།སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་བདུད་སྡིག་ཅན་རྣམས་དང་། བདུད་ཀྱི་རིས་ཀྱི་ལྷ་གང་དག་ཡིན་པ་དེ་དག་ཐམས་ཅད་དེའི་ཚེ་སྡུག་བསྔལ་ཞིང་ཡིད་མི་བདེ་བར་འགྱུར་ཏེ། འདི་ནི་བདག་ཅག་གི་དབང་དུ་མི་འགྱུར་རོ། །འདི་ལ་ནི་བདག་ཅག་དབང་མེད་དོ། །འདིས་ནི་བདག་ཅག་རྣམ་པ་ཐམས་ཅད་དུ་བཅོམ་མོ། །འདིས་ནི་བདག་ཅག་དབང་དུ་བྱས་སོ་སྙམ་མོ། །དེ་ཅིའི་ཕྱིར་ཞེ་ན། རིགས་ཀྱི་བུ་འདི་ལྟར་ཐོས་པ་དང་ལྡན་ན་ཤེས་རབ་སྐྱེ་བར་འགྱུར་རོ། །ཤེས་རབ་དང་ལྡན་ན་ཉོན་མོངས་པ་ཞི་བར་འགྱུར་རོ། །ཉོན་མོངས་པ་མེད་ན་བདུད་ཀྱིས་གླགས་མི་རྙེད་དོ། །ཐོས་པ་དང་ལྡན་ན་རྟོག་པར་འགྱུར་རོ། །རྟོག་པ་ཡོད་ན་ཚུལ་བཞིན་དུ་ཆོས་ཡོངས་སུ་ཚོལ་བར་འགྱུར་རོ། །ཚུལ་བཞིན་དུ་ཆོས་ཡོངས་སུ་ཚོལ་བ་ལ་བརྩོན་ན་བདུད་སྡིག་ཅན་གྱིས་གླགས་མི་རྙེད་དོ། །ཐོས་པ་དང་ལྡན་ན་ལོག་པར་ལྟ་བ་དང་བྲལ་བར་འགྱུར་ལ་ཡང་དག་པའི་ལྟ་བ་ཡང་སྐྱེད་པར་འགྱུར་རོ། །ཡང་དག་པར་ཞུགས་ན་བདུད་ཀྱིས་གླགས་མི་རྙེད་དོ། །ཡང་དག་པར་ཞུགས་ན་དོན་ལ་ཉེ་བར་རྟོག་པ་དང་གནོད་པ་དང་འབྲལ་བར་འགྱུར་རོ། །དོན་འདོད་ན་དོན་ལ་ཡང་དག་པར་འབྲང་བར་འགྱུར་ཏེ། རིགས་ཀྱི་བུ་རྣམ་གྲངས་དེས་ཀྱང་ཐོས་པ་མང་པོ་ལ་བརྩོན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་བདུད་བཞི་ཕམ་པར་བྱེད་ནུས་པར་འགྱུར་བ་དེ་ལྟར་རིག་པར་བྱའོ། །བཞི་གང་ཞེ་ན། འདི་ལྟ་སྟེ། ཕུང་པོའི་བདུད་དང་། ཉོན་མོངས་པའི་བདུད་དང་། འཆི་བདག་གི་བདུད་དང་། ལྷའི་བུའི་བདུད་དེ། བདུད་བཞི་པོ་འདི་དག་ཕམ་པར་བྱེད་ནུས་སོ། །རིགས་ཀྱི་བུ་གཞན་ཡང་ཇི་ལྟར་སྔོན་གྱི་བྱང་ཆུབ་སེམས་དཔའ་ཆོས་དོན་དུ་གཉེར་བ་དང་། ཆོས་འདོད་པ་རྣམས་ཀྱིས་ཐོས་པ་ཡོངས་སུ་བཙལ་བ་དེ་ལས་ཆུང་ཟད་ཙམ་ཁྱོད་ལ་བསྟན་པར་བྱའོ། །རིགས་ཀྱི་བུ་སྔོན་བྱུང་བ་འདས་པའི་དུས་བསྐལ་པ་གྲངས་མེད་པ་བས་ཀྱང་ཆེས་གྲངས་མེད་པ། ཡུན་རིང་པོ་ཚད་མེད་བསམ་གྱིས་མི་ཁྱབ་པ། འདས་པ་དེའི་ཚེ་དེའི་དུས་ན་དྲང་སྲོང་ཆེན་པོ་མཆོག་ཅེས་བྱ་བ། ནགས་དང་། ནགས་འདབ་དང་། རི་ལ་གནས་པ། མངོན་པར་ཤེས་པ་ལྔ་དང་ལྡན་པ། རྟག་ཏུ་བྱམས་པ་ལ་གནས་པ་དང་། སྙིང་རྗེ་ལ་གནས་པ་ཞིག་བྱུང་སྟེ། དྲང་སྲོང་དེ་མཆོག་ཏུ་གྱུར་ཏོ།