།དབང་ཕྱུག་མཆོག་གིས་བཤད་དུ་གསོལ། །བཅོམ་ལྡན་འདས་ཀྱིས་བཤད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། །ཨ་ཡིག་ལས་སྦྱོར་སྐད་ཅིག་གིས། །མི་གཡོ་ནག་པོར་བསྒོམ་པར་བྱ། །དེ་ཉིད་བརྟན་པའི་སྟོབས་ཉིད་ལས། །རྣལ་འབྱོར་སངས་རྒྱས་ཐེ་ཚོམ་མེད། །མི་གཡོ་དཀར་པོ་བསྒོམ་པ་དང་། །ཡང་ན་སེར་པོའམ་དམར་པོའམ། །ཡང་ན་ལྗང་གུ་བསྒོམ་བྱས་ནས། །ཞེ་སྡང་རྡོ་རྗེ་མ་སོགས་ལྡན། །དབུས་སུ་མི་གཡོ་ལྔ་རྣམས་ཀྱིས། །བཟུང་ནས་གཅིག་ཏུ་རྣམ་པར་བསྒོམ། །ཤེས་རབ་དེ་ཡི་རིགས་ཅན་མ། །ཡང་ན་གཞན་ཡང་བསྒོམ་པར་བྱ། །དེ་ཡི་སྦྱོར་བས་རྣལ་འབྱོར་པས། །མྱུར་དུ་དངོས་གྲུབ་ཐེ་ཚོམ་མེད། །ཡང་ན་ཤེས་རབ་དང་བྲལ་བའི། །ཤིན་ཏུ་མཉམ་གཞག་བསྒོམ་པར་བྱ། །མི་གཡོ་བསྒོམ་པ་ཡོངས་རྫོགས་ན། །བྱང་ཆུབ་རྒྱལ་སྲིད་ཡང་དག་འཐོབ། །དེ་ནས་བཅོམ་ལྡན་འདས་མས་གསོལ་པ། ལྷ་ཡི་རྣམ་པར་དག་པ་གང་། །འདྲེན་པ་བདག་ནི་ཉན་པར་འཚལ། །སྔོན་དུ་གསུངས་ཉིད་དཀྱིལ་འཁོར་རྣམས། །གཙོ་བོ་བདག་ལ་རྣམ་དག་གསུངས། །དེ་ནས་བཅོམ་ལྡན་འདས་ཀྱིས་བཀའ་སྩལ་པ། །དེ་ནས་ཀུན་གྱི་སྦྱོང་བྱེད་པའི། །རྣམ་དག་བདག་གིས་རབ་བཤད་བྱ། །དེ་ལ་གྲུ་བཞི་པ་ནི་ཚད་མེད་པའི་གནས་བཞིའོ། །སྒོ་བཞི་ནི་བདེན་པ་བཞིའོ། །རྟ་བབས་བཞི་ནི་བསམ་གཏན་བཞིའོ། །ཀ་བ་བརྒྱད་ནི་འཕགས་པའི་ལམ་ཡན་ལག་བརྒྱད་དོ། །འཕར་མ་གཅིག་པ་ནི་སེམས་རྩེ་གཅིག་པ་ཉིད་དོ། །པདྨ་ནི་སྐྱེ་གནས་སོ། །ཁ་དོག་སྣ་ཚོགས་པ་ནི་སྤྲུལ་པ་སྣ་ཚོགས་པའོ། །ལྷ་དགུ་ནི་གསུང་རབ་ཡན་ལག་དགུའོ། །ཕྱོགས་དམར་པོ་ནི་འདོད་ཆགས་ཆེན་པོའོ། །མཚམས་སུ་དཀར་པོ་དང་། སེར་པོ་དང་། ལྗང་གུ་དང་། ནག་པོ་རྣམས་ནི་བྲམ་ཟེ་དང་། རྗེ་རིགས་དང་། རྒྱལ་རིགས་དང་། ད་མངས་རིགས་རྣམས་ཉིད་དོ། །ཟླ་བ་དང་ཉི་མ་ནི། ཁུ་བ་དང་། རྔུལ་ལོ། །དབུས་ཀྱི་རལ་གྲི་ནི་མི་གཡོ་བ་ནག་པོའི་མཚན་མའོ། །གྲི་གུག་ནི་ཞེ་སྡང་རྡོ་རྗེ་མའོ། །ཤར་ལ་སོགས་པའི་ཕྱོགས་རྣམས་ནི་མི་གཡོ་བ་དཀར་པོ་ལ་སོགས་པ་རྣམས་སོ།