་གི་མིང་བྲིས་ཏེ་ཆེ་གེ་མོ་ཁུག་ཅིག་ཅེས་པས་དེ་འོང་བར་བྱེད་དོ།