།བསོད་ནམས་ལས་ཀྱིས་བསམ་པ་ཡོངས་སྦྱངས་པ། །དེ་དག་མིག་ལམ་རྣམ་པར་འདྲེན་རྣམས་གདའ། །རྒྱལ་བའི་སྐུ་ནི་ཆོས་དབྱིངས་རྒྱས་པར་འགེངས། །ཞིང་རྣམས་རབ་འབྱམ་ཐམས་ཅད་ན་ཡང་གདའ། །བཞུད་དང་བྱོན་པར་མངོན་པ་ཡོད་མ་མཆིས། །འོན་ཀྱང་འཇིག་རྟེན་དག་ན་སྣོད་བཞིན་གདའ། །བདེན་པ་གཟིགས་ཤིང་དོན་དམ་སྟོན་པ་པོ། །ཆོས་ཀྱི་སྦྱིན་བདག་ཞི་བའི་ཐུགས་ལྡན་པ། །རྒལ་ནས་སྲོག་ཆགས་བཅིངས་གྱུར་གཞན་སྒྲོལ་བ། །བདེ་བར་གཤེགས་པ་ཁྱོད་ལ་ཕྱག་འཚལ་ལོ། །ཁྱོད་ཀྱིས་སྐྱེ་བའི་ཤིང་ལྗོན་རྩ་ནས་བཏོན། །ང་རྒྱལ་རི་བོ་སྲ་བ་རྡུལ་དུ་བརླགས། །རྒོད་པ་མི་མངའ་གཡོ་དང་སྒྱུ་དང་བྲལ། །རབ་ཞི་ཐུགས་དང་ལྡན་ལ་ཕྱག་འཚལ་ལོ། །མི་མཆོག་ཆགས་པ་ཐམས་ཅད་ཡོང་མི་མངའ། །དགོངས་པ་ས་དང་ཆུ་དང་མེ་དང་འདྲ། །རྒྱལ་བ་སེམས་ཅན་ཀུན་ལ་སྙོམས་ཐུགས་ལྡན། །རླུང་དང་ནམ་མཁའ་འདྲ་ལ་ཕྱག་འཚལ་ལོ། །ཐུབ་པ་ཆེན་པོ་ཡོན་ཏན་འདི་འདྲའི་གཏེར། །བསོད་ནམས་རྒྱ་མཚོ་ལས་བྱུང་སྐུ་དང་ལྡན། །བསྐལ་པ་ཁྲག་ཁྲིག་དག་ཏུ་དེ་བརྗོད་ཀྱང་། །ཡོན་ཏན་རྒྱ་མཚོ་ཟད་པར་ནུས་མ་ལགས། །ཡོན་ཏན་རྒྱ་མཚོ་ལྷ་མིས་མཆོད་པ་ལ། །བདག་ནི་བུ་དང་བཅས་ཏེ་མཆོད་པ་བགྱིད། །རྒྱལ་བ་མཆོད་པའི་བསོད་ནམས་ཅི་མཆིས་པ། །དེས་ནི་ཐུབ་པ་ཆེན་པོ་ཁྱོད་འདྲར་ཤོག །པད་མའི་དཔལ་གྱི་སྙིང་པོ་དེ་ནས་རྒྱལ་པོ་དཔལ་གྱི་གཟི་བརྗིད་དེ་དུས་གཞན་ཞིག་ན། སྐྱེད་མོས་ཚལ་ན་བསམ་གཏན་གྱི་གནས་པས་གནས་ཤིང་འདུག་པའི་བློ་གཡས་གཡོན་ནས། ཙན་དན་སྦྲུལ་གྱི་སྙིང་པོའི་པད་མ་བཀྲ་བ་བལྟ་ན་སྡུག་པ་དག་པ་གཉིས་བྱུང་ངོ་། །པད་མ་དེ་གཉིས་ལས་ཁྱེའུ་མིང་རིན་ཆེན་སེམས་དང་། རིན་ཆེན་མཆོག་ཅེས་བྱ་བ་གཉིས་རྫུས་ཏེ་བྱུང་ནས། སྐྱིལ་མོ་ཀྲུང་བཅས་ཏེ་འདུག་གོ། །པད་མའི་དཔལ་གྱི་སྙིང་པོ་དེ་ལྟར་རྒྱལ་པོ་དཔལ་གྱི་གཟི་བརྗིད་དེ་ཏིང་ངེ་འཛིན་དེ་ལས་ལངས་ནས་ཁྱེའུ་གཉིས་སྐྱིལ་མོ་ཀྲུང་བཅས་ཏེ་འདུག་པ་མཐོང་ངོ་། །མཐོང་ནས་ཀྱང་ཚིགས་སུ་བཅད་པ་འདི་སྨྲས་སོ། །ཁྱེད་གཉིས་ལྷ་འམ་ཀླུ་ཡིན་ནམ། །གནོད་སྦྱིན་དྲི་ཟ་མི་ཅི་འམ། །མི་འམ་མི་མ་ཡིན་ནམ་ཅི། །དྲིས་པ་སྨྲོས་ཤིག་གྲོགས་པོ་དག །པད་མའི་དཔལ་གྱི་སྙིང་པོ་དེ་ལྟར་རྒྱལ་པོ་དཔལ་གྱི་གཟི་བརྗིད་ཀྱི་གཡས་ཕྱོགས་སུ་བྱུང་བའི་ཁྱེའུ་གང་ཡིན་པ་དེས་རྒྱལ་པོ་དཔལ་གྱི་གཟི་བརྗིད་དེ་ལ་ཚིགས་སུ་བཅད་དེ་སྨྲས་པ།