འཁྲུག་པ་ཐམས་ཅད་རྣམ་པར་བཟློག་སྟེ། སྡུག་བསྔལ་མཐར་བྱས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ཀྱི་བར་དུ་བདེ་འགྲོར་འགྲོ་བར་འགྱུར་རོ། །རིགས་ཀྱི་བུ་དེ་ལྟར་ལུས་དང་། ངག་དང་། ཡིད་ཀྱི་ཡི་དམ་འཆའ་བ་དང་། བསླབ་པ་འཛིན་པ་ཡང་དག་པར་ལེན་པར་བྱེད་པ་ནི་ཡོན་ཏན་དང་དགེ་བའི་རྩ་བ་མང་པོ་དང་ལྡན་པ་ཡིན་ན། བྱིས་པ་དག་གིས་ནི་དེ་མི་ཤེས་སོ། །དེ་ནས་དེའི་ཚེ་ན་བར་སྣང་ལས་སྒྲ་ཆེན་པོ་བྱུང་བར་གྱུར་པ་དང་། འཁོར་དེ་དག་ཐམས་ཅད་ཀྱིས་ཨེ་མའོ་ཨེ་མའོ་ཞེས་དམ་པའི་སྒྲ་བྱུང་ནས་མེ་ཏོག་དང་། དྲིའི་ཆར་ཆེན་པོ་རབ་ཏུ་ཕབ་བོ། །སེམས་ཅན་འབུམ་ཚང་བ་རྣམས་སྡུག་བསྔལ་ཐམས་ཅད་ལས་གྲོལ་བར་གྱུར་ཏེ། ཕྱིར་མི་ལྡོག་པའི་ས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བཀོད་དོ། །གཞན་ཡང་སེམས་ཅན་བྱེ་བ་རྣམས་སངས་རྒྱས་དང་། ཆོས་དང་། དགེ་འདུན་ལ་སྐྱབས་སུ་འགྲོ་བ་ཡིད་ལ་བྱས་ཤིང་སེམས་དང་པོ་བསྐྱེད་པར་གྱུར་ཏོ། །དེ་བཞིན་གཤེགས་པ་དེ་དག་ཐམས་ཅད་ཀྱང་མི་སྣང་བར་གྱུར་ཏོ། །དེ་ནས་ཕྱག་ན་རྡོ་རྗེ་ལ་སོགས་པ་རྡོ་རྗེ་འཛིན་པ་ཐམས་ཅད་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དང་། རྒྱལ་པོ་ཆེན་པོ་བཞི་རྣམས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དེ་བཞིན་གཤེགས་པས་བདག་ཅག་དབུགས་ཕྱུང་སྟེ། བདག་ཅག་གིས་ཆོས་ཀྱི་རྣམ་གྲངས་འདི་དང་། དེ་བཞིན་གཤེགས་པ་དེ་དག་གི་མཚན་རྣམས་ཐོས་ཏེ། བཅོམ་ལྡན་འདས་ལ་ཆོས་སྨྲ་བ་དང་། འཆང་བ་དང་། འདྲི་བ་དང་། ཀློག་པ་དང་། མཆོད་པ་དང་། སྒྲོགས་པ་དེ་དག་གི་ཡུལ་ལམ། གྲོང་ཁྱེར་རམ། གཙུག་ལག་ཁང་རྣམས་བདག་ཅག་གི་ལུས་དང་སྲོག་དང་ཡང་བསྔོས་ཏེ། བསྲུང་བར་བགྱི། ཡོངས་སུ་བསྐྱབ་པར་བགྱི། དོན་ཐམས་ཅད་གྲུབ་པར་བགྱི། ནོར་དང་འབྲུ་རྣམས་ལེགས་པར་བསྒྲུབ་པར་བགྱི། ཐམས་ཅད་དུ་མཆོད་པར་འགྱུར་བར་བགྱི། ནད་ཐམས་ཅད་ལས་ཡོངས་སུ་ཐར་བར་བགྱི། དྲན་པ་དང་། སྟོབས་དང་། སྤྲོ་བ་སྩལ་བར་བགྱིའོ། །དེ་ནས་བཅོམ་ལྡན་འདས་ཀྱིས་དེ་དག་ལ་ལེགས་སོ་ལེགས་སོ་ཞེས་བྱ་བ་བྱིན་ནས་འདི་སྐད་ཅེས་བཀའ་སྩལ་ཏོ།