།འཇམ་དཔལ་དེ་བཞིན་གཤེགས་པ་ནི་དེ་དག་ལ་ཡང་ཐམས་ཅད་དུ་མཉམ་ཞིང་བཏང་སྙོམས་ལ་རྣམ་པར་མི་རྟོག་ཅིང་བྱེ་བྲག་མི་འབྱེད་དེ། འཇམ་དཔལ་དེ་བཞིན་གཤེགས་པ་ཉི་མའི་དཀྱིལ་འཁོར་གྱི་ཡེ་ཤེས་ཀྱི་འོད་ཟེར་ནི་འདི་སྙམ་དུ་བདག་གིས་སེམས་ཅན་འདི་ལ་ནི་ཆོས་རྒྱ་ཆེན་པོ་བསྟན་པར་བྱའོ། །འདི་ལ་ནི་བསྟན་པར་མི་བྱའོ་སྙམ་དུ་ཡང་མི་སེམས་ལ། འདི་སྙམ་དུ་སེམས་ཅན་འདི་ནི་རྒྱ་ཆེན་པོ་ལ་མོས་པ་ཡིན་ནོ། །འདི་ནི་བར་མ་ལ་མོས་པ་ཡིན་ནོ། །འདི་ནི་ཉན་ཐོས་ཀྱི་ཐེག་པ་ལ་མོས་པ་ཡིན་ནོ། །འདི་ནི་བསམ་པ་དགེ་བ་ཡིན་ནོ། །འདི་ནི་དམན་པ་དང་ལོག་པ་ལ་མོས་པ་ཡིན་ནོ་སྙམ་དུ་རྣམ་པར་རྟོགས་པར་ཡང་མི་བྱེད་དེ། འཇམ་དཔལ་དེ་བཞིན་གཤེགས་པ་ནི་འདི་སྙམ་དུ། སེམས་ཅན་འདི་ནི་རྒྱ་ཆེན་པོ་ལ་མོས་པ་ཡིན་གྱིས་འདི་ལ་ནི་ཐེག་པ་ཆེན་པོ་བསྟན་པར་བྱའོ། །འདི་ནི་ལྷག་པའི་བསམ་པ་བར་མ་ལ་མོས་པ་ཡིན་གྱིས། འདི་ལ་ནི་རང་སངས་རྒྱས་ཀྱི་ཐེག་པ་བསྟན་པར་བྱའོ། །འདི་ནི་ཉན་ཐོས་ཀྱི་ཐེག་པ་ལ་མོས་པ་ཡིན་གྱིས། འདི་ལ་ནི་ཉན་ཐོས་ཀྱི་ཐེག་པ་བསྟན་པར་བྱའོ། །སེམས་ཅན་བསམ་པ་དགེ་བ་རྣམས་ཀྱི་བསམ་པ་རྟོགས་པར་བྱས་ནས། བསམ་པ་རྣམ་པར་སྦྱང་བར་བྱའོ། །སེམས་ཅན་ལོག་པ་ཉིད་དུ་མོས་པའི་བར་དག་ནི་ལྟ་བ་དྲང་པོ་བྱ་ཞིང་། ཇི་ལྟར་རྗེས་སུ་འཐུན་པའི་ཆོས་བསྟན་པར་བྱའོ། །སྙམ་དུ་ཡང་མི་སེམས་ཏེ། དེ་བཞིན་གཤེགས་པ་ཉི་མའི་དཀྱིལ་འཁོར་གྱི་ཡེ་ཤེས་ཀྱི་འོད་ཟེར་སྣང་བ་ནི་དེ་ལྟར་རྣམ་པར་རྟོག་པར་མི་བྱེད་དོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ཉི་མའི་དཀྱིལ་འཁོར་གྱི་ཡེ་ཤེས་ཀྱི་འོད་ཟེར་སྣང་བ་ནི་རྟོག་པ་དང་། རྣམ་པར་རྟོག་པ་དང་། ཡོངས་སུ་རྟོག་པ་དང་། སྤྲོས་པ་ཐམས་ཅད་ཡང་དག་པར་རྒྱུན་ཆད་པ་ཡིན་པའི་ཕྱིར་རོ། །འཇམ་དཔལ་འོན་ཀྱང་སེམས་ཅན་རྣམས་ཀྱི་དགེ་བའི་བསམ་པའི་རྒྱུད་སྣ་ཚོགས་དག་ལ་དེ་བཞིན་གཤེགས་པ་ཉི་མའི་དཀྱིལ་འཁོར་གྱི་ཡེ་ཤེས་ཀྱི་འོད་ཟེར་གྱི་སྣང་བ་སྣ་ཚོགས་དག་འབྱུང་བར་ཡང་འགྱུར་རོ།། །།བམ་པོ་གཉིས་པ། འཇམ་དཔལ་འདི་ལྟ་སྟེ་དཔེར་ན། རྒྱ་མཚོ་ཆེན་པོའི་ནང་ན་ནོར་བུ་རིན་པོ་ཆེ་ཆེན་པོ་བསམ་པ་ཐམས་ཅད་ཡོངས་སུ་རྫོགས་པར་བྱེད་པ་ཞེས་བྱ་བ་ཞིག་ཡོད་དེ། དེ་རྒྱལ་མཚན་གྱི་རྩེ་མོ་ལ་བཏགས་ན་དེ་ལས་སེམས་ཅན་གང་གིས་བསམ་པ་ཅི་འདྲ་བ་དེ་ལྟ་བུའི་སྒྲ་འབྱུང་བར་སེམས་ཅན་རྣམས་ཀྱིས་ཀུན་ཏུ་ཤེས་ཀྱང་ནོར་བུ་རིན་པོ་ཆེ་ཆེན་པོ་དེ་ནི་རྟོག་པར་མི་བྱེད།